“ການຄິດຫາວິທີແກ້ໄຂບັນຫານັ້ນ ຈະຕ້ອງໃຊ້ຄວາມຄິດສ້າງສັນຢ່າງເຕັມທີ່ ເພື່ອຫາວິທີທີ່ມີຄວາມແຕກຕ່າງ ແລະ ຫຼາກຫຼາຍ ໂດຍຄວນຈະວິເຄາະຫາສາເຫດທີ່ແທ້ຈິງກ່ອນ ແລ້ວພະຍາຍາມໃຊ້ຄວາມຄິດສ້າງສັນຊອກຫາວິທີແກ້ໄຂໄວ້ຫຼາຍໆ”
ການຄິດຫາວິທີແກ້ໄຂບັນຫານັ້ນ ຈະຕ້ອງໃຊ້ຄວາມຄິດສ້າງສັນຢ່າງເຕັມທີ່ ເພື່ອຫາວິທີທີ່ມີຄວາມແຕກຕ່າງ ແລະ ຫຼາກຫຼາຍ ໂດຍຄວນຈະວິເຄາະຫາສາເຫດທີ່ແທ້ຈິງກ່ອນ ແລ້ວພະຍາຍາມໃຊ້ຄວາມຄິດສ້າງສັນຊອກຫາວິທີແກ້ໄຂໄວ້ໃຫ້ຫຼາຍ ຢ່າງໜ້ອຍ 20 ວິທີ ຊຶ່ງມີຫຼັກງ່າຍໆໃຫ້ເຮົາຄິດໄດ້ຫຼາຍຂຶ້ນດັ່ງນີ້:
ພະຍາຍາມຄິດນອກກອບປະສົບການ ແລະ ຄວາມຊຳນານທີ່ເຮົາມີຢູ່ ໃຫ້ຄວາມສຳຄັນກັບທຸກຄວາມຄິດ ຫຼື ທຸກໆວິທີເທົ່າໆກັນ ຫຼີກລ້ຽການວິພາກວິຈານ ຫຼື ຕັດສິນຄວາມຄິດໃໝ່ໆ ທີ່ຫາກໍ່ຄິດອອກ ແຕ່ຄວນໃຊ້ຄວາມຄິດນັ້ນເປັນຕົວກະຕຸ້ນໃຫ້ເກີດຄວາມຄິດສ້າງສັນ ເພື່ອຫາວິທີແກ້ໄຂທີ່ຕໍ່ເນື່ອງຈາກຄວາມຄິດນັ້ນ ເຖິງວ່າຈະຄິດຫາທາງແກ້ໄດ້ດີທີ່ສຸດແລ້ວກໍ່ບໍ່ຄວນຢຸດຄວາມພະຍາຍາມທີ່ຈະຄິດຫາວິທີຕໍ່ໄປ ພະຍາຍາມສ້າງຄວາມເຂົ້າໃຈກ່ຽວກັບວິທີແກ້ທຸກວິທີໃຫ້ຊັດເຈນ ເພາະຈະຊ່ວຍເຮັດໃຫ້ເຮົາເກີດຄວາມຄິດໃໝ່ໆຂຶ້ນມາໄດ້
- Mind Mapping ແຜນທີ່ຄວາມຄິດເພື່ອແກ້ໄຂບັນຫາ
ການເຮັດແຜນທີ່ຄວາມຄິດ ຫຼື Mind Mapping ຖືເປັນການກະຕຸ້ນສະໝອງໃຫ້ເກີດຄວາມຄິດທີ່ເປັນອິດສະຫຼະຈາກບັນຫາທີ່ເປັນສູນກາງ ອອກໄປສູ່ວິທີແກ້ບັນຫາຕ່າງໆ ທີ່ແປກ ແລະ ແຕກຕ່າງຈາກເກົ່າ ຊຶ່ງສາມາດເຮັດໄດ້ໂດຍເລີ່ມຈາກການຂຽນສາເຫດຂອງບັນຫາໄວ້ກາງໜ້າເຈ້ຍ ແລ້ວຂີດເສັ້ນເຊື່ອມຕໍ່ອອກມາຮອບໆ ຖ້າຄິດວິທີແກ້ໄຂໄດ້ ກໍ່ໃຫ້ຂຽນວິທີນັ້ນໄວ້ເທິງເສັ້ນທີ່ຫາກໍ່ຂີດອອກມາ ຖ້າຄວາມຄິດໃດສຳພັນ ຫຼື ສະໜັບສະໜູນວິທີແກ້ໄຂທີ່ມີຢູ່ແລ້ວ ກໍ່ໃຫ້ຕື່ມຄວາມຄິດໃໝ່ນັ້ນຕໍ່ອອກມາຈາກວິທີແກ້ເກົ່າ ດ້ວຍການຂີດເສັ້ນຍ່ອຍອອກຈາກເສັ້ນຫຼັກແລ້ວຂຽນຄວາມຄິດໃໝ່ລົງໄປ ເມື່ອເຮົາໄດ້ຄວາມຄິດໃໝ່ໆທີ່ຫຼາກຫຼາຍແລ້ວ ກໍ່ສາມາດນຳຄວາມຄິດເຫຼົ່ານັ້ນໄປໃຊ້ໃນຂັ້ນຕອນຂອງການວາງແຜນແກ້ໄຂບັນຫາໄດ້
- Brainstorming ລະດົມສະໝອງເພື່ອແກ້ໄຂບັນຫາ
ການລະດົມສະໝອງ ຫຼື Brainstorming ຄືການລະດົມຄວາມຄິດຈາກຫຼາຍໆຄົນ ເພື່ອຄິດຫາສາເຫດ ແລະ ວິທີແກ້ໄຂບັນຫາທີ່ຖືກຕ້ອງ ເໝາະສົມ ແລະ ໄດ້ຜົນດີ ຊຶ່ງຈຳເປັນຕ້ອງມີການວາງກົດພື້ນຖານໃນການລະດົມສະໝອງໄວ້ ເພື່ອເປັນກອບ ຫຼື ແນວທາງພື້ນຖານເຊັ່ນ: ບໍ່ມີການວິພາກວິຈານ ຫຼື ຕັດສິນວ່າຄວາມຄິດໃດດີ ຫຼື ບໍ່ດີ ຖ້າໃຜຄິດວິທີການຫຍັງໄດ້ຕ້ອງກ້າເວົ້າອອກມາ ແລະ ຢ່າອາຍທີ່ຈະນຳຄວາມຄິດຂອງຄົນອື່ນມາປະສົມປະສານກັບຄວາມຄິດຂອງຕົນ ເພື່ອສ້າງເປັນຄວາມຄິດໃໝ່ ນອກຈາກນີ້ຍັງຕ້ອງມີການວາງຂັ້ນຕອນໃນການລະດົມສະໝອງໃຫ້ເປັນລຳດັບເຊັ່ນ: ກຳໜົດເວລາໃນການລະດົມສະໝອງ ກຳນົດໃຫ້ມີຄົນຈົດວິທີແກ້ບັນຫາ ຂຽນສາເຫດຂອງບັນຫາທີ່ຕ້ອງການຈະແກ້ໃຫ້ເຫັນຊັດເຈນ ແລະ ໃຫ້ ສະມາຊິກທຸກຄົນສະແດງຄວາມຄິດເຫັນລຽງກັນໄປເທື່ອລະຄົນ ທີ່ສຳຄັນຕ້ອງຈົດທຸກຄວາມຄິດ ບໍ່ວ່າຈະແປກປະຫຼາດຂະໜາດໃດກໍ່ຕາມ ເພື່ອນຳໄປປະເມີນ ແລະ ຄັດເລືອກໃນພາຍຫຼັງ
- Modified Delphi ເທັກນິກເພື່ອແກ້ໄຂບັນຫາ
ເທັກນິກໂມດິຟາຍດ໌ ເດລຟີ ເໝາະກັບທີມງານທີ່ມີສະມາຊິກບໍ່ຄ່ອຍມັກເວົ້າ ຫຼື ບາງຄົນເວົ້າຈົນບໍ່ເປີດໂອກາດໃຫ້ຄົນອື່ນເວົ້າ ເທັກນິກນີ້ມີຂະບວນການງ່າຍໆ ດັ່ງນີ້: ເລີ່ມຈາກໃຫ້ຫົວໜ້າທີມ ຫຼື ຜູ້ປະສານງານແຈ້ງ ຫຼື