ວັນທີ 15 ກຸມພາ 2016 ຢູ່ທີ່ສະໂມສອນໂຮງຮຽນທິດສະດີການເມືອງ ແລະ ການປົກຄອງ ນະຄອນຫຼວງວຽງຈັນ (ນວ) ຄະນະໂຄສະນາອົບຮົມ ນວ ໄດ້ຈັດເຝິກອົບຮົມໃຫ້ພະນັກງານຫຼັກແຫຼ່ງທົ່ວ ນວ ກ່ຽວກັບວຽກງານການກະກຽມການເລືອກຕັ້ງສະມາຊິກສະພາແຫ່ງຊາດ ຊຸດທີ VIII ແລະ ສະພາປະຊາຊົນ ນວ (ສສຊ ແລະ ສສຂ) ໂດຍເປັນປະທານຂອງທ່ານ ອຸດອນ ໄຊມົນຕີ ຄະນະປະຈຳພັກ ຫົວໜ້າຄະນະໂຄສະນາອົບຮົມ ນວ ມີທ່ານ ສີຫຸນ ສິດທິລືໄຊ ຮອງເລຂາຄະນະພັກ ນວ ພ້ອມດ້ວຍພະນັກງານຫຼັກແຫຼ່ງອ້ອມຂ້າງ ນວ 500 ກວ່າຄົນເຂົ້າຮ່ວມ.
ໂອກາດດັ່ງກ່າວ ຜູ້ເຂົ້າຮ່ວມໄດ້ຮັບຟັງ ແລະ ແລກປ່ຽນຄຳຄິດເຫັນໃສ່ເນື້ອໃນມະຕິຕົກລົງ ຂອງກົມການເມືອງສູນກາງພັກ ວ່າດ້ວຍການເພີ່ມທະວີການຊີ້ນຳຂອງພັກ ຕໍ່ການເລືອກຕັ້ງ ສສຊ ແລະ ສສຂ ເອກະສານ 40 ປີ ແຫ່ງການປົກປັກຮັກສາ ແລະ ສ້າງສາພັດທະນາປະເທດຊາດ ພາຍໃຕ້ການຊີ້ນຳ-ນຳພາຂອງພັກປະຊາຊົນປະຕິວັດລາວ ເອກະສານການເສີມຂະຫຍາຍສິດເປັນເຈົ້າຂອງປະຊາຊົນ ໃນການເລືອກຕັ້ງ ສສຊ ແລະ ເອກະສານກ່ຽວກັບສະພາແຫ່ງຊາດ ສະພາປະຊາຊົນຂັ້ນແຂວງ.
ສຳລັບການເລືອກຕັ້ງ ສສຊ ຈະໄດ້ຈັດຂຶ້ນໃນວັນທີ 20 ມີນາ 2016 ທີ່ຈະມາເຖິງນີ້ ແມ່ນມີຄວາມໝາຍຄວາມສຳຄັນຍິ່ງ ເນື່ອງຈາກເປັນຄັ້ງທຳອິດທີ່ປະຊາຊົນບັນດາເຜົ່າ ໃນຂອບເຂດທົ່ວປະເທດ ຈະໄດ້ເລືອກຕັ້ງເອົາສະມາຊິກສະພາປະຊາຊົນຂັ້ນທ້ອງຖິ່ນ ເຊິ່ງ ສສຂ ມີສິດ ແລະ ໜ້າທີ່ໃນການພິຈາລະນາຮັບຮອງເອົາຫຼາຍບັນຫາສຳຄັນຂອງຂັ້ນທ້ອງຖິ່ນ ເປັນຕົ້ນແມ່ນ ແຜນພັດທະນາເສດຖະກິດ-ສັງຄົມ ແຜນງົບປະມານແຫ່ງລັດຂັ້ນແຂວງ ຕິດຕາມກວດກາ ການເຄົາລົບ ແລະ ປະຕິບັດລັດຖະທຳມະນູນກົດໝາຍຂອງທ້ອງຖິ່ນ.
ແຫລ່ງຂ່າວ:
