ເມື່ອວັນທີ່ 19 ຕຸລາ 2015 ເວັບໄຊຕ໌ມິເລີຂອງອັງກິດ ລາຍງານວ່າ ອົງການບໍລິຫານການບິນແລະອາວະກາດແຫ່ງຊາດ ຫລື NASA ເຜີຍ ດາວເຄາະນ້ອຍຂະໜາດເສັ້ນຜ່າສູນກາງຫລາຍທີ່ສຸດໄດ້ເຖິງ 620 ແມັດ ຈະໂຄຈອນຫວິດໂລກໃນໄລຍະໃກ້ຫລາຍມື້ຮາໂລວີນນີ້
ດາວເຄາະນ້ອຍດວງນີ້ຄື 2015 TB145 ຖືກກວດພົບເມື່ອ 2 ອາທິດກ່ອນ ມີຂະໜາດທີ່ບໍ່ສາມາດກວດສອບໄດ້ຊັດເຈນ ຄາດຢູ່ທີ່ປະມານ 280-620 ແມັດ ຈະໂຄຈອນຫວິດໂລກໃນວັນທີ່ 31 ຕຸລານີ້ ໃນໄລຍະ 800, 000 ກິໂລແມັດ
ຢ່າງໃດກໍຕາມເຖິງແມ່ນວ່າດາວເຄາະນ້ອຍດວງນີ້ຈະເຂົ້າໃກ້ໂລກຫລາຍທີ່ສຸດເປັນປະຫວັດສາດ ແຕ່ມະນຸດບໍ່ສາມາດເບິ່ງເຫັນມັນຜ່ານໄປໄດ້ດ້ວຍຕາເປົ່າ ຕ້ອງອາໄສກ້ອງໂທລະທັດເທົ່ານັ້ນ ໂດຍປະຊາຊົນທີ່ອາໄສຢູ່ທາງທະວີບອາເມຣິກາເໜືອຈະເບິ່ງເຫັນດາວເຄາະນ້ອຍໄດ້ຊັດເຈນທີ່ສຸດ
ດາວເຄາະນ້ອຍ 2015 TB145 ຈັດເປັນວັດຖຸອາວະກາດໃກ້ໂລກທີ່ຄວນເຝົ້າເບີ່ງ ເພາະມັນໂຄຈອນມາໃກ້ໂລກຫລາຍກວ່າເກນໂດຍສະເລ່ຍຂອງວັດຖຸອາວະກາດທົ່ວໄປທີ່ NASA ກຳນົດໄວ້ ໂດຍຄ່າມາດຕະຖານຢູ່ທີ່ 7,402,982 ກິໂລແມັດຈາກພື້ນໂລກ
ແຕ່ເຖິງແມ່ນວ່າມັນຈະໂຄຈອນເຂົ້າໃກ້ໂລກປານໃດ ທາງ NASA ກໍຍັງຢືນຢັນວ່າມັນຈະບໍ່ຊົນໂລກຢ່າງແນ່ນອນ ດັ່ງນັ້ນກໍບໍ່ຕ້ອງໜີ ບໍ່ມີມື້ສິ້ນໂລກໃດໆທັງນັ້ນ ຫຍິບກ້ອງໂທລະທັດຂຶ້ນມາສ່ອງເບິ່ງການເຄື່ອນໂຕຂອງມັນດີກວ່າ