ຫລາຍຄົນອາດຈະບອກວ່າ ຂອງມັນ ຂອງຈືນ ຢ່າກິນຫຼາຍເພາະຈະເຮັດໃຫ້ອາຍຸບໍ່ຍືນ ແຕ່ດຽວກ່ອນ ຢຸດກ່ອນ ເພາະຜູ້ຍິງທີ່ອາຍຸຫລາຍທີ່ສຸດໃນໂລກ ນາງໄດ້ພິສູດແລ້ວວ່າ “ບໍ່ຈິງ” Susannah Mushatt Jones ຜູ້ຍິງແກ່ທີ່ສຸດໃນໂລກ ຄົນລ່າສຸດຄົບຮອບອາຍຸ 116 ປີເມື່ອເດືອນກໍລະກົດທີ່ຜ່ານມາເຜີຍວ່າອາຍຸຍືນໄດ້ເພາະນາງ “ກິນເບຄອນທຸກມື້”
ແມ່ເຖົ້າເຜີຍວ່າ ນາງກິນ ເບຄອນ ໄຂ່ ເຂົ້າປຽກເຂົ້າເປັນອາຫານເຊົ້າທຸກມື້ ແລະບໍ່ພຽງເທົ່ານັ້ນ ແມ່ເຖົ້າຍັງກິນເບຄອນໝົດມື້ເລີຍອີກດ້ວຍ ຕາມຂໍ້ມູນຈາກ ນິວຢອກໂພດແຕ່ຢ່າງໃດກໍດີ ນາງບໍ່ໄດ້ປ່ອຍປະລະເລີຍຮ່າງກາຍຂະໜາດນັ້ນ ເພາະນາງບອກວ່າ ” ຂ້ອຍບໍ່ດື່ມ ແລະບໍ່ດູດຢາດ້ວຍ”
ນອກຈາກນັ້ນນາງຍັງບອກເຄັດລັບທີ່ຫລາຍຄົນອາດຈະຄິດບໍ່ເຖິງກໍຄື ” ຂ້ອຍໄດ້ຮັບຄວາມຮັກຈາກຄົນອື່ນ ໆຮອບຂ້າງ ແລະພະລັງງານດ້ານບວກ ຂ້ອຍວ່ານີ້ຄືກຸນແຈໃນການມີຊີວິດຍືນຍາວແລະມີຄວາມສຸກ” ຍິ່ງໄປກວ່ານັ້ນ ນາງຍັງມີນິໄສມັກນອນຫຼາຍ ອີກດ້ວຍ ໂດຍຫລານຂອງ ແມ່ເຖົ້າໂຈນສ໌ Lois Judge ບອກວ່າ ແມ່ເຖົ້າຫລັບເກືອບ 10 ຊົ່ວໂມງຕໍ່ຄືນ ແລະຍັງຫລັບສັ້ນ ໆລະຫວ່າງມື້ອີກດ້ວຍ
ນາງເກີດໃນອະຫລາບາມ່າ ເມື່ອວັນທີ 6 ກໍລະກົດປີ 1899 ຊຶ່ງເປັນໜຶ່ງໃນສອງຄົົນທີ່ເກີດໃນສັດຕະທີ່ 19 ທີ່ຍັງມີຊີວິດຢູ່ໃນປະຈຸບັນ ສຳລັບການກິນເບຄອນແລ້ວອາຍຸຍືນ ນັ້ນບໍ່ໄດ້ມີແຕ່ແມ່ເຖົ້າໂຈນສ໌ຄົນດຽວ ແມ່ເຖົ້າ Pearl Cantrell ໄວ 105 ປີ ທີ່ເສຍຊີວິດໄປເມື່ອປີ 2013 ກໍມັກກິນເບຄອນເຊັ່ນດຽວກັນ ນອກຈາກນັ້ນຍັງມີເຄັດລັບອາຍຸຍືນແປກ ໆອີກເຊັ່ນ Elizabeth Sullivan ແມ່ເຖົ້າໄວ 104 ປີມັກການດື່ມນ້ຳອັດລົມ Dr. pepper ຫລາຍ ເຖິງຂັ້ນດື່ມທຸກມື້ເລີຍກໍວ່າໄດ້