ສະຫຼົດ! ຝູງໂຕສິງລຸມກັດກິນເຈົ້າໜ້າທີ່ສວນສັດຈົນເສຍຊີວິດ ທີ່ສວນສັດແຫ່ງໜຶ່ງໃນກຸງເທບມະຫານະຄອນ ປະເທດໄທ.
ສຳນັກຂ່າວໄທລາຍງານ ວັນທີ 10 ກັນຍາ 2025 ຜ່ານມາ, ກ່ຽວກັບເຫດການສຸດສະຫຼົດ ເມື່ອເຈົ້າທີ່ດູແລສວນສັດ ຖືກຝູງໂຕສິງລຸມກັດກິນ ຢູ່ສວນສັດຊາຟາລີເວີດ ໃນກຸງເທບມະຫານະຄອນ ປະເທດໄທ ເຊິ່ງຢູ່ໃນເຫດການມີເຈົ້າໜ້າທີ່ຮ່ວມງານອີກຄົນພະຍາຍາມບີບແກລົດເພື່ອໄລຝູງສິງໂຕເຫຼົ່ານັ້ນອອກແຕ່ກໍບໍ່ເປັນຜົນ ຂະນະມີນັກທ່ອງທ່ຽວຈຳນວນໜຶ່ງສາມາດຖ່າຍພາບ-ວີດີໂອບັນທຶກເຫດການໄວ້ໄດ້.
ຈາກການສອບສວນຜູ້ເຫັນເຫດການລະບຸວ່າ: ກ່ອນເກີດເຫດຜູ້ເສຍຊີວິດໄດ້ລົງຈາກລົດໂດຍເປີດປະຕູໄວ້ ແລະ ໄດ້ຫັນຫຼັງໃສ່ຝູງໂຕສິງ ກ່ອນທີ່ຈະຖືກສິງໂຕໜຶ່ງທີ່ຢູ່ຫ່າງປະມານ 10 ແມັດໄດ້ໂດດກັດເຈົ້າໜ້າທີ່ຄົນດັ່ງກ່າວຈາກທາງດັ້ານຫຼັງລາກລົງ ແລ້ວໂຕສິງທີ່ເຫຼືອກໍເຂົ້າມາລຸມກັດກິນ ຈົນເສຍຊີວິດ ຂະນະນີ້ຍັງບໍ່ຮູ້ສາເຫດທີ່ຊັດເຈນວ່າເປັນຫຍັງຄືລົງຈາກລົງ ຕ້ອງໄດ້ຖ້າການກວດສອບຫາຂໍ້ເທັດຈິງເພີ່ມຕື່ມ.
ທາງດ້ານເຈົ້າໜ້າທີ່ສວນສັດລາຍໜຶ່ງໄດ້ເປີດເຜີຍວ່າ: ຜູ້ເສຍຊີວິດຊື່ ທ້າວ ຈຽນ ອາຍຸ 58 ປີ ເຮັດວຽກຢູ່ສວນສັດແຫ່ງນີ້ມາດົນນານກວ່າ 30 ປີ, ເຊິ່ງມີໜ້າທີ່ເບິ່ງແຍງ ເສືອ ແລະ ສິງ ມີຄວາມຄຸ້ນເຄີຍກັບສັດເຫຼົ່ານີ້ເປັນຢ່າງດີ ບໍ່ເຄີຍຄາດຄິດວ່າເຫດການຈະເກີດຂຶ້ນເປັນເລື່ອງທີ່ໜ້າຕົກໃຈຫຼາຍ ພ້ອມຍັງລະບຸອີກວ່າ: ເຊິ່ງຕາມລະບຽບແລ້ວເຈົ້າໜ້າທີ່ທຸກຄົນຫ້າມລົງຈາກລົດ ແລະ ຈະຕ້ອງປະຕິບັດໜ້າທີ່ 2 ຄົນສະເໝີເພື່ອຊ່ວຍເຫຼືອກັນ.
ພາຍຫຼັງເກີດເຫດ ສວນສັດໄດ້ປິດໂຊນດັ່ງກ່າວຊົ່ວຄາວ ແລະ ນຳສິງທັງໝົດເຂົ້າກົງຂັງ ພ້ອມຢືນຢັນມີມາດຕະການດູແລນັກທ່ອງທ່ຽວຢ່າງເຂັ້ມງວດ ແລະ ລະບຸວ່າຕະຫຼອດ 40 ປີທີ່ໄດ້ເປີດກິດຈະການຜ່ານມາ, ບໍ່ເຄີຍເກີດເຫດການແບບນີ້ມາກ່ອນ.