ຂປລ. ອົງຄະນະພັກ ຫ້ອງວ່າການສູນກາງພັກ ຈັດກອງປະຊຸມ ໃນວັນທີ 22 ຕຸລາ 2015 ພາຍໃຕ້ການເປັນປະທານຂອງ ສະຫາຍ ດຣ. ຄຳພັນ ພົມມະທັດ ກຳມະການສູນກາງພັກ, ເລຂາຄະນະພັກ, ຫົວໜ້າຫ້ອງວ່າການສູນກາງພັກ ໂດຍເປັນກຽດເຂົ້າຮ່ວມຂອງ ສະຫາຍ ບຸນຍັງ ວໍລະຈິດ ກຳມະການ ກົມການເມືອງ ສູນກາງພັກ, ຜູ້ປະຈຳການຄະນະເລຂາທິການສູນກາງພັກ, ຮອງປະທານປະເທດ, ມີບັນດາສະມາຊິກພັກ ພາຍໃນຫ້ອງວ່າການ ສູນກາງພັກເຂົ້າຮ່ວມ. ເພື່ອສະຫລຸບຕີລາຄາ ການເຄື່ອນໄຫວຊີ້ນຳນຳພາ ຂອງອົງຄະນະພັກ ໃນໄລຍະ 5 ປີ ຜ່ານມາ (2010-2015) ແລະ ວາງທິດທາງໜ້າທີ່ ເປັນວຽກຈຸດສຸມໃນຕໍ່ໜ້າ, ພ້ອມໄດ້ປ່ອນບັດຄັດເລືອກເອົາຜູ້ແທນສົມບູນ ຈຳນວນ 5 ສະຫາຍ ແລະ ສຳຮອງ 2 ສະຫາຍ ເພື່ອເປັນຕົວແທນໃຫ້ແກ່ອົງຄະນະພັກ ຫ້ອງວ່າການສູນກາງພັກ ໄປຮ່ວມກອງປະຊຸມຜູ້ແທນທົ່ວປະເທດ ຄັ້ງທີ X ຂອງພັກ ທີ່ຈະໄຂຂຶ້ນໃນຕົ້ນປີ 2016 ທີ່ຈະມາເຖິງ.
ສະຫາຍ ບຸນຍັງ ວໍລະຈິດ ໄດ້ມີຄຳເຫັນໂອ້ລົມຕໍ່ກອງປະຊຸມວ່າ: ໃນຊຸມປີຕໍ່ໜ້້ານີ້ ແມ່ນໄລຍະທີ່ພັກເຮົາ ສືບຕໍ່ບູລະນະ ແລະ ຈັດຕັ້ງປະຕິບັດແນວທາງ ປ່ຽນແປງໃໝ່ຮອບດ້ານທີ່ມີຫລັກການ ເພື່ອນຳພາທົ່ວສັງຄົມ ປະຕິບັດ 2 ໜ້າທີ່ຍຸດທະສາດ ປ່ຽນແປງໃໝ່, ນຳເອົາປະເທດຊາດຫລຸດພົ້ນ ອອກຈາກຄວາມດ້ອຍພັດທະນາ ເມື່ອຮອດປີ 2020, ສ້າງຄວາມສົມບູນພູນສຸກ ໃຫ້ແກ່ປະຊາຊົນ ແລະ ສ້າງຄວາມມັ່ງຄັ່ງເຂັ້ມແຂງ ໃຫ້ແກ່ປະເທດຊາດ ຕາມຈຸດໝາຍກ້າວຂຶ້ນສູ່ສັງຄົມນິຍົມ ເຊິ່ງເປັນບາດລ້ຽວສຳຄັນປະຫວັດສາດ ໃນການນຳພາຂອງພັກເຮົາ. ດ້ວຍເຫດນັ້ນ ໃນຖານະທີ່ເປັນຜູ້ຊ່ວຍວຽກຂອງສູນກາງພັກ. ຫ້ອງວ່າການສູນກາງພັກ ຕ້ອງໄດ້ຕັ້ງໜ້າປັບປຸງຕົນເອງ ເພື່ອຍົກສູງຄວາມສາມາດ ໃນການປະຕິບັດໜ້າທີ່ຂອງຕົນ, ເປັນເຈົ້າການປະກອບສ່ວນ ເຂົ້າໃນການຊ່ວຍການນຳ ຊີ້ນຳໆພາການຈັດຕັ້ງ ຜັນຂະຫຍາຍແນວທາງ, ແຜນນະໂຍບາຍ ຂອງພັກໃຫ້ເຂົ້າສູ່ຊີວິດຕົວຈິງ, ຖືກຕ້ອງຕາມທິດ ແລະ ມີຜົນສຳເລັດ ໂດຍສືບຕໍ່ປັບປຸງ, ເສີມຂະຫຍາຍບົບບາດ ແລະ ຍົກສູງຄວາມສາມາດນຳພາ ຂອງຄະນະພັກ, ໜ່ວຍພັກ ໃນການຊີ້ນຳນຳພາວຽກງານໃຫ້ມີຄຸນນະພາບ ສົມຄູ່ກັບທີ່ຕັ້ງ, ພາລະບົດບາດ ແລະ ຄວາມຮຽກຮ້ອງຕ້ອງການ ຂອງໜ້າທີ່ການເມືອງໃນໄລຍະໄໝ; ກໍ່ສ້າງບຳລຸງພະນັກງານໃຫ້ພຽງພໍ ກັບຄວາມຕ້ອງການໃນສະເພາະໜ້າ ແລະ ສ້າງພະນັກງານສືບທອດປ່ຽນແທນທີ່ໜັກແໜ້ນ ໃນໄລຍະຍາວ ຕາມທິດຫັນເປັນໜຸ່ມ, ຫັນເປັນຊ່ຽວຊານ ແລະ ຫັນເປັນຜູ້ບໍລິຫານ ທີ່ມີຄຸນນະພາບ; ເປັນເຈົ້າເສີມຂະຫຍາຍສາຍພົວພັນ ຮ່ວມມືທີ່ເປັນມູນເຊື້ອກັບ ຫ້ອງວ່າການສູນກາງພັກ ຂອງປະເທດເພື່ອນມິດຍຸດທະສາດ ເພື່ອຍາດແຍ່ງເອົາບົດຮຽນ ແລະ ການສະໜັບສະໜູນ ຊ່ວຍເຫລືອດ້ານເຕັກນິກ-ວິຊາການ ແລະ ທຶນຮອນເຂົ້າໃນການປັບປຸງ ແລະ ພັດທະນາວຽກງານຫ້ອງວ່າການ ໃຫ້ກ້າວຂຶ້ນຢ່າງບໍ່ຢຸດຢັ້ງ ແລະ ອື່ນໆ.
ພ້ອມ ນີ້, ກອງປະຊຸມໄດ້ເປັນເອກະພາບກັນ ຮັບຮອງເອົາບົດສະຫລຸບຕີລາຄາ ການເຄື່ອນໄຫວຊີ້ນຳນຳພາຂອງອົງຄະນະພັກ ຫ້ອງວ່າການສູນກາງພັກ ໃນໄລຍະ 5 ປີ ຜ່ານມາ ເຊິ່ງກອງປະຊຸມ ໄດ້ສັງເກດຕີລາຄາ, ໄຈ້ແຍກຢ່າງພາວະວິໄສ ຕໍ່ສາເຫດຕົ້ນຕໍທີ່ພາໃຫ້ມີຜົນສຳເລັດ, ບົດຮຽນທີ່ຖອດຖອນໄດ້ ໃນຕະຫລອດໄລຍະ 5 ປີ ເພື່ອເສີມຂະຫຍາຍດ້ານຕັ້ງໜ້າ ແລະ ມີທິດແກ້ໄຂບັນຫາຄົງຄ້າງ ໃຫ້ມີການຫັນປ່ຽນໃໝ່ ທີ່ດີຂຶ້ນກວ່າເກົ່າ.
ແຫລ່ງຂ່າວ:
