ລັດຖະບານຈີນປະກາດຂຶ້ນຄ່າເງິນຫຍວນໃນອັດຕາສູງທີ່ສຸດນັບຕັ້ງແຕ່ປີ 2005 ເພີ່ມໂອກາດຄວາມເປັນໄປໄດ້ໃນການໃຫ້ສະກຸນເງິນປະຈຳຊາດໄດ້ຮັບການອະນຸມັດເຂົ້າສູ່ “ຕະກ້າເງິນ” ຂອງໄອເອັມເອັຟ ມື້ວັນຈັນທີ່ 2 ພະຈິກ 2015 ເວລາ 10:47 ນ. ສຳນັກຂ່າວຕ່າງປະເທດລາຍງານຈາກນະຄອນຫລວງປັກກິ່ງ ປະເທດຈີນ ເມື່ອວັນທີ່ 2 ພະຈິກ ວ່າທະນາຄານປະຊາຊົນຈີນ (ພີບີໂອຊີ) ອອກຖະແຫລງການເລື່ອງການປັບເພີ່ມອັດຕາແລກປ່ຽນກາງຂອງສະກຸນເງິນຫຍວນເມື່ອ ທຽບກັບເງິນດອນລາສະຫະລັດຂຶ້ນອີກຮ້ອຍລະ 0.54 ມາຢູ່ທີ່ 6.3154 ຫຍວນຕໍ່ 1 ດອນລາສະຫະລັດ ຖືເປັນການປັບເພີ່ມຄ່າເງິນຫຍວນຫລາຍທີ່ສຸດນັບຕັ້ງແຕ່ປີ 2005 ຊຶ່ງເປັນໄລຍະທີ່ລັດຖະບານປັກກິ່ງຫາກໍ່ຍົກເລີກລະບົບຮັດຄ່າເງິນຂອງປະເທດເອົາໄວ້ກັບ ເງິນຂອງສະຫະລັດ ຄວາມປ່ຽນແປງເທື່ອດັ່ງກ່າວມີຂຶ້ນຫລັງພີບີໂອຊີປັບຫລຸດຄ່າເງິນຫຍວນໃຫ້ຫລຸດລົງ ເກືອບຮ້ອຍລະ 5.0 ພາຍໃນ 1 ອາທິດເມື່ອເດືອນ ສິງຫາ ແລະ ກຳນົດໃຫ້ອັດຕາແລກປ່ຽນລາຍມື້ຜັນປ່ຽນໄດ້ບໍ່ເກີນຮ້ອຍລະ 2.0 ແມ່ນໃຫ້ເຫດຜົນວ່າເປັນສ່ວນຫນຶ່ງຂອງມາດຕາການກະຕຸ້ນເສດຖະກິດ ແລະຄວບຄຸມຄ່າເງິນຂອງປະເທດໃຫ້ສອດຄ້ອງກັບກົນໄກຂອງຕະຫລາດ ທີ່ອາດເພີ່ມຄວາມສົນໃຈໃນສິນຄ້າແລະບໍລິການຈາກຈີນຊຶ່ງມີລາຄາຖືກລົງຕາມຄ່າເງິນ ແຕ່ກັບສ້າງຄວາມຕື່ນຕົກໃຈໃຫ້ແກ່ຕະຫລາດທົ່ວໂລກໃນເວລານັ້ນ ແລະສົ່ງຜົນໃຫ້ເງິນຫຍວນອ່ອນຄ່າທີ່ສຸດນັບຕັ້ງແຕ່ເດືອນ ສິງຫາ 2010 ທັງນີ້ ການແຊກແຊງຄ່າເງິນຫຍວນຖືເປັນກົນໄກສຳຄັນຂອງລັດຖະບານຈີນໃນການຄວບຄຸມແລະກຳນົດທິດ ທາງເສດຖະກິດຂອງປະເທດດ້ວຍຕົວເອງ ທ່າມກາງຄວາມຫວັງອັນເຕັມປ່ຽມ ໃນການໃຫ້ເງິນຫຍວນໄດ້ຮັບການຍອມຮັບຈາກກອງທຶນການເງິນລະຫວ່າງປະເທດ (ໄອເອັມເອັຟ) ໃຫ້ເປັນໜຶ່ງໃນ “ສິດທິເບີກຖອນພິເສດ” (ເອດດີອາລ໌) ຫລື “ຕະກ້າເງິນ” ຂອງໄອເອັມເອັຟ ຮ່ວມກັບຄ່າເງິນດອນລາສະຫະລັດ ຍູໂລ ເຍນ ແລະປອນສະເຕີລ໌ລິງ ຊຶ່ງໄອເອັມເອັຟກຽມຕັດສິນເລື່ອງດັ່ງກ່າວພາຍໃນເດືອນນີ້ ຂະນະທີ່ກຳນົດການໃຊ້ອັດຕາໃໝ່ຂອງເອດດີອາລ໌ຈະເລີ່ມໃນວັນທີ່ 1 ຕຸລາ ປີໜ້າ“