ທົບທວນສາເຫດ ຜົນການວິເຄາະ ແລະ ຂໍ້ມູນຕ່າງໆກ່ຽວກັບບັນຫາທີ່ເກີດຂຶ້ນ ໃຫ້ທຸກຄົນຮູ້ ຈາກນັ້ນກໍ່ແຈກເຈ້ຍເປົ່າ ເພື່ອໃຫ້ສະມາຊິກທຸກຄົນຂຽນວິທີແກ້ບັນຫາຢ່າງສ້າງສັນ ໂດຍຂຽນໃຫ້ໄດ້ຫຼາຍທີ່ສຸດ ເມື່ອຂຽນແລ້ວກໍ່ເກັບເຈ້ຍທັງໝົດ ມາຈົດໃສ່ກະດານ ແລ້ວໃຫ້ຫົວໜ້າທີມອ່ານໃຫ້ທຸກຄົນຟັງ ຈາກນັ້ນກໍ່ແຈກເຈ້ຍເປົ່າອີກຄັ້ງ ໃຫ້ທຸກຄົນລຳດັບຄວາມສຳຄັນຂອງວິທີແກ້ໄຂ ຊຶ່ງອາດຈະໃຫ້ຈັດມາ 5 ອັນດັບຈາກວິທີແກ້ໄຂທີ່ຢູ່ກະດານທັງໝົດ 20 ວິທີ ຈາກຂໍ້ມູນນີ້ເຮົາກໍ່ນຳມາຈັດອັນດັບຄວາມສຳຄັນຂອງວິທີແກ້ບັນຫາໃໝ່ອີກຄັ້ງ ແລະ ສຸດທ້າຍກໍ່ຄື ພິຈາລະນາວ່າຄວນມີການແກ້ໄຂອັນດັບທີ່ໄດ້ ຫຼື ບໍ່ ແລ້ວຮ່ວມກັນລົງຄວາມເຫັນເລືອກກຸ່ມວິທີແກ້ທີ່ດີທີ່ສຸດ
- ຈະເຮັດແນວໃດ ເພື່ອບໍ່ໃຫ້ເສັ້ນຕາຍກາຍເປັນບັນຫາ
ບາງຄັ້ງເສັ້ນຕາຍ ຫຼື Deadline ທີ່ເປັນຕົວກຳນົດເວລາຂອງວຽກແຕ່ລະຢ່າງ ກາຍເປັນຈຸດທີ່ເພີ່ມບັນຫາໃຫ້ກັບຕົວເຮົາເອງ ສະນັ້ນ, ຕ້ອງຫາທາງແກ້ໄຂດ້ວຍວິທີຕ່າງໆດັ່ງນີ້: ປະເມີນເວລາໃນການເຮັດວຽກ ເພື່ອກຳນົດເວລາທີ່ຈະເຮັດສຳເລັດໃຫ້ໃກ້ຄຽງກັບຄວາມເປັນຈິງຫຼາຍທີ່ສຸດແລ້ວລອງບວກຕື່ມອີກ 5-10% ເສັ້ນຕາຍໃຫຍ່ໆຂອງທັງໂຄງການຖືເປັນເລື່ອງທີ່ອາດເຮັດໃຫ້ເຮົາຄຽດໄປຕະຫຼອດ ສະນັ້ນ, ຄວນຫຼີກລ້ຽງຈາກຄວາມຄຽດດ້ວຍການແບ່ງອອກເປັນເສັ້ນຕາຍຍ່ອຍໆຂອງແຕ່ລະໜ້າວຽກ ຫຼື ແຕ່ລະກິດຈະກຳ ເລື່ອງໃຫຍ່ກໍ່ຈະກາຍເປັນເລື່ອງນ້ອຍໄປທັນທີ ຢ່າເລື່ອນກຳນົດເສັ້ນຕາຍທີ່ໄດ້ຕົກລົງກັນໄວ້ອອກໄປ ເພາະຖ້າເລື່ອນແລ້ວຈະຕິດເປັນນິໄສ ຕໍ່ໄປຈະບໍ່ມີໃຜເຊື່ອຖື ແລະ ຍັງເຮັດໃຫ້ສູນເສຍສັດທາຈາກຜູ້ຄົນຮອບຂ້າງອີກດ້ວຍ.
ຂໍ້ມູນຈາກ: http://th.jobsdb.com/TH/EN/