ສະຫະພັນເປຕັງແຫ່ງຊາດລາວ ໂດຍຮັບການອຸປະຖໍາຈາກບໍລິສັດເບຍລາວ ໄດ້ສໍາເລັດການແຂ່ງຂັນເປຕັງທົ່ວປະເທດ ຄັ້ງທີ 2 ພາຍຫຼັງດໍາເນີນແຂ່ງຂັນເປັນເວລາ 3 ວັນ ແຕ່ວັນທີ 06 ພຶດສະພາ 2016 ເປັນຕົ້ນມາ ຢູ່ທີ່ສະໜາມກີລາເປຕັງ ຂອງສະຫະພັນດັ່ງກ່າວ ເຊິ່ງປະກອບມີ 4 ປະເພດກີລາຄື ປະເພດດ່ຽວທົ່ວໄປ ປະເພດຊຸດຕິ້ງທົ່ວໄປ ປະເພດທີມຄູ່ທົ່ວໄປ ແລະ ປະເພດທີມຄູ່ກິຕິມະສັກ ເຊິ່ງມີນັກກີລາ ແລະ ຄູເຝິກ ຫຼາຍກວ່າ 300 ຄົນ ໃນນັ້ນມາຈາກ 11 ແຂວງທົ່ວປະເທດ 6 ກະຊວງ ແລະ 5 ອົງການຈັດຕັ້ງທາງສັງຄົມອ້ອມຂ້າງເຂົ້າຮ່ວມ.
ສໍາລັບພິທີອັດການແຂ່ງຂັນໄດ້ຈັດຂຶ້ນໃນຕອນແລງວັນທີ 08 ພຶດສະພາ 2016 ທີ່ສະໜາມກີລາເປຕັງ ສະຫະພັນກີລາເປຕັງແຫ່ງຊາດລາວ (ດົງໂດກ ເມືອງໄຊທານີ) ນະຄອນຫຼວງວຽງຈັນ ໂດຍການເຂົ້າຮ່ວມ ແລະ ມອບຂັນລາງວັນຂອງທ່ານ ບົວລານ ສິຣິປັນຍາ ຮອງລັດຖະມົນຕີກະຊວງສຶກສາທິການ ແລະ ກີລາ ມີຫົວໜ້າກົມກີລາລະດັບສູງ ກະຊວງສຶກສາທິການ ແລະ ກີລາ ປະທານສະຫະພັນກີລາເປຕັງແຫ່ງຊາດລາວ ຜູ້ຕາງໜ້າບໍລິສັດເບຍລາວຈໍາກັດ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ທ່ານ ຄໍາຫຼ້າ ວິນໄລທອງ ປະທານສະຫະພັນເປຕັັງແຫ່ງຊາດລາວ ໄດ້ລາຍງານໃນພິທີສະຫຼຸບຜົນການແຂ່ງຂັນກີລາເປຕັງທົ່ວປະເທດ ຄັ້ງທີ 2 ໃຫ້ຮູ້ວ່າ ການຈັດການແຂ່ງຂັນໃນເທື່ອນີ້ ກໍຄືປີຜ່ານມາ ເພື່ອເປັນການທົດສອບຄວາມສາມາດ ແລະ ຄົ້ນຫາພອນສະຫວັນຂອງນັກກີລາແຕ່ລະປະເພດ ພ້ອມທັງຄັດເລືອກເອົາໂຕແທນນັກກີລາເຂົ້າທີມຊາດເພື່ອກຽມຄວາມພ້ອມເຂົ້າຮ່ວມແຂ່ງຂັນໃນລະດັບພາກພື້ນ ແລະ ສາກົນ ສ່ວນຜົນການແຂ່ງຂັນປະເພດດ່ຽວທົວໄປ ຊະນະເລີດອັນດັບທີ 1 ແມ່ນທ້າວ ແປັບຊີ ແກ້ວວິໄລ ຈາກສະຖາບັນວິຈິດສິນ ກະຊວງຖະແຫຼງຂ່າວ ວັດທະນະທໍາ ແລະ ທ່ອງທ່ຽວ ອັນດັບທີ 2 ທ້າວ ສົມສະໄໝ ຊາມຸນຕີ ຈາກກະຊວງປ້ອງກັນຄວາມສະຫງົບ ອັນດັບທີ 3 ທ້າວ ກຸມມານ ຫຼ້າດວງພິລາ ຈາກກະຊວງປ້ອງກັນຄວາມສະຫງົບ ປະເພດຊຸດຕິ້ງທົ່ວໄປ ຊະນະເລີດອັນດັບ 1 ໄດ້ແກ່ທ້າວ ພຸດທະລາ ແກ້ວກັນນິກາ ຈາກກະຊວງປ້ອງກັນຄວາມສະຫງົບ ອັນດັບທີ 2 ທ້າວ ສົມສັກ ວົງພັກດີ ຈາກສະໂມສອນ 20 ມັງກອນ ອັນດັບ 3 ທ້າວ ດາວັນ ຫຼວງລາດ ຈາກສະຫະພັນເປຕັງນະຄອນຫຼວງ ປະເພດທີມຄູທົ່ວໄປ ຊະນະເລີດອັນດັບທີ 1 ແມ່ນກະຊວງປ້ອງກັນຄວາມສະຫົງບ ອັນດັບ 2 ແຂວງຈໍາປາສັກ ອັນດັບ 3 ແມ່ນແຂວງບໍລິຄໍາໄຊ ແລະ ປະເພດທີມຄູ່ກິຕິມະສັກ ຊະນະເລີດອັນດັບທີ 1 ໄດ້ແກ່ທ່ານ ຄໍາເກີດ ຟອງສານຸວົງ ທ່ານ ວົງພະຈັນ ສີຫາລາດ ຈາກສະໂມສອນດອນຝ້າຍ ອັນດັບ 2 ທ່ານ ອະນຸສິດ ປຸ່ນບຸນໂຮມ ທ່ານ ຄໍາເພົາ ຄໍາຊົມພູ ຈາກກະຊວງປ້ອງກັນຄວາມສະຫງົບ ແລະ ອັນດັບທີ 3 ທ່ານ ສຸລິວົງ ສີສັດຕະວັນນາ ທ່ານ ສົມໝາຍ ສີສະຫວັດ ຈາກກະຊວງປ້ອງກັນຄວາມສະຫງົບ.
ຂ່າວ/ພາບ: ເທບພະວົງ
