ສຳນັກຂ່າວຕ່າງປະເທດ ລາຍງານໃນວັນທີ 30 ຕຸລານີ້ວ່າ ທາງການມຽນມາ ແລະ ສະຖານທູດອີຕາລີ ກຳລັງຫາລືກັນ ກ່ຽວກັບການບູລະນະເຈດີເກົ່າແກ່ ອາຍຸຫລາຍຮ້ອຍປີ ຈຳນວນຫລາຍແຫ່ງ ທີ່ຕັ້ງຢູ່ພາຍໃນບໍລິເວນ ທົ່ງເຈດີພຸກາມ ເພື່ອດຳເນີນການຈົດທະບຽນ ເປັນມໍລະດົກໂລກອີກແຫ່ງໜຶ່ງ ໂດຍລັດຖະບານອີຕາລີ ຕົກລົງໃຫ້ທຶນສະໜັບສະໜູນ ໂດຍຜ່ານສຳນັກງານຄວາມຮ່ວມມືການພັດທະນາ ແຫ່ງ ປະເທດອີຕາລີ (Italian Development Cooperation Office).

ທັງນີ້ ລັດຖະບານອີຕາລີ ໄດ້ໃຫ້ຄວາມຊ່ວຍເຫລືອມຽນມາ ເພື່ອຂຶ້ນທະບຽນບູຮານສະຖານ ຈຳນວນ 3 ແຫ່ງ ຂຶ້ນທະບຽນເປັນມໍລະດົກໂລກສຳເລັດ ຊຶ່ງໄດ້ແກ່ ເມືອງຫັນລິນ (Hanlin), ເບັກຕານໍ (Beikthano) ແລະ ເມືອງສີເກດຕຣາ (Sri Kestra) ໂດຍທັງສາມແຫ່ງ ເປັນເມືອງເກົ່າແກ່ໃນສະໄໝ ອານາຈັກພະຍູ.