ຂປລ. ການທົດລອງນຳໃຊ້ ແນວພັນເຂົ້າຈ້າວ ຢູນຍີ້ວ 19 ຂອງບໍລິສັດ ຍິນົງ ການລົງທຶນ ໄຊຍະບູລີຈຳກັດ ຢູ່ເມືອງພຽງ ແຂວງໄຊຍະບູລີ ໄດ້ຮັບຜົນດີ, ພາຍຫລັງເກັບກ່ຽວເຂົ້າຕົວຈິງໄດ້ເຖິງ 6 ໂຕນຕໍ່ເຮັກຕາ ແລະ ຄາດວ່າການປູກພືດລະດູແລ້ງປີນີ້ ຊາວກະສິກອນເມືອງພຽງ ຈະນຳໃຊ້ແນວພັນເຂົ້າຈ້າວ ຢູນຍີ້ວ 19 ປູກໃນເນື້ອທີ່ 200 ກ່ວາເຮັກຕາ.
ທ່ານ ສາຍເພັດ ຈັນທະລັງສີ ຫົວໜ້າຂະແໜງປູກຝັງ ເປີດເຜີຍເມື່ອທ້າຍອາທິດຜ່ານມາວ່າ: ພາຍຫລັງແຂວງໄຊຍະບູລີ ໄດ້ເຊັນບົດບັນທຶກ ກັບບໍລິສັດຍີນົງ ການລົງທຶນ ໄຊຍະບູລີລາວຈຳກັດ, ໃນວັນທີ 9 ມິຖຸນາ 2015 ຜ່ານມາ, ບໍລິສັດກໍໄດ້ລົງມື ປະຕິບັດຕົວຈິງ ໃນການສາທິດທົດລອງ ປູກເຂົ້າຈ້າວຢູນຍີ້ວ 19 ຢູ່ເມືອງໄຊຍະບູລີ ແລະ ເມືອງພຽງ ປະມານ 2 ເຮັກຕາ, ຈາກການກວດກາ ເພື່ອເກັບກ່ຽວຜົນຜະລິດ ເຫັນວ່າເຂົ້າຈ້າວພັນຢູນຍີ້ວ ມີຄຸນນະພາບດີ, ໃຫ້ຜົນຜະລິດສູງ 6 ໂຕນຕໍ່ເຮັກຕາ.
ສຳລັບການປູກເຂົ້າຈ້າວຢູນຍີ້ວ 19, ແມ່ນປະຕິບັດຕາມປົກກະຕິ ທີ່ຊາວນາໄດ້ປະຕິບັດກັນມາ, ແຕກຕ່າງເວລາຕົກກ້າ ຕ້ອງເຮັດໃຫ້ພື້ນທີ່ພຽງບໍ່ມີນ້ຳ, ໃຫ້ເມັດກ້າຈົມລົງດິນ ເມື່ອກ້າໄດ້ 20 ກ່ວາມື້ກໍເອົາມາປັກດຳ. ການປັກດໍາແມ່ນໄລຍະຫ່າງ 15×15 ໃຊ້ກ້າສອງກີບ, ເມື່ອກ້າແຕກຈະມີເຖິງ 20 ຕົ້ນ, ເວລານັ້ນຕ້ອງເລືອກເອົາຕົ້ນທີ່ແຂງແຮງ ລຳໃຫຍ່ປະໄວ້ 6-8 ຕົ້ນຕໍ່ກໍ, ເມື່ອເຂົ້າມີອາຍຸເຖິງ 3 ເດືອນກໍໄດ້ເກັບກູ້ ເຊິ່ງຕົ້ນເຂົ້າຈະມີຄວາມສູງເຂົ້າ ປະມານໜຶ່ງແມັດ. ການບົວລະບັດຮັກສາ ແມ່ນໃສ່ປຸ໋ຍເລັ່ງ, ປຸ໋ຍໝາກ, ແມ່ນບໍລິສັດ ເປັນຜູ້ສະໜອງ ພ້ອມທັງແນວພັນ ຮັບຊື້ຜົນຜະລິດ ດ້ວຍລາຄາເຂົ້າເປືອກ 1 ກິໂລ 2.500 ກີບ.
ແຫລ່ງຂ່າວ:
