ເຈົ້າໜ້າທີ່ຕຳຫຼວດສະກັດກັ້ນ ແລະ ຕ້ານຢາເສບຕິດ ປກສ ເມືອງຄຳເກີດ ແຂວງບໍລິຄຳໄຊ ໄດ້ຕິດຕາມການເຄື່ອນໄຫວບຸກຄົນຄ້າຂາຍຢາເສບຕິດປະເພດຢາບ້າ ແລະ ໄດ້ຜົນເຫັນສອງສ່ຽວໄດ້ມີການເຄື່ອນໄຫວຄ້າຂາຍຢາບ້າຢູ່ເຂດ ບ້ານນ້ຳພ້າວ ເມືອງຄຳເກີດ ສະນັ້ນທາງເຈົ້າໜ້າທີ່ຕຳຫຼວດຈິ່ງໄດ້ວາງແຜນເພື່ອຈັບເປົ້າໝາຍທັງສອງ.
ໃນເວລາປະມານ 18:00 ໂມງ ຂອງວັນທີ 20 ເດືອນເມສາ 2016 ນີ້ເຈົ້າໜ້າທີ່ໄດ້ຕິດຕາມເປົ້າໝາຍທັງສອງທີ່ກຳ ລັງນຳຢາບ້າຈາກບ້ານນ້ຳພ້າວເມືອງ ຄຳເກີດ ໄປສົ່ງໃຫ້ສາຂາຢູ່ບ້ານວັງກໍ່ ເມືອງຄຳເກີດ ພໍເປົ້າໝາຍທັງສອງໄດ້ ໄປຮອດກາງທາງເຈົ້າໜ້າທີ່ຕຳຫຼວດກໍ່ໄດ້ສະແດງຕົວເຂົ້າຈັບກຸມພ້ອມທັງກວດພົບເຫັນຢາບ້າຈຳນວນ 200 ເມັດ ແລະ ປືນສັ້ນດັດແປງ 1 ກະບອກລູກປືນແວ໋ງ 11 ລູກ ແລ້ວກັກຕົວຜູ້ຖືກຫາທັງ 2 ຄົນ ໄປ ປກສ ເມືອງຄຳເກີດ ເພື່ອສືບສວນ-ສອບສວນ.
ຜ່ານການກວດກາຕົວຈິງລາຍນີ້ມີຊື່ ວ່າທ້າວ ຫວັງຈື່ຊົ່ງ ອາຍຸ 27 ປີປະຊາຊົນບ້ານນ້ຳພ້າວ ເມືອງຄຳເກີດ ແຂວງ ບໍລິຄຳໄຊ ແລະທ້າວ ອ່ອນ (ຈ໋ອດ) ອາຍຸ 24 ປີ ປະຊາຊົນບ້ານນ້ຳພ້າວ ເມືອງຄຳເກີດ ແຂວງບໍລິຄຳໄຊ.
ທ້າວ ຫວັງຈື່ຊົ່ງ ໄດ້ສາລະພາບຕໍ່ເຈົ້າໜ້າທີ່ວ່າ: ຕົນໄດ້ຄ້າຂາຍຢາບ້າມາໄດ້ 5-6 ຄັ້ງແລ້ວ ແຕ່ລະຄັ້ງແມ່ນໄດ້ຊື້ຢາບ້ານຳຄົນບ້ານໃກ້ຄຽງເປັນຄົນຊົນເຜົ່າບໍ່ຮູ້ຊື່ ຊືື້ຄັ້ງລະ 20-30 ເມັດ, ເມັດລະ 10 ພັນກີບ ແລ້ວມາຂາຍເມັດລະ 15 ພັນກີບຄັ້ງທີ່ຖືກເຈົ້າໜ້າທີ່ຕຳຫຼວດກັກຕົວແມ່ນໄດ້ຮ່ວມກັນຄ້າ-ຂາຍກັບ ທ້າວ ອ່ອນ (ຈ໋ອດ).
ສ່ວນທ້າວ ອ່ອນ ຫຼື ຈ໋ອດ ໄດ້ສາລະພາບວ່າຕົນໄດ້ເຄື່ອນໄຫວຊື້-ຂາຍຢາບ້າ ມາໄດ້ 7-8 ຄັ້ງແລ້ວແຕ່ລະຄັ້ງໄດ້ຊື້ນຳຄົນບ້ານໃກ້ຄຽງເປັນຄົນຊົນເຜົ່າເຊັ່ນກັນ ແຕ່ລະຄັ້ງແມ່ນຊື້ຄັ້ງລະ 20-30 ເມັດຊື້ 1 ເມັດ 15 ພັນກີບ ມາຂາຍໃນລາຄາ 20 ພັນກີບ.
ຕໍ່ກັບການກະທຳຜິດຂອງພວກກ່ຽວທັງສອງເຫັນວ່າຜິດຕໍ່ລະບຽບກົດໝາຍສອງຂໍ້ຫາຄືມີຢາເສບຕິດ ແລະມີອາວຸດໄວ້ໃນຄອບຄອງຈິ່ງໄດ້ຈັບຕົວທັງສອງໄວ້ສືບສວນ-ສອບສວນດຳເນີນຄະດີຕາມລະບຽບກົດໝາຍ.
ທີ່ມາ: 