ເມື່ອທ້າຍອາທິດຜ່ານມານີ້, ທ່ານຮອງເຈົ້າຄອງນະຄອນຫລວງວຽງຈັນ ສາຍທອງ ແກ້ວດວງດີ ໄດ້ຖະແຫລງຕໍ່ສື່ມວນຊົນກ່ຽວກັບການກະກຽມປະຕິສັງຂອນພະທາດຫລວງວຽງຈັນອັນເປັນມິ່ງຂວັນຂອງປວງຊົນລາວທົ່ວປະເທດ, ເຊິ່ງກ່ອນອື່ນທ່ານໄດ້ກ່າວເຊີນຊວນປະຊາຊົນລາວບັນດາ ເຜົ່າທັງພາຍໃນ ແລະ ຕ່າງປະເທດ, ຈົ່ງໄດ້ພ້ອມກັນປະກອບວັດຖຸປັດໄຈເພື່ອສົມທົບທຶນເຂົ້າໃນການປະຕິສັງຂອນພະທາດສັກສິດດັ່ງກ່າວໃຫ້ມີຄວາມສວຍສົດງົດງາມຢູ່ຄູ່ປະເທດເຮົາໄປຊົ່ວກາລະນານ.
ທ່ານຮອງເຈົ້າຄອງນະຄອນຫລວງກ່າວວ່າ: ພາຍຫລັງໄດ້ຮັບການຕົກລົງເຫັນດີຈາກພັກ ແລະ ລັດຖະ ບານໃນການປະຕິສັງຂອນພະທາດຫລວງວຽງຈັນ,ຄະນະນໍານະຄອນຫລວງວຽງຈັນ, ຈຶ່ງໄດ້ປະສານສົມທົບກັບພາກສ່ວນກ່ຽວຂ້ອງເພື່ອວາງແຜນຈັດຕັ້ງປະຕິບັດການປະຕິສັງຂອນພະທາດດັ່ງ ກ່າວ, ຊຶ່ງຄາດວ່າຈະໃຊ້ຄໍາຫລາຍສີບກິໂລເພື່ອໂອບບໍລິເວນຍອດພະທາດໃຫຍ່ ແລະ ຍອດພະທາດທາດນ້ອຍ (ທາດປາລະມີ) ອ້ອມພະທາດໃຫຍ່ທີ່ມີຫລາຍກວ່າ 30 ພະທາດ, ສ່ວນບໍລິເວນ ອື່ນໆຂອງໂຕພະທາດແມ່ນຈະທາສີຄໍາຄືນໃໝ່, ພ້ອມທັງສ້ອມແປງຈຸດທີ່ເກີດຮອຍແຕກແຫ່ງ ແລະ ລວດ ລາຍຕ່າງໆໃນບໍລິເວນອ້ອມຮອບກົມມະລຽນທີ່ເຫັນວ່າໂຊດໂຊມເກົ່າແກ່ແມ່ນຈະໄດ້ປັບປຸງສ້ອມແປງຄືນໃໝ່, ພ້ອມທັງຕິດຕັ້ງລະບົບໄຟເອ້, ໄຟສະຫວ່າງເພື່ອໃຫ້ມີຄວາມສວຍງາມ.
ທ່ານຮອງເຈົ້າຄອງນະຄອນຫລວງກ່າວວ່າ: ການປະຕິສັງຂອນພະທາດດັ່ງກ່າວຈະເລີ່ມຂຶ້ນທັນທີພາຍຫລັງທີ່ມີງົບປະມານພຽງພໍ, ເຊິ່ງປັດຈຸບັນແມ່ນມີຜູ້ມີຈິດໃຈສັດທາຈໍານວນໜຶ່ງໄດ້ປະກອບ ສ່ວນບໍລິຈາກຄໍາແລ້ວລວມທັງໝົດຈໍານວນ 10 ກິໂລ,12 ບາດແລະ 2 ສະຫລຶງ ແລະ ການປະຕິສັງ ຂອນຄາດວ່າຈະໃຫ້ສໍາເລັດກ່ອນມື້ສະເຫລີມສະຫລອງການສ້າງພະທາດຫລວງວຽງຈັນຄົບຮອບ 450 ປີທີ່ຈະຈັດຂຶ້ນຢ່າງຍິ່ງໃຫຍ່ໃນທ້າຍປີນີ້. ສະນັ້ນ ໃນນາມຕາງໜ້າໃຫ້ອະນຸກໍາມະການປະຕິສັງ ຂອນພະທາດຫລວງຈຶ່ງຂໍເຊີນຊວນປະຊາຊົນລາວບັນດາເຜົ່າທັງພາຍໃນ ແລະ ຕ່າງປະເທດໄດ້ຮ່ວມບໍລິຈາກວັດຖຸ, ເງິນຄໍາ ແລະ ປັດໄຈອື່ນໆຕາມຈິດໃຈສັດທາໄດ້ທີ່ຫ້ອງວ່າການນະຄອນຫລວງວຽງຈັນຫລືພະແນກຖະແຫລງຂ່າວ, ວັດທະນະທໍາ ແລະ ທ່ອງທ່ຽວນະຄອນຫລວງວຽງຈັນໄດ້ຕາມວັນເວລາລັດຖະການ, ເພື່ອປະກອບສ່ວນເຂົ້າໃນການປະຕິສັງຂອນພະທາດຫລວງວຽງຈັນທີ່ສັກສິດຂອງຊາດ, ໂດຍມີສາລີລິຄະທາດຂອງພະພຸດທະເຈົ້າຢູ່ພາຍໃນທາດດັ່ງກ່າວເພື່ອໃຫ້ມີຄວາມຮຸ່ງເຮືອງສວຍງາມເປັນມິງຂວັນຂອງປະຊາຊົນລາວໄປຊົ່ວກາລະນານ.
ໃນໂອກາດດຽວກັນ, ທ່ານຮອງເຈົ້າຄອງນະຄອນຫລວງວຽງຈັນຍັງໄດ້ແຈ້ງໃຫ້ຊາບກ່ຽວຄວາມຄືບໜ້າຂອງການປະຕິສັງຂອນພິພິທະພັນວັດຫໍພະແກ້ວ, ເຊິ່ງມາຮອດປັດຈຸບັນຖືວ່າການປະຕິສັງຂອນຍອດຊໍ່ຟ້າ, ເຊິ່ງເປັນໄລຍະທໍາອິດແມ່ນສໍາເລັດແລ້ວ ແລະ ຈະມີພິທີເຮັດບຸນໃສ່ບາດຖວາຍສັງຄະທານໃນວັນທີ 21 ມັງກອນນີ້. ດັ່ງນັ້ນຈຶ່ງຂໍເຊີນມວນຊົນທີ່ໄດ້ປະກອບສ່ວນວັດຖຸປັດໃຈໃນການປະຕິສັງຂອນວັດດັ່ງກ່າວຈົ່ງໄດ້ໄປຢ້ຽມຊົມເບິ່ງຄວາມສວຍງາມພາຍຫລັງການສ້ອມແປງໃນໄລຍະທໍາອິດທີ່ຕົນໄດ້ມີສ່ວນຮ່ວມໃນຄັ້ງນີ້.
ແຫ່ລງຂ່າວ
