ສຳນັກຂ່າວຕ່າງປະເທດ ລາຍງານໃນວັນທີ 14 ກຸມພາຜ່ານມານີ້ວ່າ ທ່ານ ຫ່າຖິມິ່ງດຶກ ຮອງຜູ້ອຳນວຍການ ສຳນັກງານພົວພັນຕ່າງປະເທດ ກະຊວງແຮງງານ ແລະ ສະຫວັດດີການສັງຄົມຫວຽດນາມ ໄດ້ອອກມາລະບຸວ່າ ແຮງງານທີ່ມີຝີມື ແລະ ຄຸນນະພາບສູງນັ້ນ ການເຄື່ອນຍ້າຍແຮງງານໃນໝູ່ປະເທດອາຊຽນ ໄດ້ເກີດຂຶ້ນແລ້ວ ໂດຍແຮງງານຄຸນນະພາບຕ່ຳຢູ່ຫວຽດນາມ ຈະປະສົບກັບຄວາມກົດດັນຫລາຍຍິ່ງຂຶ້ນ ເນື່ອງຈາກຄຸນນະພາບຂອງ ຊັບພະຍາກອນມະນຸດຫວຽດນາມ ຍັງບໍ່ທັນຢູ່ໃນລະດັບດີເທົ່າທີ່ຄວນ ແລະ ເຊື່ອວ່າການໄຫລອອກຂອງແຮງງານ ຈາກຫວຽດນາມໄປຍັງປະເທດອື່ນໃນອາຊຽນ ຈະເພີ່ມຂຶ້ນຫລາຍກວ່າການໄຫລເຂົ້າມາ ເພາະຄ່າແຮງງານຂອງຫວຽດນາມ ຢູ່ໃນອັນດັບ 8 ຂອງອາຊຽນ.
ກ່ອນໜ້ານີ້ ສູນສະຖິຕິຫວຽດນາມ ໄດ້ອອກມາປະກາດວ່າ ລາຍໄດ້ສະເລ່ຍຂອງແຮງງານຫວຽດນາມ ໃນປີ 2015 ຜ່ານມາ ເທົ່າກັບ 79.3 ລ້ານດົງ ຫລື 3,657 ໂດລາຕໍ່ຄົນຕໍ່ປີ ເຖິງແມ່ນຜະລິດຕະພາບແຮງງານ ຈະເພີ່ມຂຶ້ນ 6.4% ເມື່ອທຽບກັບປີ 2014 ແລະ ເມື່ອປຽບທຽບກັບບັນດາປະເທດອາຊຽນເຫັນວ່າ ຄ່າແຮງງານຂອງຫວຽດນາມ ຍັງຢູ່ໃນລະດັບຕ່ຳ.
ທ່ານ ຫ່າຖິມິ່ງດຶກ ກ່າວອີກວ່າ ຜະລິດຕະພາບແຮງງານ ຍັງຄົງເປັນບັນຫາໃຫຍ່ສຳລັບແຮງງານຫວຽດນາມ ເມື່ອປະຊາຄົມເສດຖະກິດອາຊຽນຕັ້ງຂຶ້ນ ແຮງງານຄຸນນະພາບສູງຈາກປະເທດອື່ນໆໃນພາກພື້ນ ຈະເຄື່ອນຍ້າຍກັນຫລາຍຂຶ້ນ ແລະ ຈະແຂ່ງຂັນໂດຍກົງກັບແຮງງານຫວຽດນາມ.