ສຳນັກຂ່າວຕ່າງປະເທດ ລາຍງານໃນວັນທີ 29 ກຸມພາຜ່ານມານີ້ວ່າ ທາງການນະຄອນຫລວງຈາກາຕາ ປະເທດອິນໂດເນເຊຍ ໄດ້ດຳເນີນການຮື້ຖອນອາຄານ ແຫລ່ງຮ້ານຂາຍບໍລິການທາງເພດ ຫລາຍຮ້ອຍຫລັງ ຢູ່ບໍລິເວນເຂດຄາລິໂດໂຈ ຊຶ່ງການເຄື່ອນໄຫວດັ່ງກ່າວນີ້ ມີຂຶ້ນຫລັງຈາກທີ່ທາງການອິນໂດເນເຊຍ ປະກາດກວາດລ້າງການຄ້າໂສເພນີ ໂດຍໃນນັ້ນໄດ້ສັ່ງປິດໄປແລ້ວເກືອບ 70 ແຫ່ງ ທົ່ວປະເທດ ແລະ ວາງເປົ້າຈະສັ່ງປິດສ່ວນທີ່ຍັງເຫລືອ ອີກກວ່າ 100 ແຫ່ງ ໃຫ້ໄດ້ພາຍໃນປີ 2019.
ທັງນີ້ ເນື່ອງຈາກການຄ້າໂສເພນີ ແມ່ນຖືເປັນສິ່ງທີ່ຜິດກົດໝາຍ ໃນປະເທດອິນໂດເນເຊຍ ຊຶ່ງປະຊາກອນສ່ວນໃຫຍ່ ນັບຖືສາສະໜາອິດສະລາມ ໂດຍການຮື້ຖອນຮ້ານຄ້າໂສເພນີ ເຂດຄາລິໂດໂຈ ດັ່ງກ່າວນີ້ ທາງການນະຄອນຫລວງຈາກາຕາ ມີແຜນຈະສ້າງເປັນສວນສາທາລະນະໃສ່ແທນ ຊຶ່ງປະຊາຊົນທີ່ຖືກຍົກຍ້າຍ ອອກຈາກເຂດດັ່ງກ່າວ ປະມານ 3,000 ກວ່າຄົນ ໄດ້ຖືກຈັດສັນໃຫ້ເຂົ້າອາໄສ ຢູ່ໃນຫ້ອງແຖວທີ່ລັດຖະບານຈັດໄວ້ໃຫ້, ສ່ວນຜູ້ທີ່ເຮັດອາຊີບຂາຍບໍລິການທາງເພດ ນອກຈາກຈະຖືກໄລ່ອອກ ຈາກບໍລິເວນດັ່ງກ່າວແລ້ວ ຍັງຈະໄດ້ຮັບການເຝິກອົບຮົມ ສອນອາຊີບທີ່ໝັ້ນຄົງໃຫ້ອີກດ້ວຍ.