ການຈັດການຂີ້ເຫຍື້ອ ຍັງເປັນສິ່ງທີ່ທ້າທ້າຍໃນແຕ່ລະຂົງເຂດ ຕັ້ງແຕ່ເຮືອນຊານ, ຫ້າງຮ້ານ, ບໍລິສັດ ຈົນໄປເຖິງບັນດາໂຮງງານຜະລິດຕ່າງໆ. ເນື່ອງຈາກເປັນໄປບໍ່ໄດ້ທີ່ຈະຫຼີກລ່ຽງບໍ່ໃຫ້ມີການສ້າງຂີ້ເຫຍື້ອເລີຍ. ເຊິ່ງບາງຄັ້ງຍັງພົບເຫັນການທຳລາຍ ແລະ ຈັດການຂີ້ເຫຍື້ອຢ່າງບໍ່ຖືກວິທີ ທີ່ສົ່ງຜົນເສຍຕໍ່ສິ່ງແວດລ້ອມ ແລະ ສ້າງຄວາມເປີເປື້ອນໃຫ້ສັງຄົມ ເຊັ່ນ: ການນຳຂີ້ເຫຍື້ອໄປຖິ້ມຊະຊາຍ, ການຈູດຂີ້ເຫຍື້ອ, ການບໍ່ແຍກປະເພດຂີ້ເຫຍື້ອຢ່າງຈະແຈ້ງ ເຮັດໃຫ້ເປັນອັນຕະລາຍ ແລະ ອື່ນໆອີກ. ການຄຳນຶງເຖິງສະຖານທີ່ ຫຼື ບໍລິເວນ ຂອງການຝັງຂີ້ເຫຍື້ອລົງດິນແມ່ນເປັນສິ່ງທີ່ສຳຄັນ ເພາະສ່ວນໃຫຍ່ເຂດດັ່ງກ່າວຢູ່ໃກ້ຊຸມຊົນ ແລະ ອາດຈະມີການດູດຊັບສິ່ງຕ່າງໆທີ່ມີຜົນກະທົບໄລຍະຍາວ.
ດັ່ງນັ້ນ, ຫຼາຍໆໂຮງງານຈຶ່ງຕ້ອງໄດ້ມີສ່ວນຮ່ວມໃນການຮັບຜິດຊອບຕໍ່ສັງຄົມ ໂດຍການຈັດການຂີ້ເຫຍື້ອຢ່າງຖືກວິທີ. ຍົກຕົວຢ່າງ ໜຶ່ງໂຄງການຄື Zero Waste to Landfill ຂອງບໍລິສັດ ຢາສູບລາວ ຈຳກັດ ໂດຍມີຈຸດປະສົງເພື່ອບໍ່ໃຫ້ມີຂີ້ເຫຍື້ອທີ່ໄປຝັງກົບໃນດິນ ຫລື ເວົ້າວ່າ ຂີ້ເຫຍື້ອທີ່ນຳໄປຝັງກົບໃນດິນເປັນສູນ ເຊິ່ງໄດ້ສຳເລັດໃນປີ 2023 ທີ່ຜ່ານມາ ພ້ອມທັງໄດ້ຮັບໃບຢັ້ງຢືນມາດຕະຖານສາກົນ.
ທ່ານ ນາງ ຄຳບຸ້ຍ ສຸຂັນທາ, ຜູ້ຈັດການດ້ານການຜະລິດທີ່ດີເລີດ (Manufacturing Excellence Leader) ແລະ ເປັນເຈົ້າຂອງໂຄງການ Zero Waste to Landfill ໄດ້ກ່າວວ່າ:
ກ່ອນໜ້ານີ້ ຂີ້ເຫຍື້ອຫຼາກຫຼາຍປະເພດໃນໂຮງງານໄດ້ຖືກໂຮມເຂົ້າກັນ ແລະ ຖືກນຳໄປຝັງກົບໃນດິນຢ່າງບໍ່ໄດ້ປະສິດຕິພາບເທົ່າທີ່ຄວນ ແລະ ບໍ່ມີການແຍກເປັນປະເພດຂີ້ເຫຍື້ອຢ່າງຖືກຕ້ອງ. ເນື່ອງຈາກຂີ້ເຫຍື້ອບາງປະເພດສາມາດນຳໄປລີໄຊເຄີນ ແລະ ແປເປັນພະລັງງານໃໝ່ເພື່ອຊົມໃຊ້ຕໍ່ໄປໄດ້. ສະນັ້ນ, ທາງໂຮງງານ ຈຶ່ງເຫັນເຖິງຄວາມສຳຄັນ ແລະ ໄດ້ລິເລີ່ມເຮັດໂຄງການດັ່ງກ່າວໃນທ້າຍປີ 2022 ແລະ ສາມາດສຳເລັດໃນເດືອນກັນຍາ 2023 ໃນການເຮັດໃຫ້ຂີ້ເຫຍື້ອໄປຝັງກົບດິນກາຍເປັນສູນ. ພ້ອມທັງແຍກຂີ້ເຫຍື້ອປະເພດຕ່າງໆແລ້ວນຳໄປຈັດການຕາມຂັ້ນຕອນຢ່າງຖືກວິທີ ໂດຍບໍລິສັດEMAC ເຊິ່ງເປັນບໍລິສັດຈັດການສິ່ງເສດເຫລືອສະເພາະດ້ານທີ່ໄດ້ຮັບອະນຸຍາດຈາກພາກສ່ວນກ່ຽວຂ້ອງ ເຊິ່ງຈະເຂົ້າມາເກັບເອົາຂີ້ເຫຍື້ອ ຈຳນວນ 2 ຄັ້ງຕໍ່ອາທິດເພື່ອນຳໄປຄັດແຍກແລະຈັດການຕາມຂະບວນການຕໍ່ໄປ
ທ່ານຍັງໃຫ້ຮູ້ຕື່ມວ່າ: ຄຽງຄູ່ກັນກໍແມ່ນການຫຼຸດຜ່ອນປະລິມານສິ່ງເສດເຫຼືອ ແລະ ນຳສິ່ງເສດເຫລືອບາງປະເພດໄປເຮັດແກັດຫຸງຕົ້ມ ເພື່ອເອົາມານຳໃຊ້ໃນຫ້ອງອາຫານຂອງໂຮງງານ. ເຊິ່ງໃນໄວໆນີ້ຈະໄດ້ມີການເລີ່ມຕົ້ນຈັດຕັ້ງປະຕິບັດການນຳເອົາຂີ້ເຫຍື້ອ ຫຼື ສິ່ງເສດເຫຼືອຈາກໂຮງງານ ເພື່ອນຳໄປແປເປັນເຊື້ອເພີງ ຖ້າຫາກສຳເລັດຢ່າງສົມບູນ ຄາດວ່າຈະຊ່ວຍຫຼຸດຜ່ອນປະລິມານຂີ້ເຫຍື້ອໄດ້ຫຼາຍສົມຄວນ.
ສຳລັບໂຄງການ Zero Waste to Landfill ມີດັ່ງນີ້:
- ການນຳສິ່ງເສດເຫຼືອທີ່ສາມາດຍ່ອຍສະຫຼາຍໄດ້ເຊັ່ນ: ເສດອາຫານ, ເປືອກໝາກໄມ້, ເປືອກໄຂ່… ໄປໝັກເພື່ອເຮັດເປັນແກັດຫຸງຕົ້ມ ແລະ ປຸຍ ໂດຍຜ່ານເຄື່ອງໂຮມໃບໂອແກັດ
- ຂີ້ເຫຍື້ອທົ່ວໄປທີ່ສາມາດລີໄຊເຄີນໄດ້ ເຊັ່ນ: ຕຸກນໍ້າ, ກະປ໋ອງ, ແກັດເຈ້ຍ… ແມ່ນກັບມາເປັນລາຍຮັບ
- ຂີ້ເຫຍື້ອທີ່ຈັດຢູ່ໃນປະເພດເຄມີ ຫຼື ສິ່ງເສດເຫຼືອຈາກການຜະລິດ ເຊິ່ງຈະມີບໍລິສັດສະເພາະທາງມາຮັບເອົາ ເພື່ອນຳໄປຄັດແຍກຕາມຂະບວນການ ແລ້ວສົ່ງຕໍ່ໄປໃຊ້ໃນວຽກງານອຸດສາຫະກຳ
ເວົ້າລວມແລ້ວ, ວຽກງານການຈັດການຂີ້ເຫຍື້ອ ໂດຍສະເພາະຢູ່ໂຮງງານແມ່ນເປັນສິ່ງທີ່ຕ້ອງປະຕິບັດໃຫ້ຖືກຕ້ອງ ແລະ ເປັນໄປຕາມຫຼັກການທີ່ກຳນົດ, ພ້ອມເປົ້າໝາຍຊັດເຈນ ເພື່ອໃຫ້ໄດ້ຜົນລັບທີ່ດີຕໍ່ກັບສະພາບແວດລ້ອມອ້ອມຂ້າງ ແລະ ສັງຄົມທີ່ມີຫຼາຍຄົນອາໃສຢູ່ຮ່ວມກັນ.