ຂ່າວດີສໍາຫຼັບຜູ້ທີ່ຕິດເຊື້ອພະຍາດ HIV ຫຼື ໂລກເອດສ໌ ເພາະຫຼ້າສຸດນີ້ໃນການປະຊຸມແພດ ແລະ ນັກວິໄຈກ່ຽວກັບໂລກເອດສ໌ ແລະ ໂລກຕິດເຊື້ອສວຍໂອກາດລະດັບໂລກ ຫຼື “CROI 2013” (The Conference on Retroviruses and Opportunistic Infections) ຈັດຂຶນທີ່ເມືອງ ແອັດແລນຕາ ລັດຈໍເຈຍ ຂອງສະຫະລັດອາເມລິກາ, ເຊິ່ງໃນນັ້ນໄດ້ມີນັກວິໄຈໄທຄົນໜຶ່ງໄດ້ເຜີຍແຜ່ງານວິໄຈຂອງລາວກ່ຽວກັບການຮັກສາຜູ້ຕິດເຊື້ອ HIV ໃນໄລຍະເລີ່ມຕົ້ນໃຫ້ກັບມາມີໂອກາດຫາຍດີເປັນປົກກະຕິໄດ້ ເລື່ອງດັ່ງກ່າວນີ້ໄດ້ສ້າງຄວາມປະຫຼາດໃຈໃຫ້ແກ່ສະມາຊິກໃນກຸ່ມປະເທດຕ່າງໆທີ່ເຂົ້າຮ່ວມ.
ຮສ ຈິນຕະນາດ ອະນັນວໍລະນິດ ນັກວິໄຈໂລກເອດສ໌ ສູນວິໄຈໂລກເອດສ໌ສະພາແຫ່ງຊາດໄທ ຫົວໜ້າໂຄງການວິໄຈການຮັກສາຜູ້ຕິດເຊື້ອ HIV ໄລຍະສຸດທ້າຍໄດ້ກ່າວວ່າ: ຂະບວນການກວດເຊື້ອ HIV ໃນເມື່ອກ່ອນແມ່ນຕ້ອງໃຊ້ເວລາ 2 ອາທິດຈຶ່ງຈະພົບເຊື້ອ ເຊິ່ງເຮັດໃຫ້ການຮັກສາຄົນເຈັບມີຄວາມຊັກຊ້າ, ຈຶ່ງໄດ້ຄິດຄົ້ນການກວດໂດຍໃຊ້ລະບົບແນ໊ດ (NAT: Nucleic Acid Amplification Testing) ຂຶ້ນມາ ຈາກການວິໄຈພົບວ່າສາມາດຮູ້ຜົນໄດ້ໄວຂຶ້ນ, ມີຄວາມປອດໄພ ແລະ ຖືກຕ້ອງ. ເຊິ່ງຖ້າຫາກວ່າຄົນເຈັບສົງໄສວ່າມີການຕິດເຊື້ອໃນ 5 ມື້ຂຶ້ນໄປ ລະບົບດັ່ງກ່າວນີ້ກໍຈະສາມາດກວດພົບໄດ້ໃນ 1-2 ມື້ເທົ່ານັ້ນ ເຮັດໃຫ້ການຮັກສາມີຄວາມວ່ອງໄວຍິ່ງຂຶ້ນ ພຽງແຕ່ໃຫ້ຄົນເຈັບຮີບກິນຢາໃນທັນທີກໍຈະຊ່ວຍເຮັດໃຫ້ເຊື້ອບັນເທົາການແຜ່ເຊື້ອໃນຮ່າງກາຍລົງໄດ້.
ໃນປັດຈຸບັນມີອາສາສະໝັກຈໍານວນ 95 ຄົນ ໄດ້ເຂົ້າຮ່ວມການທົດລອງວິໄຈ ຜົນປະກົດວ່າຫຼັງຈາກກິນຢາຕ້ານເຊື້ອ HIV ເຂົ້າໄປກໍບໍ່ພົບເຊື້ອພະຍາດຢູ່ໃນເມັດເລືອດຂາວ ອາດຈະມີແຕ່ບາງຄົນເທົ່ານັ້ນ ແຕ່ກໍຖືວ່າມີໜ້ອຍຫຼາຍ. ປັດຈຸບັນໄດ້ມີການລໍຖ້າເບິ່ງອາການຈາກອາສາສະໝັກໃນປີທຳອິດອີກເທື່ອໜຶ່ງ ຖ້າຫາກວ່າເມື່ອໃດທີ່ເຊົາກິນຢາແລ້ວພົບວ່າບໍ່ມີການແຜ່ເຊື້ອອີກ ຈຶ່ງຖືໄດ້ວ່າການວິໄຈນີ້ປະສົບຜົນສໍາເລັດ.
ເຖິງຢ່າງໃດກໍຕາມ, ການວິໄຈໃນຄັ້ງນີ້ກໍຖືວ່າເປັນຂ່າວດີສໍາຫຼັບຜູ້ທີ່ຕິດເຊື້ອໃນໄລຍະເລີ່ມຕົ້ນ ແຕ່ກໍຕ້ອງໄດ້ລົງທຶນໃນການວິໄຈເປັນຈໍານວນຫຼາຍ, ທັ້ງນີ້້ທາງ ຮສ. ຈິນຕະນາດ ຈຶ່ງໄດ້ຂຽນເປັນບົດຄວາມວິຊາການເຜີຍແຜ່ໃນວາລະສານ ນານາຊາດ ເພື່ອຫາແຫຼ່ງທຶນໃນການຕໍ່ຍອດພັດທະນາໃຫ້ງານວິໄຈຄັ້ງນີ້ປະສົບຜົນສໍາເລັດໄດ້ໃນອະນາຄົດ.
ທີ່ມາຈາກ: ຄິດອອກ