ເນື່ອງໃນໂອກາດວັນຜູ້ເສຍອົງຄະ ແລະ ພິການແຫ່ງຊາດ ຄົບຮອບ 70 ປີ ກະຊວງແຮງງານ ແລະ ສະຫວັດດີການສັງຄົມ ໄດ້ຈັດງານແຂ່ງຂັນກີລາກ໊ອຟມິດຕະພາບການກຸສົນຂຶ້ນໃນຕອນເຊົ້າວັນທີ 02 ເມສາ 2016 ທີ່ສະໜາມກ໊ອຟລາວຄັນທຣີຄລັບ ຫຼັກ 14 ເມືອງຫາດຊາຍຟອງ ນະຄອນຫຼວງວຽງຈັນ ໂດຍການເປັນປະທານຂອງທ່ານ ດຣ.ຄໍາແພງ ໄຊສົມແພງ ລັດຖະມົນຕີວ່າການກະຊວງແຮງງານ ແລະ ສະຫວັດດີການສັງຄົມ ທ່ານ ດຣ. ສິນລະວົງ ຄຸດໄພທູນ ເຈົ້າຄອງນະຄອນຫຼວງວຽງຈັນ ມີການນໍາພັກ-ລັດ ລັດຖະມົນຕີ ຮອງລັດຖະມົນຕີ ຈາກກະຊວງອ້ອມຂ້າງສູນກາງ ບັນດານັກທຸລະກິດ ນັກລົງທຶນ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ທ່ານລັດຖະມົນຕີວ່າການກະຊວງແຮງງານ ແລະ ສະຫວັດດີການສັງຄົມ ໄດ້ໃຫ້ຮູ້ວ່າ ການຈັດການແຂ່ງຂັນໃນເທື່ອນີ້ ເປັນການລະດົມທຶນຈາກຫຼາຍພາກສ່ວນໃນສັງຄົມ ເພື່ອປະສ່ວນທຶນຮອນໃນການຊ່ອຍເຫຼືອຜູ້ພິການ ແລະ ເສຍອົງຄະ ຮວມທັງຄອບຄົວນັກຮົບປະຕິວັດ ວິລະຊົນແຫ່ງຊາດທີ່ເສຍສະຫຼະຊີວິດເລືອດເນື້ອເພື່ອປະເທດຕະຫຼອດໄລຍະການປະຕິວັດຊາດ ນອກນີ້ ຍັງເປັນການລະດົມທຶນຮອນເພື່ອປະກອບສ່ວນພັດທະນາວຽກງານໃນຂະແໜງສະຫວັດດີການແລະສັງຄົມ ໃຫ້ມີຄວາມເຂັ້ມແຂງຮອບດ້ານ ສໍາລັບການແຂ່ງຂັນກ໊ອຟໃນຄັ້ງນີ້ ກໍໄດ້ມີຫຼາຍພາກສ່ວນນັບທັງສະເໜີເຈດຈໍານົງມອບເງິນຊ່ອຍເຫຼືອແລ້ວຫຼາຍກວ່າ 100 ລ້ານກີບ ແຕ່ກໍຍັງບໍ່ພຽງກັບຄວາມຮຽກຮ້ອງຕ້ອງການພັດທະນາໃນໄລຍະໃໝ່ ຈິ່ງຮຽກຮ້ອງມາຍັງບັນດາພາກທຸລະກິດຕ່າງໆທັງພາກລັດ ເອກະຊົນ ນິຕິບຸກທີ່ມີກໍາລັງແຮງຊັບ ຈົ່ງໄດ້ປະກອບສ່ວນຊ່ອຍເຫຼືອເພື່ອພັດທະນາຊີວິດການເປັນຢູ່ຂອງຄົນພິການ ແລະ ເສຍອົງຄະ ໃຫ້ມີຊີວິດການເປັນຢູ່ນັບມື້ນັບດີຂຶ້ນ.
ຂ່າວ/ພາບ: ເທບພະວົງ
ຂ່າວຈາກ: ວິທະຍຸ- ໂທລະພາບນະຄອນຫຼວງ