ບໍລິສັດ ລາວຟອດຊິຕີ ຕົວແທນຈຳໜ່າຍລົດຟອດລາຍໃຫຍ່ປະຈຳ ສປປ ລາວ ເຫັນໄດ້ຄວາມໝາຍຄວາມສຳຄັນໃນການພັດທະນາຊັບພະຍາກອນມະນຸດເພື່ອກຽມເຊື່ອມໂຍງກັບພາກພື້ນ ແລະ ສາກົນ ເວົ້າລວມ, ເວົ້າສະເພາະແມ່ນຂະແໜງການທ່ອງທ່ຽວ ແລະ ໂຮງແຮມຈຶ່ງໄດ້ມອບທຶນການສຶກສາຈຳນວນ 8 ທຶນ ໃຫ້ກັບນັກສຶກສາ ສະຖາບັນການທ່ອງທ່ຽວ ແລະ ໂຮງແຮມແຫ່ງຊາດ (ລານິດ : LANITH) ມູນຄ່າປະມານ 160 ລ້ານກີບ (20.000 ໂດລາສະຫະລັດ).
ພິທີມອບ-ຮັບທຶນການສຶກສາດັ່ງກ່າວ, ໄດ້ຈັດຂຶ້ນໃນຕອນບ່າຍວັນທີ 13 ມັງກອນຜ່ານມາ, ທີ່ສະຖາບັນການທ່ອງທ່ຽວ ແລະ ໂຮງແຮມແຫ່ງຊາດນະຄອນຫຼວງວຽງຈັນ, ໂດຍຕາງໜ້າກ່າວມອບຂອງທ່ານ ເດວິດລອບລິນຜູ້ຈັດການຝ່າຍຂາຍບໍລິສັດຟອດມໍເຕີພາກພື້ນເອເຊຍ-ແປຊິຟິກ ແລະກ່າວຮັບແມ່ນທ່ານນາງ ສາຍສະຫວັດຈ່າສານຮັກສາການຜູ້ອຳນວຍການສະຖາບັນການທ່ອງທ່ຽວ ແລະ ໂຮງແຮມແຫ່ງຊາດ, ມີຜູ້ຕາງໜ້າຈາກ ບໍລິສັດລາວຟອດຊິຕີ, ພະນັກງານວິຊາການທີ່ກ່ຽວຂ້ອງ, ຄູ-ອາຈານ ແລະນັກສຶກສາເຂົ້າຮ່ວມເປັນສັກຂີພິຍານ.
ໂອກາດນີ້, ທ່ານ ເດວິດລອບລິນກ່າວວ່າ: ເງິນຈຳນວນດັ່ງກ່າວທີ່ມອບໃຫ້ແກ່ສະຖາບັນລານິດ ແມ່ນເປັນທຶນປະຈຳປີຫຼ້າສຸດຂອງໂຄງການອະນຸລັກ ແລະປົກປັກຮັກສາສິ່ງແວດລ້ອມໃນສປປລາວ, ເຊິ່ງສະຖາບັນດັ່ງກ່າວຈະນຳທຶນຈຳນວນນີ້ ເພື່ອນຳໃຊ້ເຂົ້າໃນດ້ານການສຶກສາ ແລະຄວາມຕ້ອງການຂອງຊຸມຊົນ ໂດຍມອບໃຫ້ນັກສຶກສາທີ່ມີຜົນການຮຽນດີ-ຮຽນເກັ່ງ ຈຳນວນ 8 ຄົນ ເພື່ອໃຫ້ເຂົາເຈົ້າໄດ້ເຂົ້າເຖິງການສຶກສາທີ່ມີຄຸນະພາບ ໂດຍຜ່ານເຂົ້າໂຄງການນີ້.
