ຈັດພິທີເປີດສວນມິດຕະພາບຊາກຸລະ ລາວ-ຍີ່ປຸ່ນ ທີ່ເມືອງວຽງໄຊ ແຂວງຫົວພັນ ໄດ້ມີຂຶ້ນໃນວັນທີ 12 ກຸມພານີ້ ໂດຍການເຂົ້າຮ່ວມຂອງ ທ່ານ ວັນໄຊ ແພງຊຸມມາ ເຈົ້າແຂວງຫົວພັນ ແລະ ທ່ານ ເຄຊິ ຮິຄິຮາຣະ ເອກອັກຄະຣາຊະທູດຍີ່ປຸ່ນ ປະຈຳ ສປປ ລາວ ພ້ອມຜູ້ຕາງໜ້າ ອົງການຄົນພິການອາຊີ ເພື່ອການພັດທະນາ ແລະ ມວນຊົນຊາວເມືອງວຽງໄຊ ເຂົ້າຮ່ວມຢ່າງຫລວງຫລາຍ.
ທ່ານທູດ ເຄຊິ ຮິຄິຮາຣະ ໄດ້ສະແດງຄວາມຂອບໃຈເປັນຢ່າງສູງ ຕໍ່ຜົນສຳເລັດຂອງການຮ່ວມມື ສ້າງສວນຊາກຸລະດັ່ງກ່າວ ແລະ ໃນປີນີ້ ສປປ ລາວ ໄດ້ຮັບກຽດເປັນປະທານອາຊຽນ ເຊິ່ງເປັນບາດກ້າວໃໝ່ ແຫ່ງການຂະຫຍາຍຕົວທາງດ້ານເສດຖະກິດ ແລະ ສັງຄົມ ພາຍໃຕ້ກອບວຽກຂອງ ແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ໄລຍະໃໝ່. ການເປີດສວນຊາກຸລະໃນປີທີ່ສຳຄັນນີ້ ເປັນສັນຍາລັກແຫ່ງສາຍພົວພັນອັນເລິກເຊິ່ງ ລະຫວ່າງ ລາວ-ຍີ່ປຸ່ນ ແລະ ຫວັງຢ່າງຍິ່ງວ່າ ຕົ້ນຊາກຸລະໃນທີ່ນີ້ ຈະຢັ່ງຮາກ ແລະ ອອກດອກເບັ່ງບານຢ່າງສວຍສົດງົດງາມ ຄືກັນກັບສາຍພົວພັນ ແລະ ມິດຕະພາບອັນແໜ້ນແຟ້ນ ຂອງທັງສອງປະເທດ.
ໂຄງການດັ່ງກ່າວເກີດ ຂຶ້ນຈາກການໂອ້ລົມກັນລະຫວ່າງ ທ່ານ ທອງສິງ ທຳມະວົງ ນາຍົກລັດຖະມົນຕີ ແຫ່ງ ສປປ ລາວ ແລະ ທ່ານ ຊິນໂຊະ ອາເບະ ນາຍົກລັດຖະມົນຕີແຫ່ງ ຍີ່ປຸ່ນ ໃນຂະນະທີ່ຜູ້ນຳຂັ້ນສູງຂອງລາວ ເດີນທາງໄປຢ້ຽມຢາມຍີ່ປຸ່ນ ໃນປີ 2013 ເຊິ່ງໄດ້ຮັບທຶນຊ່ວຍເຫລືອລ້າ ຈາກລັດຖະບານຍີ່ປຸ່ນ ແລະ ໄດ້ເລີ່ມກໍ່ສ້າງ ພາຍຫລັງທີ່ພິທີປູກຕົ້ນຊາກຸລະ ໄດ້ຈັດຂຶ້ນໃນວັນທີ 12 ກຸມພາ 2015.
ໂຄງການປູກຕົ້ນຊາກຸລະ ທີ່ແຂວງຫົວພັນ ແມ່ນໜຶ່ງໃນໂຄງການທີ່ສຳຄັນ ທີ່ຖືກຈັດຕັ້ງປະຕິບັດ ເພື່ອສະເຫລີມ ສະຫລອງວາລະຄົບຮອບ 60 ປີ ແຫ່ງການສ້າງຕັ້ງສາຍພົວພັນທາງການທູດ ຍີ່ປຸ່ນ-ລາວ ໃນປີ 2015 ດ້ວຍການສະໜັບສະໜູນຈາກ ອົງການຄົນພິການອາຊີເພື່ອການພັດທະນາ, ສະມາຄົມມິດຕະພາບ ໄຊຕະມະ-ລາວ ແລະ ອົງການຕ່າງໆຂອງຍີ່ປຸ່ນ ທີ່ເຮັດໃຫ້ຕົ້ນຊະກຸລະ ຈຳນວນ 300 ຕົ້ນ ຖືກປູກຢູ່ສວນສາທາລະນະ ທີ່ໃກ້ກັບ ສວນໄກສອນ ເມືອງວຽງໄຊ ໄດ້ເຕີບໃຫຍ່ ແລະ ສວຍສົດງົດງາມ.
ແຫລ່ງຂ່າວ:
