ສຳນັກຂ່າວຕ່າງປະເທດ ລາຍງານໃນວັນທີ 23 ພະຈິກນີ້ວ່າ ໃນມື້ວານນີ້ (22 ພະຈິກ) ເຮືອບິນໂດຍສານ ສາຍການບິນ ເຕີກິດ ແອຣ໌ລາຍ ຊຶ່ງກຳລັງເດີນທາງ ຈາກນະຄອນນິວຢອກ ປະເທດສະຫະລັດອາເມຣິກາ ໄປຍັງນະຄອນອິດສະຕັນບູນ ປະເທດຕວກກີ ພ້ອມດ້ວຍຜູ້ໂດຍສານ ແລະ ລູກເຮືອ 256 ຄົນ ຕ້ອງໄດ້ປ່ຽນເສັ້ນທາງ ໄປລົງຈອດທີ່ ສະໜາມບິນສາກົນ ຮາລິແຟັກ ສະແຕນຟິວ ໃນລັດໂນວາສະໂກເຊຍ ທາງພາກຕາເວັນອອກຂອງ ປະເທດກາດານາແທນ ຫລັງຈາກທີ່ເຮືອບິນລຳດັ່ງກ່າວ ຖືກຂູ່ວາງລະເບີດ.

ຕຳຫລວດການາດາລະບຸວ່າ ຄຳຂູ່ດັ່ງກ່າວ ຖືກສົ່ງມາໃນເວລາປະມານ 10:50 ໂມງ ຕາມເວລາໃນທ້ອງຖິ່ນ ພາຍຫລັງມີການກວດຄົ້ນແລ້ວ ແມ່ນບໍ່ພົບວັດຖຸລະເບີດ ແຕ່ຢ່າງໃດ ໂດຍປັດຈຸບັນ ຕຳຫລວດກຳລັງສືບວນ ແລະ ຫາຕົວຜູ້ຢູ່ເບື້ອງຫລັງ ຂອງການສົ່ງຄຳຂູ່ດັ່ງກ່າວ.