ຫຼາຍຄົນສົງໄສວ່າ ຖ້າເຮົາບໍ່ໄດ້ລ້າງລົດເປັນປີ ຈະມີຜົນເສຍຕໍ່ຊ່ວງລ່າງ ແລະ ເຄື່ອງຈັກ ບໍ? ບາງຄົນປົກກະຕິລ້າງລົດ ກໍລ້າງສີຢ່າງດຽວ ບໍ່ຄ່ອຍໄດ້ໄປຫຍຸ້ງກ່ຽວກັບເຄື່ອງຈັກ ເພາະວ່າຢ້ານມີບັນຫາລະບົບນ້ຳກັບໄຟ ແຕ່ເມື່ອໃຊ້ໄປດົນໆ ກໍພົບບັນຫາຂີ້ຝຸ່ນເກາະຕິດ ຢ້ານວ່າຈະບໍ່ງາມ ຢາກຈະເອົາໄປລ້າງອັດສີດ ເພື່ອລ້າງເຄື່ອງຈັກ ແລະ ທາງໃຕ້ກ້ອງລົດບາດດຽວ.
ຈຶ່ງເກີດຄຳຖາມວ່າ ຖ້າເຮົາບໍ່ໄດ້ລ້າງລົດເປັນປີ ຈະມີຜົນເສຍຕໍ່ຊ່ວງລ່າງຂອງລົດເຊັ່ນ: ຂີ້ດິນ, ຂີ້ຕົມ ຫຼື ຂີ້ຝຸ່ນໄປເກາະຕິດເຮັດໃຫ້ເປິເປື້ອນເທົ່ານັ້ນ ຫຼື ອາດຈະເຮັດເກີດເປັນຂີ້ໝ້ຽງໄດ້ ຫຼື ບໍ? ການທີ່ຈະລ້າງອັດສີດຕົວເຄື່ອງ ຫຼື ທາງໃຕ້ກ້ອງລົດ ແນວໃດກໍໄດ້ຕາມແຕ່ຕ້ອງການ ແຕ່ລະວັງຈະພົບກັບເຄື່ອງສີດນ້ຳແບບແຮງໆ. ສິ່ງສຳຄັນຄື ຢ່າງສີດນ້ຳລ້າງເຄື່ອງຈັກ ເພາະລະບົບໄຟຟ້າອາດຈະເປ່ເພໄດ້ ເພາະເມື່ອພົບກັບເຄື່ອງສີດນ້ຳແຮງດັນສູງເຂົ້າໄປ ລະບົບໄຟຟ້າອາດຈະບໍ່ປົກກະຕິ ຫຼື ເສຍຫາຍ ສະນັ້ນທາງທີ່ດີ ລ້າງທາງນອກພ້ອມດ້ວຍດູດຂີ້ຝຸ່ນອອກກໍໜ້າຈະພໍແລ້ວ.
ແຕ່ຫາກເຫັນວ່າໄປໄສຕ້ອງໄດ້ລຸຍຂີ້ຕົມຂີ້ຝຸ່ນຫຼາຍ ທຳໃຈບໍ່ໄດ້ຢາກຈະລ້າງອັດສີດໃຕ້ກ້ອງລົດ, ລໍ້ແມັກ ແລະ ອື່ນໆ ກໍບໍ່ມີບັນຫາ ແຕ່ຢ່າງທີ່ບອກຢ່າສີດນ້ຳລ້າງເຄື່ອງຈັກໂດຍເດັດຂາດເພາະມັນສ່ຽງຫຼາຍ. ຮ້ານລ້າງລົດທີ່ດີມີຄຸນນະພາບຈະບໍ່ລ້າງເຄື່ອງຈັກດ້ວຍເຄື່ອງສີດນ້ຳແຮງດັນສູງ ແຕ່ຈະມີສະເປກຳຈັດຄາບໃນເຄື່ອງຈັກ ສີດແລ້ວປ່ອຍປະໄວ້ຈາກນັ້ນກໍໃຫ້ໃຊ້ແປງຂັດຖູອອກ ແລ້ວໃຊ້ນ້ຳຢາຈາກສາຍຢາງແຮງດັນທຳມະດາລ້າງອອກ.
ການດູແລເຄື່ອງຈັກໃຫ້ສະອາດຍັງຊ່ວຍໃຫ້ການກວດສອບຄວາມເສຍຫາຍໃນເຄື່ອງລົດເຊັ່ນ: ທໍ່ ຫຼື ສາຍຕ່າງໆ ອາດຈະຈີກ, ແຕກ, ມີຂອງແຫຼວຮົ່ວຊຶມສາມາດເຫັນໄດ້ງ່າຍ ແກ້ໄຂໄດ້ທັນ. ນອກນັ້ນ ຍັງເຮັດໃຫ້ສາມາດຍືກອາຍຸການໃຊ້ການຂອງລົດທ່ານໄດ້ອີກດ້ວຍ. ແຕ່ຖ້າທ່ານເອົາລົດໄປລ້າງອັດສີດ ຕ້ອງລະວັງກໍລະນີ ລົດແລ່ນຈົນອຸນຫະພູມຂຶ້ນເຖິງລະດັບປົກກະຕິແລ້ວໄປລ້າງອັດສີດ ເອົານ້ຳສີດໃສ່ເຄື່ອງຈັກ, ສີດໃສ່ໃຕ້ກ້ອງລົດ ເມື່ອອຸນຫະພູມສູງ ພົບນ້ຳເຢັນຈະເກີດອາການແຕກແຫງ ຫຼື ບໍ? ໂດຍສະເພາະໃນກໍລະນີໄປຮ້ານລ້າງອັດສີດທີ່ບໍ່ຕ້ອງໄດ້ລໍຄິວເລີຍຈະເປັນການດີ. ການລ້າງເຄື່ອງຈັກໃນຂະນະທີ່ເຄື່ອງກຳລັງຮ້ອນນັ້ນ ຖືວ່າອັນຕະລາຍ ເຄີຍເກີດໃນກໍລະນີເສື້ອສູບແຕກແຫງ ເພາະຖ້າເປັນໃນກໍລະນີນີ້ແລ້ວທ່ານກໍຄວນປະລົດພັກໄວ້ກ່ອນຈັກໜ້ອຍແລ້ວຄ່ອຍລ້າງເຄື່ອງຈັກມັນ ຫຼື ອາດຈະເປີດຝາກະໂປງລົດແລ້ວເອົາພັດລົມມາເປົ່າໃສ່ປະມານ 15-30 ນາທີກໍໜ້າຈະຊ່ວຍລົດຂອງທ່ານໄດ້.