ງານມະຫາກຳກິລາມະຫາວິທະຍາໄລລາວ ຄັ້ງທີ I ປະຈຳປີ 2016 ຈະເປີດສາກຂຶ້ນໃນລະຫວ່າງວັນທີ 5-15 ມີນາ ຈະເຖິງນີ້. ເຊິ່ງຈະທຳການແຂ່ງຂັນທັງໝົດ 11 ປະເພດກິລາ. ຂະນະທີ່ ນົກອິນຊີ ໄດ້ຮັບເລືອກເປັນສັດນຳໂຊກ.
ເມື່ອວັນທີ 8 ມັງກອນ ຜ່ານມາ ທີ່ສຳນັກງານອະທິການບໍດີ ມະຫາວິທະຍາໄລແຫ່ງຊາດ (ມຊ) ບ້ານດົງໂດກ ເມືອງໄຊທານີ ນະຄອນຫຼວງວຽງຈັນ ໄດ້ມີການເປີດກອງປະຊຸມປຶກສາຫາລື ແລະ ຮັບຟັງການ ລາຍງານຄວາມຄືບໜ້າໃນການກະກຽມຄວາມພ້ອມ ການຈັດງານມະຫາກຳກິລາມະຫາວິທະຍາ ໄລ ລາວ ຄັ້ງທີ I ປະຈຳປີ 2016 ຂຶ້ນ ພາຍໃຕ້ການເປັນປະທານຂອງທ່ານ ບົວລານ ສິລິປັນຍາ ລັດຖະມົນຕີຊ່ວຍວ່າການກະຊວງ ສຶກສາທິການ ແລະ ກິລາ ທັງເປັນປະທານຊີ້ນຳງານມະຫາກຳກິລາມະຫາວິທະຍາໄລລາວ ຄັ້ງທີ I, ທ່ານ ສຈ.ດຣ ສຸກກົງແສງ ໄຊຍະເລີດ ອະທິການບໍດີມະຫາວິທະຍາໄລແຫ່ງຊາດ ທັງເປັນປະທານຈັດງານ, ມີອະທິການບໍດີມະຫາວິທະຍາໄລສະຫວັນນະເຂດ, ຫຼວງພະບາງ ແລະ ຈຳປາສັກ, ມີບັນດາຄະນະອະທິການບໍດີ, ຄະນະບໍລິຫານງານ, ຄະນະກຳມະ ການ, ອະນຸກຳມະການແຕ່ລະພາກສ່ວນ ແລະ ບັນດາແຂກຈາກພາກສ່ວນຕ່າງໆທີ່ກ່ຽວຂ້ອງ ເຂົ້າຮ່ວມຢ່າງ.
ໂອກາດດັ່ງກ່າວ, ທ່ານ ຮສ.ດຣ ອະນຸໂລມ ວິໄລພອນ ຫົວໜ້າກຳມະການກອງເລຂາງານມະຫາກຳກິລາມະຫາວິທະຍາໄລລາວ ຄັ້ງທີ I ໄດ້ລາຍງານຄວາມຄືບໜ້າໃນການກະກຽມຈັດງານດັ່ງກ່າວ ໃນລະຫວ່າງວັນທີ 5-15 ມີນາ 2016. ເຊິ່ງຈະທຳການແຂ່ງຂັນທັງໝົດ 11 ປະເພດກິລາ ປະກອບມີ ແລ່ນ-ລານ, ເຕະບານ, ບານສົ່ງ, ບານສົ່ງຫາດຊາຍ, ບານບ້ວງ, ກະຕໍ້, ເປຕັງ, ເທຄວັນໂດ, ປິ່ງປ່ອງ, ດອກປີກໄກ່ ແລະ ຟຸດຊໍ. ສ່ວນງານຄັ້ງນີ້ ແມ່ນເລືອກເອົາ ນົກອິນຊີ ເປັນສັດນຳໂຊກເຊິ່ງມີຄວາມໝາຍເຖິງ “ຊາວໜຸ່ມ ປຽບເໜືອນນົກອິນຊິ ທີ່ບໍ່ຫວັ່ນກົວຕໍ່ພະຍຸລົມແດງ ຈົ່ງກາຍເປັນສິນໄຊແຫ່ງຍຸກສະໄໝ”. ນອກຈາກນັ້ນ ທ່ານຍັງລາຍງານແບບບັດຄ້ອງຄໍ ພ້ອມສາຍຄ້ອງບັດ, ຟອມຂໍຖືບັດ, ຟອມນັກກິລາແຕ່ລະປະເພດ, ໃບຢັ້ງຢືນສະຖິຕິ, ໃບຢັ້ງຢືນການເຂົ້າຮ່ວມ, ຫຼຽນລາງວັນ ພ້ອມສາຍຄ້ອງຫຼຽນ ແລະ ແບບສັດນຳໂຊກແຕ່ລະປະເພດກິລາ.
ໃນໂອກາດດຽວກັນ ທ່ານ ບົວລານ ສິລິປັນຍາ ກ່າວ່າ : ກອງປະຊຸມຄັ້ງນີ້ ຖືວ່າເປັນກອງປະຊຸມຂອງຄະນະຊີ້ນຳລວມຄັ້ງທີ II ເພື່ອກະກຽມຄວາມພ້ອມການເຂົ້າຮ່ວມ ແລະ ຊີ້ນຳວຽກໃນແຕ່ລະດ້ານໃຫ້ໃຫ້ກ້າວໄປຕາມແຜນການທີ່ວາງໄວ້ ໂດຍມີການປະສານສົມທົບກັບແຕ່ລະຝ່າຍຢ່າງມີເປົ້າໝາຍ ຄື: ຈັດຕັ້ງປະຕິບັດໃຫ້ປະສົບຜົນສຳເລັດ ທັງດ້ານເນື້ອໃນ, ພິທີການ, ສ້າງສັນສາຍສຳພັນຄວາມສາມັກຄີ ລະຫວ່າງມະຫາວິທະຍາໄລ, ສະຖາບັນ, ວິທະຍາຄານ, ວິທະຍາໄລ ໃຫ້ແໜ້ນແຟ້ນກວ່າເກົ່າ, ນຳໃຊ້ງົບປະມານແບບປະຢັດເທົ່າທີ່ຈະເປັນໄປໄດ້, ຮັບປະກັນໄດ້ຄວາມສະຫງົບປອດໄພ 100 ສ່ວນຮ້ອຍ, ການແຂ່ງຂັນຕ້ອງມີຄວາມປອດໄສ, ເປັນທຳ, ຫຼີກລ່ຽງປະກົດການຫຍໍ້ທໍ້ທີ່ອາດເກີດຂຶ້ນ ແລະ ການໂຄສະນາ ປະຊາສຳພັນ ແຈ້ງຂໍ້ມູນຂ່າວສານໃຫ້ມີລັກສະນະກວ້າງ ໃຫ້ສັງຄົມຮັບຮູ້ຢ່າງທົ່ວເຖິງ.