ການແຂ່ງຂັນບານເຕະ 7 ຄົນ ໃນໂຄງການເຊຍ ຢູໂຣ 2016 ຕິດຂອບສະໜາມ ກັບ ຄາສເບິກ ເພື່ອຊີງລາງວັນໃຫຍ່ ບັດເຂົ້າຊົມການແຂ່ງຂັນບານເຕະ ຢູໂຣ 2016 ຮອບຮອງຊະນະເລີດ ທີ່ປະເທດຝຣັ່ງ ຈັດຂຶ້ນລະຫວ່າງວັນທີ 6-8 ພຶດສະພາ 2016 ທີ່ສູນກີລາຄົບວົງຈອນກູດໄລ.
ພິທີເປີດ ການແຂ່ງຂັນບານເຕະ 7 ຄົນ ດັ່ງກ່າວ ຈັດຂຶ້ນວັນທີ 6 ພຶດສະພາ 2016 ຜ່ານມາ ທີ່ສູນກີລາຄົບວົງຈອນກູດໄລ ໂດຍມີ ທ່ານ ວຽງສະຫວັນ ແສງຈັນ ປະທານສະຫະພັນບານເຕະ ນະຄອນຫຼວງວຽງຈັນ, ທ່ານ ຈັນສະຫມອນ ຜ່ອງຈັນທາ ຫົວຫນ້າການຕະຫລາດບໍລິສັດ ເບຍລາວ ຈໍາກັດ , ທ່ານ ອາລິຍະ ປັນຍາຜົນ ຜູ້ຈັດການຝ່າຍຜະລິດຕະພັນຄາສເບິກ ພ້ອມດ້ວຍຄູເຝິກ, ນັກກີລາ ແລະ ຕົວແທນທີ່ມາຈາກ 32 ທີມ ເຂົ້າຮ່ວມ.
ການແຂ່ງຂັນຮອບ 32 ທີມ ແຂ່ງແບບເສຍຄັດອອກແຂ່ງຂັນ ແລະ ຮອບ 16 ທີມແຂ່ງແບບເສຍຄັດອອກ ສ່ວນຮອບຮອງຊະນະເລີດ ແລະ ຮອບຊີງຊະນະເລີດ ຈະແຂ່ງຂັນໃນວັນທີ 8 ພຶດສະພານີ້ ໂດຍທີມຊະນະເລີດຈະໄດ້ຮັບ ບັດເຂົ້າຊົມການແຂ່ງຂັນບານເຕະ ຢູໂຣ 2016 ຮອບຮອງຊະນະເລີດ ທີ່ປະເທດຝຣັ່ງ ຈໍານວນ 8 ລາງວັນ ພ້ອມຂັນລາງວັນ ແລະ ເງິນສົດ 5 ລ້ານກີບ, ຮອງຊະນະເລີດ ໄດ້ເງິນສົດ 3 ລ້ານກີບ, ອັນດັບ 3 ໄດ້ເງິນສົດ 2 ລ້ານກີບ ແລະ ອັນດັບ 4 ໄດ້ເງິນສົດ 1 ລ້ານກີບ. ນອກນັ້ນ, ຍັງມີລາງວັນນັກເຕະທີ່ຍິງປະຕູຫຼາຍທີ່ສຸດ ຈະໄດ້ຮັບລາງວັນພິເສດພ້ອມໂລ້ລາງວັນ ແລະ ລາງວັນກອງເຊຍດີເດັ່ນ (ເຊຍໄດ້ບັນຍາກາດຟົດຟື້ນ) ຈະໄດ້ຮັບເງິນສົດ 5 ແສນກີບ.
ສໍາລັບ ທີມທີ່ໄດ້ຊະນະເລີດປະຈໍາການແຂ່ງຂັນ ທາງຄະນະກໍາມະການຈັດການແຂ່ງຂັນຈະໄດ້ຮັບຜິດຊອບຄ່າເດີນທາງ, ທີ່ພັກ ແລະ ອາຫານ ໄປປະເທດຝຣັ່ງ. ນອກຈາກນີ້, ຜູ້ຊົມທີ່ເຂົ້າຮ່ວມກິດຈະກໍາ ລະຫວ່າງວັນທີ 6-8 ພຶດສະພາ 2016 ທີ່ສູນກີລາຄົບວົງຈອນກູດໄລ ຍັງມີສິດລຸ້ນຮັບບັດເຂົ້າຊົມການແຂ່ງຂັນບານເຕະ ຢູໂຣ 2016 ຮອບຮອງຊະນະເລີດ ທີ່ປະເທດຝຣັ່ງ ຈໍານວນ 2 ລາງວັນ (ລາງວັນລະ 2 ບ່ອນນັ່ງ) ອີກດ້ວຍ.
ຂ່າວຈາກ: ຂ່າວສານບານເຕະລາວ