ສຳນັກຂ່າວຕ່າງປະເທດ ລາຍງານວ່າ ບໍລິສັດຜະລິດເຮືອບິນ ແອຣ໌ບັສ ໄດ້ເຜີຍແຜ່ພາບ ແນວຄິດການສ້າງເຮືອບິນໃນອານາຄົດ ດ້ວຍການສ້າງຝາກະຈົກໃສ ສາມາດເບິ່ງເຫັນທິວທັດດ້ານນອກ ແບບ 180 ອົງສາ ໂດຍໃນຂະນະຂຶ້ນບິນ ຫລື ລົງຈອດ ເຮືອບິນຈະປິດການເບິ່ງເຫັນຜ່ານກະຈົກໃສ ອີກທັງຍັງສາມາດເປີດ ຫລື ປິດໄດ້ ອີງຕາມສະພາບແສງ ແລະ ອຸນຫະພູມ.
ນອກຈາກສາມາດເບິ່ງເຫັນທິວທັດພາຍນອກໄດ້ແລ້ວ ພາຍໃນເຮືອບິນ ຍັງມີເຄື່ອງອຳນວຍຄວາມສະດວກຕ່າງໆ ທັງຫ້ອງປະຊຸມ, ຫ້ອງອາຫານ ແລະ ຫ້ອງສາຍພາບສົມຈິງ ສຳລັບຫລິ້ນເກມ ຫລື ຕີກ໊ອບອີກດ້ວຍ.
ດ້ານໂຄງສ້າງຂອງເຮືອບິນ ຖືກອອກແບບໃຫ້ແຂງແຮງ ແລະ ປອດໄພ ດ້ວຍການຮຽນແບບ ຈາກຮ່າງກາຍຂອງນົກ ອີກທັງຍັງປະຢັດພະລັງງານເຊື້ອໄຟ ເພື່ອຫລຸດຜ່ອນການກໍ່ມົນລະພິດ ແລະ ສ້າງຜົນເສຍຫາຍໃຫ້ສິ່ງແວດລ້ອມ.