ທ່ານ ເດວິດລອບລິນກ່າວອີກວ່າ: ສຳລັບຂະແໜງການທ່ອງທ່ຽວໃນປັດຈຸບັນເຫັນວ່າມີສັກກະຍະພາບສູງທີ່ຈະເຮັດໃຫ້ອັດຕາການຈ້າງວຽກເຮັດງານທຳເພີ່ມຂຶ້ນໃນສປປລາວ ແລະກໍ່ຜົນສຳຫຼວດກໍ່ ໄດ້ສະແດງໃຫ້ເຫັນວ່າການສ້າງລາຍຮັບໂອຍອຸດສາຫະກຳການທ່ອງທ່ຽວສາມາດເຮັດໃຫ້ມາດຕະຖານຄ່າຄອງຊີບຂຶ້ນດີ ແລະ ເພີ່ມລາຍຮັບເຂົ້າຄອບຄົວເຖິງ 40 ເປີເຊັນ. ທັງນີ້, ສະຖາບັນລານິດ ໄດ້ຮັບການສ້າງຕັ້ງຂຶ້ນເມື່ອປີ 2008 ໂດຍມີຫຼັກສູດປະກາສະນິຍະບັດຕອບສະໜອງກັບຄວາມຮຽກຮ້ອງຕ້ອງການ ໃຫ້ແກ່ພາກອຸດສາຫະກຳການທ່ອງທ່ຽວໃນສປປລາວ.
ຢ່າງໃດກໍ່ຕາມ, ໂຄງການອະນຸລັກ ແລະປົກປັກຮັກສາສິ່ງແວດລ້ອມຂອງບໍລິສັດຟອດມໍເຕີ ໄດ້ຮັບການສ້າງຕັ້ງຂຶ້ນເມື່ອປີ 1983 ໂດຍຟອດໄດ້ມອບທຶນການສຶກສາຫຼາຍຮ້ອຍທຶນໃຫ້ແກ່ນັກສຶກສາໃນ 60 ກວ່າປະເທດທົ່ວໂລກບໍ່ວ່າຈະເປັນທະວີບເອເຊຍ, ຄາລິບຽນ,ອາເມຣິກາກາງ ແລະຕາເວັນອອກກາງ ເປັນຕົ້ນ. ທັງນີ້, ສະເພາະໃນເອເຊຍ-ແປຊິຟິກຟອດກໍ່ໄດ້ໃຫ້ຄວາມສຳຄັນຢ່າງຍິ່ງໃນການຈັດຕັ້ງປະຕິບັດໂຄງການດັ່ງກ່າວ ເພື່ອໃຫ້ເກີດຜົນປະໂຫຍດສູງສຸດ ເຊັ່ນ: ມາເລເຊຍ, ກຳປູເຈຍ, ຮົງກົງ, ລາວ, ມຽນມາ, ອົງໂກນ, ທາຮິຕິ ແລະຟິຈິ.
ໃນໂອກາດດຽວກັນ, ທ່ານ ສາຍສະຫວັດຈ່າສານ ໄດ້ຕາງໜ້າໃຫ້ຄະນະນຳ, ຄະນະອຳນວຍການ, ຄູ-ອາຈານ ແລະນັກສຶກສາໝົດທຸກຄົນພາຍໃນສະຖາບັນລານິດ ເວົ້າລວມ, ເວົ້າສະເພາະແມ່ນນັກສຶກສາທີ່ໄດ້ຮັບທຶນໃນຄັ້ງນີ້ສະແດງຄວາມຂອບໃຈ ແລະຮູ້ບຸນຄຸນຢ່າງສູງຕໍ່ບໍລິສັດຟອດມໍເຕີທີ່ເຫັນ ໄດ້ຄວາມໝາຍຄວາມສຳຄັນໃນການພັດທະຊາຊັບພະຍາກອນມະນຸດ ໃນຂະແໜງການທ່ອງທ່ຽວ ແລະ ໄດ້ນຳເອົາເງິນດັ່ງກ່າວມາມອບໃຫ້ກັບສະຖາບັນຂອງພວກເຮົາ ເພື່ອເປັນທຶນການສຶກສາໃຫ້ແກ່ນັກສຶກສາໄດ້ມີໂອກາດຍົກລະດັບຄວາມຮູ້ຄວາມສາມາດຂອງຕົນ ແລ້ວນຳເອົາຄວາມຮູ້ທີ່ໄດ້ຮຽນມານັ້ນປະກອບສ່ວນຊ່ວຍສ້າງສາພັດທະນາປະເທດຊາດ ແລະຫວັງເປັນຢ່າງຍິ່ງວ່າໃນອະນາຄົດຈະໄດ້ຮັບການຊ່ວຍເຫຼືອຕື່ມອີກ
