ສຳນັກງານ​ພາສີ​ອາກອນ​ ສປ ຈີນ ​ເປີດ​ເຜີຍ​​ໃນ​ວັນ​ທີ 8 ມີນາ​ທີ່​ຜ່ານ​ມາ​ວ່າ ການ​ສົ່ງ​ອອກ​ຂອງ​ປະ​ເທດ​ໃນ​ເດືອນ​ກຸມພາ​ທີ່​ຜ່ານ​ມາ ​ຫົດ​ຕົວ​ລົງ​ຫຼາຍ​ກວ່າ​ທີ່​ຄາດ​ຄະ​ເນ​ເອົາ​ໄວ້ ນັບ​ເປັນ​ສັນຍານ​ກາ​ນອ່ອນ​ແອ​ຫຼ້າ​ສຸດ​ຂອງ​ການ​ຄ້າ​ໂລກ ​ແລະ ຄວາມຕ້ອງການ​ຕໍ່​ໂພ​ກພັນ​ໃນ​ປະ​ເທດ​ຍັງ​ງົມເຫງົາ​ຈາກ​ການ​ເສດ​ຖະກິດ​ຂອງ​ຈີນ​ທີ່​ມີ​ຂະໜາດ​​ໃຫຍ່​ຂອງ​ໂລກ​ຫົດ​ຕົວ.

ການ​ສົ່ງ​ອອກ​ຂອງ​ຈີນ​ໃນ​ເດືອນ​ກຸມພາ​ຫຼຸດ​ລົງ 25,4% ​ເມື່ອ​ທຽບ​ກັບ​ໄລຍະ​​ເວລາ​ດຽວ​ກັນ​ຂອງ​ປີ​ທີ່​ຜ່ານ​ມາ ນັບ​ເປັນ​ການ​ຫຼຸດ​ລົງ​ໃນ​ຮອບ 1 ​ເດືອນທີ່​ຮ້າຍ​ແຮງ​ທີ່​ສຸດ​ນັບ​ຕັ້ງ​ແຕ່​ຕົ້ນ​ປີ 2009 ​ແລະ ຫຼຸດ​ລົງ​ຈາກ​ 11,2% ​ໃນ​ເດືອນ​ມັງກອນ​ທີ່​ຜ່ານ​ມາ ພ້ອມ​ທັງ​ຍັງ​ຫຼາຍ​ກວ່າ​ຄ່າ​ສະ​ເລ່ຍ 14,5% ທີ່​ນັກ​ເສດຖະສາດ​ຄາດ​ຄະ​ເນ​ເອົາ​ໄວ້​ໃນ​ຜົນສຳ​ຫຼວດຂອງສຳນັກ​ງານບລູ​ມເບິ​ກ ຂະນະ​ທີ່​ການ​ນຳ​ເຂົ້າ​ຫຼຸດ​ລົງ 13,8% ມາ​ຢູ່​ທີ່ 93,6 ຕື້​ໂດ​ລາ​ສະຫະລັດ ຕໍ່າ​ກວ່າ​ທີ່​ຄາດ​ຄະ​ເນ​ເອົາ​ໄວ້​ເຊັ່ນ​ກັນ ​ໂດຍ​ຜົນສຳ​ຫຼວດຂອງ​ນັກ​ເສດຖະສາດ​ຂອງ​ບລູມ​ເບີກ​ຄາດ​ວ່າ ຈະ​ຫຼຸດ​ລົງ 12% ​ແຕ່​ຍັງ​ຫຼຸດ​ລົງ​ນ້ອຍ​ກວ່າ​ເດືອນ​ມັງກອນ​ທີ່​ຫຼຸດ​ລົງ 18,8% ​ນັບ​ເປັນ​ການ​ຫຼຸດ​ລົງ 16 ​ເດືອນ​ຕິດ​ຕໍ່​ກັນ.

ກອງ​ທຶນ​ການ​ເງິນ​ສາກົນ (​ໄອ​ເອັມ​ເອຟ) ປັບ​ຄາດ​ຄະ​ເນ​ການ​ຄ້າ​ໂລກ​ປະຈຳ​ປີ 2016 ​ແລະ 2017 ຫຼຸດ​ລົງຫຼາຍ​ກວ່າ 0,5% ​ໃນ​ເດືອນ​ມັງກອນ​ທີ່​ຜ່ານ​ມາ ​ໂດຍ​ອ້າງ​ຄວາມ​ງຽບເຫຼງົາ​ຂອງ​ເສດຖະກິດ​ຈີນ, ບຣາຊິນ ​ແລະ ຕາ​ເວັນ​ອອກ​ກາງ.