ສຳນັກຂ່າວຕ່າງປະເທດ ລາຍງານໃນວັນທີ 6 ເມສານີ້ວ່າ ນັກອະນຸລັກຂອງ ກອງທຶນສັດປ່າສາກົນ ຫລື WWF ໄດ້ອອກມາຍອມຮັບວ່າ ເສືອໃນກຳປູເຈຍໄດ້ສູນພັນໄປແລ້ວ ຈາກການບຸກລຸກ ແລະ ລ່າເສືອຢ່າງໜັກໜ່ວງ ຕະຫລອດໄລຍະຜ່ານມາ ໂດຍເມື່ອກ່ອນປ່າຂອງກຳປູເຈຍ ເປັນເຂດທີ່ຢູ່ອາໄສຂອງເສືອໂຄ່ງພັນອິນໂດຈີນ ຈຳນວນຫລວງຫລາຍ ແຕ່ເສືອໂຕສຸດທ້າຍຂອງກຳປູເຈຍ ແມ່ນສາມາດຈັບພາບໄດ້ ໃນປີ 2007 ຜ່ານມາ.
ແນວໃດກໍຕາມ ລັດຖະບານກຳປູເຈຍ ໄດ້ອະນຸມັດແຜນການນຳເຂົ້າເສືອ ເພື່ອປ່ອຍກັບຄືນສູ່ປ່າສະຫງວນ ຢູ່ແຂວງມົນທົນຄີຣີ ທາງພາກຕາເວັນອອກຂອງປະເທດ ຊຶ່ງເປັນຄວາມພະຍາຍາມ ທີ່ຈະຟື້ນຟູປະຊາກອນເສືອ ໃຫ້ກັບຄືນມາອີກເທື່ອໜຶ່ງ ໂດຍແຜນການດັ່ງກ່າວນີ້ ຈະນຳເຂົ້າເສືອໂຕຜູ້ ຈຳນວນ 2 ໂຕ ແລະ ໂຕແມ່ 6 ໂຕ ໃນຂັ້ນເລີ່ມຕົ້ນ ໂດຍມີການກຳນົດແຫລ່ງອາໄສທີ່ເໝາະສົມ ພ້ອມທັງຈັດຕັ້ງມາດຕະການປ້ອງກັນ ບໍ່ໃຫ້ມີການລ່າສັດ ດ້ວຍການບັງຄັບໃຊ້ກົດໝາຍຢ່າງເຂັ້ມງວດ ຊຶ່ງລັດຖະບານກຳປູເຈຍ ມີຄວາມຕ້ອງການທຶນ ຈຳນວນ 20-50 ລ້ານໂດລາ ສຳລັບໂຄງການດັ່ງກ່າວນີ້.
ການຕັດໄມ້ທຳລາຍປ່າ ແລະ ການລ່າສັດປ່າ ໄດ້ເປັນການທຳລາຍປະຊາກອນຂອງເສືອລົງ ເປັນຈຳນວນມະຫາສານ ທົ່ວທະວີບອາຊີ ໂດຍການປະເມີນຂອງນັກອະນຸລັກລະບຸວ່າ ຈຳນວນປະຊາກອນເສືອທົ່ວໂລກ ປັດຈຸບັນມີພຽງແຕ່ 2,154 ໂຕເທົ່ານັ້ນ.
ປະເທດທີ່ມີປະຊາກອນເສືອ ຊຶ່ງປະກອບດ້ວຍ ບັງກະລາເທດ, ພູຖານ, ຈີນ, ກຳປູເຈຍ, ອິນເດຍ, ອິນໂດເນເຊຍ, ລາວ, ມາເລເຊຍ, ມຽນມາ, ເນປານ, ຣັດເຊຍ, ໄທ ແລະ ຫວຽດນາມ ໄດ້ດຳເນີນແຜນການໃນປີ 2010 ເປັນຕົ້ນມາ ຊຶ່ງກຳນົດເປົ້າໝາຍ ຈະເພີ່ມປະຊາກອນເສືອ ໃຫ້ເພີ່ມຂຶ້ນ 2 ເທົ່າ ພາຍໃນປີ 2022.
.