ຂປລ. ທ່ານ ຄຳປ່ຽນ ອິນທະລືຊາ ຮອງປະທານອົງການພັດທະນາ ແລະ ບໍລິຫານຕົວເມືອງວຽງຈັນ ຊີ້ແຈງວ່າ: ເນື່ອງຈາກຄົນໃນສັງຄົມ ຖືວ່າວຽກອະນາໄມຕົວເມືອງ ເປັນຕົ້ນ: ເກັບມ້ຽນຂີ້ເຫຍື້ອ, ປັດກວາດຖະໜົນຫົນທາງ, ຕັດຫຍ້າ, ບົວລະບັດຕົ້ນໄມ້ ແລະ ອື່ນໆເປັນວຽກຕ່ຳຕ້ອຍ ຫລື ບໍ່ມີຄົນສົນໃຈເຂົ້າມາເຮັດ ເຖິງວ່າຈະມີລາຍໄດ້ແນ່ນອນຢ່າງຕ່ຳເດືອນລະ 1 ລ້ານກີບ ກໍຕາມ. ຜ່ານມາກໍເຄີຍປະກາດຮັບສະໝັກເອົາພະນັກງານ ແຕ່ຜູ້ສົນໃຈຈະເຂົ້າມາສະໝັກມີໜ້ອຍ, ຜູ້ທີ່ເຂົ້າມາສະໝັກສ່ວນຫລາຍແມ່ນຜູ້ມີອາຍຸສູງ, ເມື່ອເປັນດັ່ງນັ້ນ ກໍຈຳເປັນຕ້ອງໄດ້ຮັບ ແຕ່ບາງຄົນມາເຮັດວຽກບໍ່ຮອດເດືອນກໍອອກ ສະນັ້ນ, ຈຶ່ງມີຄວາມຫຍຸ້ງຍາກໃນການຊອກຫາແຮງງານເຂົ້າໃນວຽກງານອະນາໄມດັ່ງກ່າວ.
ຕໍ່ກັບບັນຫານີ້, ທ່ານ ຮອງປະທານອົງການພັດທະນາ ຈຶ່ງໄດ້ຮຽກຮ້ອງໃຫຸ້ກຄົນໃນສັງຄົມມີສ່ວນຮ່ວມ ໃນການອະນາໄມຕົວເມືອງ ໃຫ້ມີຄວາມສະອາດສວຍງາມ ໂດຍສະເພາະ ແມ່ນຜູ້ທີ່ມີເຮືອນຢູ່ແຄມທາງ, ລວມເຖິງສະມາຄົມຂົນສົ່ງ ຫີນ-ຊາຍ ແລະ ຜູ້ປະກອບການຕ່າງໆ ຕະຫລອດຮອດຜູ້ໃຊ້ລົດໃຊ້ຖະໜົນ ຈົ່ງເອົາໃຈໃສ່ໃນການຮັກສາຄວາມສະອາດຊ່ວຍກັນ ໃຫ້ຖືວ່າວຽກດັ່ງກ່າວ ເປັນໜ້າທີ່ຂອງໝົດທຸກຄົນ ຖ້າຕົວເມືອງສະອາດງາມຕາ ກໍຈະເປັນໃບໜ້າອັນດີ ໃນການຕ້ອນຮັບແຂກບ້ານແຂກເມືອງເຂົ້າມາປະເທດເຮົານັບມື້ຫລາຍຂຶ້ນ.
ພ້ອມນີ້ ທ່ານ ຍັງຍົກໃຫ້ເຫັນວ່າ: ນອກຈາກບັນຫາແຮງງານທີ່ມີຄວາມຫຍຸ້ງຍາກແລ້ວ ການຊອກຫາແຫລ່ງນ້ຳທີ່ສະອາດ ເພື່ອໃຊ້ເຂົ້າໃນການລ້າງທາງ, ຫົດດອກໄມ້ ແລະ ຫຍ້າ ຍັງບໍ່ມີສະຖານທີ່ແນ່ນອນ ເມື່ອຮອດລະດູແລ້ງແມ່ນບໍ່ມີແຫລ່ງນ້ຳທີ່ຈະນຳໃຊ້ໃນວຽກງານດັ່ງກ່າວແລ້ວ. ເຊິ່ງເປັນໜ້າວຽກທີ່ຂະແໜງກ່ຽວຂ້ອງຈະຕ້ອງໄດ້ຮີບຮ້ອນແກ້ໄຂ.
ແຫລ່ງຂ່າວ:
