ນາງ ອາລິຍາ ວົງດາລາ (ປູເປ້) ນັກເທັນນິສເຍົາວະຊົນລາວ ຈາກສະໂມສອນ ເທັນນິສນະຄອນຫລວງ ໄດ້ຂັນຮອງຊະນະເລີດ ການແຂ່ງຂັນເທັນນິສ ລາຍການ ໂຕໂຢຕ້າ ດາວຮຸ່ງມຸ່ງສູ່ໂອແລມປິກ ຮອບມາສເຕີ 2016 ທີ່ ບາງກອກ ປະເທດໄທເປັນເຈົ້າພາບ ເຊິ່ງມີຂຶ້ນໃນລະຫວ່າງວັນທີ 14-18 ມັງກອນ ຜ່ານມາ ທີ່ສະໜາມເທັນນິສ ການ ກິລາແຫ່ງປະເທດໄທ ເຂດຫົວໝາກ ບາງກອກ ປະເທດໄທ.
ການແຂ່ງຂັນດັ່ງກ່າວ ມີນັກກິລາລາວພຽງຄົນດຽວ ເຂົ້າຮ່ວມແຂ່ງຂັນຄື ນາງ ອາລິຍາ ວົງດາລາ ນັກກິລາເທັນນິສຍິງດ່ຽວຮຸ່ນອາຍຸບໍ່ເກີນ 10 ປີ ຈາກສະໂມສອນ ເທັນນິສນະຄອນຫລວງ ໂດຍຢູ່ກຸ່ມ D ທີ່ປະກອບມີ ນາງ ສະລາລີ ສີຈົງ (ຕົວແທນ ຈາກພາກໄຕ້ຂອງໄທ); ນາງ KEILI TESO (ຕົວແທນຈາກພາກກາງຂອງໄທ); ນາງ ມາຫຍາ ບຸນຍາອາລຸນເນດ (ຕົວແທນ ພາກກາງຂອງໄທ) ແລະ ນາງ ກັນຍາພັດ ແກ້ວງາມ (ຕົວແທນ ພາກກາງຂອງໄທ). ຜ່ານການແຂ່ງຂັນ ຜົນປະກົດວ່າ ຮອບແບ່ງກຸ່ມອາລິຍາ ວົງດາລາ ສາມາດຍາດໄດ້ອັນດັບ 1 ຂອງກຸ່ມ D ດ້ວຍການເອົາຊະນະ 4 ນັດລວດ ປະກອບມີ ເອົາຊະນະ ກັນຍາພັດ ແກ້ວງາມ 8-0 ຄະແນນ; ຊະນະ ມາຫຍາບຸນຍາອາລຸນເນດ 8-2 ຄະແນນ; ຊະນະ KEILI TESO 8-2 ຄະແນນ ແລະ ເອົາຊະນະ ສະລາລີ ສີຈົງ 8-3 ຄະແນນ ສົ່ງຜົນໃຫ້ ອາລິຍາ ວົງດາລາ ຜ່ານເຂົ້າໄປຫລິ້ນໃນຮອບຮອງຊະນະເລີດ ພົບກັບ ແຊ໋ມຂອງກຸ່ມ C ໄດ້ແກ່ນາງ ຊຸດຕິການ ຈັນຈະເລີນ (ຕົວແທນຈາກພາກເໜືອຂອງໄທ) ແລະ ກໍ່ສາມາດເອົາຊະນະໄປໄດ້ອີກ 8-1 ຄະແນນ. ຜ່ານເຂົ້າໄປຊີງຊະນະເລີດ ກັບ ແຊ໋ມຂອງກຸ່ມ A ນາງ ອັດສະລາພອນ ໂພສີ ແຕ່ປະກົດວ່າ ທັງ 2 ຄົນຕ້ອງໄດ້ແຂ່ງຂັນກັນຈົນເຖິງເກມທີ 12 ແລະ ອາລິຍາ ວົງດາລາ ເປັນຝ່າຍເສຍໄປ 5-8 ຄະແນນ ໄດ້ຮອງແຊ໋ມ ພ້ອມຮັບເງິນລາງວັນ ປະມານ 6.9 ແສນກີບ (3.000 ບາດ ສະກຸນເງິນໄທ).
ໂອກາດດັ່ງກ່າວ, ທ່ານ ພູເຂົາທອງ ພົມມະວົງ ຜູ້ຈັດການສະໂມສອນ ເທັນນິສນະຄອນ ຫລວງ ໄດ້ກ່າວວ່າ : ຈາກຜົນງານໃນຄັ້ງນີ້ ກ່ອນອື່ນທາງສະໂມສອນ ກິລາເທັນນິສນະຄອນຫລວງ ຂໍສະແດງຄວາມຂອບໃຈມາຍັງ ທາງທີມຄູເຝິກ ທ່ານ ອີຣິກ ປີແອຣັນ ແລະ ທ່ານ ເອກະລາດ ພອນປະເສີດ ທີ່ໄດ້ທຸ້ມເທທັງເຫື່ອແຮງ ແລະ ສະຕິປັນຍາໃນການເຝິກສອນໃຫ້ແກ່ ອາລິຍາ ວົງດາລາ ແລະ ຂໍຂອບໃຈ ມາຍັງທ່ານຜູ້ອຳນວຍການໂຮງຮຽນຊະນະພົນ ທີ່ ອາລິຍາ ວົງດາລາ ຮ່ຳຮຽນຢູ່ໃນປັດຈຸບັນນີ້ ທີ່ໄດ້ອຳນວຍຄວາມສະດວກໃຫ້ແກ່ນັກກິລາພວກເຮົາ ໄດ້ມີເວລາເຝິກຊ້ອມ ແລະ ໄປເຂົ້າຮ່ວມແຂ່ງຂັນຕະຫລອດໄລຍະເວລາທີ່ຜ່ານມາ.
ທີ່ມາ: