ໂຄງການປະຕິສັງຂອນຫໍພຣະແກ້ວ ໄລຍະທີ I ຊຶ່ງດຳເນີນມາແຕ່ປີ 2015 ປະສົບຜົນສຳເລັດຕາມຄາດໝາຍ ແລະ ກ່ອນຈະເຂົ້າສູ່ການປະຕິສັງຂອນໃນໄລຍະທີ II ແລະ ທີ III ນັ້ນ ທາງຄະນະຮັບຜິດຊອບໂຄງການກໍໄດ້ ແຈ້ງຂ່າວບຸນເຖິງມວນຊົນທົ່ວໄປ ຈົ່ງຮ່ວມສ້າງບຸນກຸສົນ ຕັກບາດ ຖະຫວາຍທານເພື່ອສະສົມປາລະມີ ແລະ ເອກອ້າງໃນອະລະຍະທຳລ້ຳຄ່າທີ່ບັນພະບຸລຸດລາວໄດ້ປົກປັກຮັກສາໄວ້ເຖິງເຊັ່ນລູກເຊັ່ນຫຼານ ໂດຍຈະມີພິທີຄົບງັນ ແລະ ຕັກບາດທີ່ເດີ່ນຫໍພຣະແກ້ວ ໃນວັນທີ 21-22 ມັງກອນ 2016 ກົງກັບມື້ຂຶ້ນ 14 ຄ່ຳ ແລະ ວັນເພັງ 15 ຄ່ຳເດືອນ 3 ລາວ.
ທ່ານ ສາຍທອງ ແກ້ວດວງດີ ຮອງເຈົ້າຄອງນະຄອນຫຼວງວຽງຈັນ ຄະນະຮັບຜິດຊອບໂຄງການປະຕິສັງຂອນ ຫໍພຣະແກ້ວ ໄດ້ຖະແຫຼງຂ່າວບຸນຜ່ານສື່ມວນຊົນເມື່ອອາທິດທີ່ຜ່ານມາວ່າ ຄະນະຮັບຜິດຊອບປະຕິສັງຂອນຫໍພຣະແກ້ວ ກໍຄືພະແນກຖະແຫຼງຂ່າວວັດທະນະທຳ ແລະ ທ່ອງທ່ຽວ ນະຄອນຫຼວງວຽງຈັນ ພວມຢູ່ໃນຂັ້ນຕອນຫ້າງຫາ ກະກຽມ ເພື່ອສະເຫຼີມສະຫຼອງຜົນສຳ ເລັດໃນການປະຕິສັງຂອນຫໍພຣະແກ້ວໄລຍະທີ I ຕາມວາລະທີ່ລະບຸໄວ້ຂ້າງເທິງ ຊຶ່ງຖືເປັນເລີກງາມຍາມດີ ແລະ ຈະມີການຄົບງັນ ຕັກບາດ ຖວາຍທານ ຕາມຮີດຄອງປະເພນີ ສ່ວນໄລຍະທີ II ທີ III ແມ່ນຍັງຢູ່ໃນຂັ້ນຕອນໃຫ້ນາຍຊ່າງປະເມີນຄ່າຊ່າງກ່ອນຈະລົງມືປະຕິບັດໃຫ້ທັນສະເຫຼີມສະຫຼອງໃນເດືອນ 6 ເພັງຂອງປີນີ້ ສ່ວນການບໍລິຈາກແມ່ນຍັງເປີດໃຫ້ພໍ່ແມ່ປະຊາຊົນ ຮ່ວມສົມທົບທຶນຊຶ່ງຈະມີງົບປະມານຂອງລັດຖະບານປະກອບໃຫ້ດ້ວຍ.
ສຳລັບໄລຍະທີ I ຂອງການປະຕິສັງຂອນຫໍພຣະແກ້ວ ແມ່ນນຳໃຊ້ງົບປະມານໄປແລ້ວ ຈຳນວນ 6 ຕື້ກວ່າກີບ ຊຶ່ງໄດ້ບູລະນະຄືນໃໝ່ ນັບແຕ່ຍອດຊໍ່ ຟ້າລົງມາຮອດຖ້ານຕີນ ສ່ວນໄລຍະທີ II ແລະທີ III ຈະເປັນການຕິດຄຳປີວ ດ້ານໃນດ້ານນອກ ແລະ ລາຍລະອຽດຕ່າງໆພາຍໃນຫໍພຣະແກ້ວ ເພື່ອໃຫ້ມີຄວາມສວຍສົດງົດງາມ ແຕ່ຄົງໄວ້ເອກະລັກດັ່ງເດີມ.
ໃນວາລະດຽວກັນທ່ານຮອງເຈົ້າຄອງນະຄອນຫຼວງວຽງຈັນ ກໍໄດ້ແຈ້ງຕື່ມຂ່າວບຸນເຖິງມວນຊົນທັງພາຍໃນ ແລະ ຕ່າງປະເທດທີ່ມີຈິດໃຈໃສສັດທາເພື່ອສົມທົບທຶນໃນການປະຕິສັງຂອນພຣະທາດຫຼວງ ນັບແຕ່ຍອດລົງມາຫາກົມມະລຽນເພື່ອສະເຫຼີມສະຫຼອງພຣະທາດຫຼວງ ຄົບຮອບ 450 ປີ ໃນທ້າຍປີ 2016 ນີ້ ດັ່ງນັ້ນ ຈິ່ງຂໍເຊີນຊວນຜູ້ທີ່ມີຈິດໃຈໃສສັດທາມາຮ່ວມບໍລິຈາກສົມທົບທຶນຈະເປັນເງິນ ຫຼື ຄຳກໍດີ ຊຶ່ງຈະໄດ້ນຳໄປໂອບຍອດຊໍ່ຟ້າປະຈຸບັນມີຍອດບໍລິຈາກແລ້ວ ເປັນຄຳ 10 ກິໂລກຣາມ 12 ບາດ ແລະ 2 ສະຫຼຶງ ທ່ານໃດ ຫຼື ພາກສ່ວນໃດທີ່ຕ້ອງການບໍລິຈາກສາມາດຕິດຕໍ່ພົວ ພັນໄດ້ທີ່ກອງເລຂາ ພະແນກຖະແຫຼງ ຂ່າວ ວັດທະນະທຳ ແລະ ທ່ອງທ່ຽວ ນະຄອນຫຼວງວຽງຈັນ ຕາມໂມງເວລາລັດຖະການ.
ທີ່ມາ:
