ສຳນັກຂ່າວຕ່າງປະເທດລາຍງານວ່າ ເກີດຄວາມພິກລັອກເລັກໜ້ອຍກັບການພະຍາຍາມສ້າງສະຖິຕິໂລກຂອງປະເທດຈີນ ຫລັງຈາກທີ່ ເສີບເມນູເຂົ້າຜັດຊາມໃຫຍ່ ນ້ຳໜັກກວ່າ 4,192 ກິໂລກຣາມ ແຕ່ປາກົດວ່າ ກິນເນດສ໌ເວີດ ເລດຄອດ ປະຕິເສດທີ່ຈະຈົດບັນທຶກສະຖິຕິໃຫ້ ເນື່ອງຈາກພົບວ່າເຂົ້າຜັດບໍ່ສາມາດຮັບປະທານໄດ້
ຕາມລາຍງານລະບຸວ່າ ເຂົ້າຜັດຊາມໃຫຍ່ຂອງເມືອງຫຍາງໂຈ ມົນທົນຈຽງຊູ ທີ່ເລືອກເຮັດເມນູນີ້ເພື່ອສະເຫລີມສະຫລອງວາລະຄົບຮອບ 2,500 ປີຂອງເມືອງເກົ່າແກ່ແຫ່ງໜຶ່ງ ພໍ່ຄົວ ແມ່ຄົວ ແລະປະຊາຊົນຫລາຍພາກສ່ວນຕັ້ງໃຈກັນສ້າງສັນເມນູຊາມໃຫ່ຍຂຶ້ນມາ ເພື່ອຫວັງຈະຖືກບັນທຶກສະຖິຕິໃນກິນເນດສ໌ເວີດ ເລດຄອດ ໃນຖານະເຂົ້າຜັດຊາມໃຫຍ່ທີ່ສຸດໃນໂລກ
ແຕ່ສະຖານນະການຕ້ອງປ່ຽນໄປ ເມື່ອວັນທີ່ 27 ຕຸລາ ຫລັງຄະນະກຳມະການຈາກກິນເນດສ໌ເວີດ ເລດຄອດ ໄດ້ມາກວດສອບ ເພື່ອບັນທຶກລົງສະຖິຕິໂລກ ແຕ່ປາກົດພົບວ່າເຂົ້າຜັດ ນ້ຳໜັກ 4,192 ກິໂລກຣາມນັ້ນ ມີບາງສ່ວນກວ່າ 150 ກິໂລກຣາມ ບໍ່ສາມາດຮັບປະທານໄດ້ແທ້ ເຮັດໃຫ້ທາງ ກິນເນດສ໌ເວີດ ເລດຄອດ ປະຕິເສດທີ່ຈະບັນທຶກສະຖິຕິໄວ້
ຢ່າງໃດກໍຕາມ ຍັງມີລາຍງານວ່າ ຫລັງຈາກຄວາມຜິດຫວັງທີ່ພາດລົງສະຖິຕິໂລກ ທາງການເມືອງຫຍາງໂຈ ໄດ້ທຳການເຄື່ອນຍ້າຍເຂົ້າຜັດອອກຈາກພື້ນທີ່ຈັດງານ ໂດຍໃຊ້ບັນທຸກ ຄາດວ່າໜ້າຈະນຳເອົາໄປລ້ຽງໝູ ທັງທີ່ກ່ອນໜ້ານີ້ມີຄວາມຕັ້ງໃຈຈະນຳໄປແຈກຈ່າຍໃຫ້ກັບໂຮງຮຽນເຂດບ້ານນອກ