ເມື່ອບໍ່ດົນມານີ້ໄດ້ມີເຫດການປະທ້ວງລັດທະບານໃນປະເທດເນປານ ໃນວັນທີ 09/09/2025, ເຊິ່ງສາເຫດແມ່ນເກີດຈາກການອອກມາດຕະການຫ້າມປະຊາຊົນນໍາໃຊ້ສື່ສັງຄົມອອນລາຍ ແລະ ອີກໜຶ່ງສາເຫດຄືລັດຖະບານ ມີການສໍ້ລາດບັງຫຼວງ ເຮັດໃຫ້ຄົນນລຸ້ນໃໝ່ເກີດຄວາມບໍ່ພໍໃຈ.
Nepo Kids ຫຼື ລູກເຈົ້າຫຼານເພິ່ນ ເຊິ່ງປະຊາຊົນວິພາກວິຈານລູກຫຼານນັກງານເມືອງ ເພາະພວກເຂົານັ້ນໄດ້ໃຊ້ຊີວິດຫຼູຫຼາ ແລະ ຟຸມເຟືອຍຜິດປົກກະຕິ.
ກະແສ Nepo Kids ແມ່ນຫຍັງ?
ກະແສ Nepo Kids ແມ່ນການທີ່ບຸກຄົນທີ່ມີອໍານາດທາງການເມືອງ ໃຊ້ຕໍາແໜ່ງຂອງຕົນເອງ ໃນການໃຫ້ສິດທິພິເສດ ຫຼື ຜົນປະໂຫຍດໃຫ້ແກ່ຍາດພີ່ນ້ອງ ແລະ ລູກຫຼານ ຂອງຕົນເອງ, ໂດຍປະຊາຊົນເນປານສ່ວນໃຫຍ່ເຫັນວ່າລູກຫຼານຂອງນັກການເມືອງສ່ວນຫຼາຍແມ່ນມີພຶດຕິກຳການອວດລວຍ, ໃຊ້ຊີວິດຫຼູຫຼາ, ໃຊ້ເງິນຟຸມເຟືອຍ ແລະ ຊື້ເຄື່ອງລາຄາແພງ ເຊິ່ງຂັດກັບສະພາບເສດຖະກິດບ້ານເມືອງຂອງເນປານທີ່ກຳລັງຝືດເຄືອງ.
ພຶດຕິກຳຕ່າງໆເຫຼົ່ານີ້ສະແດງໃຫ້ເຫັນເຖິງຄວາມບໍ່ຍຸດຕິທຳ ແລະ ກາຍມາເປັນຈຸດສະນວນໃນການຕັ້ງຄໍາຖາມຂອງປະຊາຊົນ ເພາະລູກຫຼານນັກການເມືອງ ໃຊ້ຊີວິດສຸກສະບາຍຈາກພາສີ ແລະ ຄວາມລໍາບາກຂອງປະຊາຊົນ.
ດ້ວຍບັນຫາເຫຼົ່ານີ້ ລວມເຖິງການອອກມາດຕະການປິດກັ້ນສື່ອອນລາຍຂອງລັດຖະບານເນປານ ເຮັດໃຫ້ເປັນຈຸດແຕກຫັກ ເຮັດໃຫ້ກຸ່ມຄົນລຸ້ນໃໝ່ລຸກຂຶ້ນມາປະທ້ວງ ຈົນກາຍມາເປັນການປະທ້ວງຮຸນແຮງທີ່ສຸດທີ່ເຄີຍມີມາ.
ສະຖານະການໃນປັດຈຸບັນໃນປະເທດເນປານແມ່ນສະຫງົບງລົງແລ້ວ ໂດຍການເຂົ້າຄວບຄຸມຂອງເຈົ້າໜ້າທີ່, ແຕ່ເນື່ອງຈາກການເຜົາ ແລະ ທຳລາຍ ເຮັດໃຫ້ສະຖານທີ່ສຳຄັນຕ່າງໆ ໄດ້ຮັບຄວາມເສຍຫາຍທັງໝົດ ເບື້ອງຕົ້ນຍັງບໍ່ສາມາດປະເມີນຄວາມເສຍຫາຍໃນຄັ້ງນີ້ໄດ້ ແລະ ຍັງບໍ່ມີກຳນົດໃນການປັບປຸງແກ້ໄຂກ່ຽວກັບສະພາບຄວາມເສຍຫາຍທີ່ເກີດຂຶ້ນ ຈາກພາກສ່ວນທີ່ກ່ຽວຂ້ອງ.