ເມື່ອມື້ວັນຈັນ 2 ພະຈິກ ບໍລິສັດຄອມເມີລ໌ຊຽນ ແອລ໌ຄຣາບ ຄັອບ ຂອງລັດຖະບານຈີນ ເປີດສາຍພານການຜະລິດເຮືອບິນໂດຍສານຂອງຕົນເອງເທື່ອທຳອິດໃນນະຄອນຊ່ຽງໄຮ້ ດ້ວຍຊື່ລຸ້ນ “ຊີ 919” ເຮືອບິນໂດຍສານລຳຕົວແຄບລຸ້ນທຳອິດທີ່ຜະລິດໃນປະເທດຈີນ ດ້ວຍການຮອງຮັບຜູ້ໂດຍສານ 168 ບ່ອນນັ່ງ ຄວາມຍາວເຮືອບິນ 39 ແມັດ ການບິນໄກສູງສຸດ 5,555 ກມ. ຫວັງແຂ່ງຂາຍກັບບໍລິສັດຜູ້ຜະລິດເຮືອບິນລາຍໃຫຍ່ຂອງໂລກຄື ບໍລິສັດໂບອິ້ງຂອງສະຫະລັດ ແລະ ບໍລິສັດແອລ໌ບັດຂອງຊາດຍຸໂຣບ
ຢ່າງໃດກໍຕາມ ກຳນົດການທົດສອບເຮືອບິນໂດຍສານ ຊີ 919 ຢ່າງເປັນທາງການເທື່ອທຳອິດພາຍໃນປີນີ້ຖືກເລື່ອນອອກໄປເປັນປີໜ້າຫລືອາດເປັນ ປີ 2018 ໂດຍມີຍອດສັ່ງຈອງຊື້ເຮືອບິນລຸ້ນນີ້ແລ້ວ 517 ລຳ ລູກຄ້າສ່ວນໃຫຍ່ເປັນສາຍການບິນໃນປະເທດຂອງຈີນ
ທັງນີ້ ຈີນຄິດຜະລິດເຮືອບິນພານິດມາຕັ້ງ 1970 ທັງຍັງກຽມຜະລິດເຮືອບິນໂດຍສານຂະໜາດນ້ອຍອີກລຸ້ນຄື ເອອາລ໌ເຈ- 21 ດ້ວຍບ່ອນນັ່ງຜູ້ໂດຍສານ 78-90 ບ່ອນນັ່ງ ເພື່ອແຂ່ງຂັນກັບເຮືອບິນເອັມເບນເອີລ໌ຂອງບຣາຊິນ ແລະ ເຮືອບິນບອມບາລ໌ເດຍຂອງແຄນາດາ ສ່ວນເຄື່ອງຈັກ ແລະ ສ່ວນປະກອບສຳຄັນຫລາຍຢ່າງຂອງເຮືອບິນຈີນຍັງຕ້ອງໃຊ້ ສິນຄ້າຈາກຜົນຜະລິດຂອງສະຫະລັດ ແລະ ຝຣັ່ງເສດ