ໃຊ້ເວລາພຽງປີກວ່າສະຖາບັນການເງິນຈຸລະພາກທີ່ຮັບເງິນຝາກຈຳປາສັກສາມາດຍົກລະດັບຖານະການເງິນບົດບາດ ແລະ ຄວາມເຊື່ອໝັ້ນຈາກສັງຄົມໄດ້ໃນລະດັບດີພໍສົມຄວນ ແລະ ສາມາດສ້າງຕົວເອງໃຫ້ກາຍເປັນສະຖາບັນການເງິນຈຸລະພາກທີ່ນຳໜ້າໃນ ແຂວງຈຳປາສັກ ຂະນະ ທີ່ໝົດປີ້ນີ້ຕັ້ງເປົ້າຈະລະດົມເງິນຝາກໃຫ້ໄດ້ໃນລະດັບ 15 ຕື້ກີບ ແລະໃຫ້ສິນເຊື່ອ 60 ຕື້ກວ່າກີບ.
ທ່ານ ໜູເຄືອບ ສິດທິເດດ ຜູ້ອຳນວຍການສະຖາບັນການເງິນດັ່ງກ່າວໄດ້ໃຫ້ຮູ້ເມື່ອບໍ່ດົນມານີ້ວ່າ: ສະຖາບັນການເງິນຈຸລະພາກທີ່ຮັບເງິນຝາກຈຳປາສັກຈຳກັດ, ໄດ້ຮັບອະນຸມັດຈາກທະນາຄານແຫ່ງ ສປປ ລາວ, ໄດ້ສ້າງຕັ້ງຂຶ້ນໃນເດືອນມີນາ 2015, ຈຸດປະສົງແມ່ນແນໃສ່ການແກ້ໄຂຄວາມທຸກຍາກຂອງປະຊາຊົນໃຫ້ໄດ້ ແລະ ເພື່ອນຳເອົາປະເທດຫຼຸດພົ້ນອອກຈາກສະຖານະພາບຂອງ ປະເທດດ້ອຍພັດທະນາໃນປີ 2020, ພາລະກິດຕົ້ນຕໍຂອງສະຖາບັນແມ່ນຂະຫຍາຍການບໍລິການໄປສູ່ປະຊາຊົນທຸກຊຸມຊົນ, ທຸກພາກສ່ວນທີ່ມີລາຍໄດ້ໜ້ອຍໃຫ້ເຂົາເຈົ້າໄດ້ມີໂອກາດເຂົ້າເຖິງການບໍລິການສິນເຊື່ອ ແລະຮັບເງິນຝາກທີ່ເໝາະສົມກັບຄວາມອາດສາມາດ ແລະ ຄວາມຕ້ອງການຂອງເຂົາເຈົ້າ.
ທ່ານກ່າວຕື່ມວ່າ: ນັບແຕ່ມື້ເປີດບໍລິການມາຮອດທ້າຍປີ 2015 ສະຖາບັນການເງິນໄດ້ໃຫ້ບໍລິການເງິນຈຸລະພາກ ແກ່ລູກຄ້າທັງໝົດ 4.026 ຄົນໃນນັ້ນຍັງມີລູກຄ້າທີ່ສຶບຕໍ່ເຄື່ອນໄຫວນຳພວກເຮົາໃນປີ 2016 ຈຳນວນ 3.704 ຄົນ, ສາມາດລະດົມເງິນຝາກໄດ້ກວ່າ 56 ຕື້ກີບ ແລະປ່ອຍກູ້ຈຸລະພາກໄດ້ 51 ຕື້ກວ່າກີບ, ໃນທ້າຍປີ 2015 ຍອດເງິນເຫຼືອກູ້ຂອງລູກຄ້າແມ່ນ 37 ຕື້ກວ່າກີບ, ໃນນັ້ນ 49% ແມ່ນການກູ້ຢືມເພື່ອໄປຊົມໃຊ້ໃນຄົວເຮືອນ 30% ແມ່ນການກູ້ຢືມເພື່ອການກະສີກຳ ແລະ 21% ແມ່ນການກູ້ຢືມເພື່ອການຄ້າ.
ສຳລັບໃນປີ 2016 ນີ້ສະຖາບັນການເງິນຈຸລະພາກພວກເຮົາມີແຜນທີ່ຈະຂະຫຍາຍຕາໜ່າງການບໍລິການໃຫ້ ກວ້າງຂຶ້ນ, ໃຫ້ເຂົ້າເຖິງລູກຄ້າທີ່ມີຄວາມຕ້ອງການຂອງພວກເຮົາໄດ້ຢ່າງທົ່ວເຖິງໃນທຸກຂົງເຂດ ແລະເປົ້າໝາຍໂດຍຈະສູ້ຊົນບໍລິການລູກຄ້າໃຫ້ໄດ້ 6.260 ຄົນ, ລະດົມເງິນຝາກຈາກມວນຊົນໃຫ້ໄດ້ 15,6 ຕືກີບ, ໃຫ້ບໍລິການເງິນກູ້ຈຸລະພາກໃຫ້ໄດ້ 60,8 ຕື້ກີບ ແລະ ຄາດຄະເນຍອດເຫຼືອເງິນທ້າຍປີ 2016 ແມ່ນ 67,5 ຕື້ກີບ.
ທີ່ມາ: