ລັດ ໃຊ້ມາດຕະການຜ່ອນຜັນດ້ວຍວິທີອວ່າຍໜີ້3ແຈ ຊ່ວຍບັນດາບໍລິສັດຕ່າງໆລອດຕາຍ ຫລື ມີເງິນໄປໃຊ້ໜີ້
ຂປລ, ໃນສະພາບທີ່ບັນດາບໍລິສັດ ໄດ້ຢືມເງິນຈາກທະນາຄານ ເພື່ອກໍ່ສ້າງພື້ນຖານໂຄງລ່າງ ຂອງລັດ ທີ່ຍັງບໍ່ສາມາດຊຳລະໜີ້ຄືນໃຫ້ທະນາຄານ ແຕ່ກົງກັນຂ້າມ ລັດຖະບານ ຍັງຕິດໜີ້ບັນ ດາບໍ ລິສັດເຫລົ່ານັ້ນຢ່າງຫລວງຫລາຍ ເຮັດໃຫ້ເກີດສະພາບຄວາມບໍ່ຄ່ອງຕົວຂອງບໍລິສັດ ແລະ ທະນາຄານສົ່ງຜົນໃຫ້ບັນດາບໍລິສັດ ບໍ່ສາມາດເຂົ້າຫາແຫລ່ງທຶນຂອງທະນາຄານໄດ້.
ທ່ານ ນາງ ວັດທະນາ ດາລາລອຍ ຮອງຜູ້ວ່າທະນາຄານແຫ່ງ ສປປລາວ (ທຫລ) ກ່າວໃນ ກອງປະຊຸມສະໄໝສາມັນເທື່ອທີ 9 ຂອງສະພາແຫ່ງຊາດ ຊຸດທີ VII ວ່າ: ຕໍ່ກັບບັນຫາທີ່ກ່າວມານັ້ນ ທຫລ ໄດ້ສະເໜີຂັ້ນເທິງຊອກຫາວິທີແກ້ໄຊ ດ້ວຍການອວ່າຍໜີ້ 3 ແຈ ເພື່ອຊ່ວຍບັນດາບໍລິສັດເຫລົ່າ ນັ້ນມີເງິນໄປຊຳລະໜີ້ໃຫ້ທະນາຄານ ໂດຍສະເພາະ ການແກ້ໄຂໜີ້ສິນຂອງລັດຕໍ່ບໍລິສັດໃຫ້ຫລຸດລົງ ແລະ ຈະຊ່ວຍແກ້ໄຂສະພາບຄ່ອງໃຫ້ແກ່ລະບົບທະນາຄານ, ດັ່ງນັ້ນ ຈຶ່ງໄດ້ຮັບການເຫັນດີ ຈາກຂັ້ນ ເທິງໃຫ້ກະຊວງການເງິນກູ້ຢືມໄລຍະຍາວ 20 ປີ ນຳ ທຫລ ເພື່ອມີແຫລ່ງທຶນຕົວຈິງ ເຂົ້າໄປການແກ້ ໄຂໜີ້ສິນ ໂຄງການກໍ່ສ້າງພື້ນຖານໂຄງລ່າງຂອງລັດ(ການປະຕິບັດມາດຕະການດັ່ງກ່າວ ສາມາດ ປະຕິບັດໄດ້ໃນເງື່ອນໄຂ ທີ່ສະພາບເງິນເຟີ້ຢູ່ໃນລະດັບຕ່ຳ ແລະ ທຫລ ໄດ້ຢຸດຕິການປ່ອຍສິນເຊື່ອໂດຍ ກົງໃຫ້ຫົວໜ່ວຍທຸລະກິດ).
ທ່ານ ນາງ ວັດທະນາ ດາລາລອຍ ໄດ້ກ່າວຕື່ມວ່າ:ດ້ວຍທິດທາງດັ່ງກ່າວ ຄະນະແກ້ໄຂໜີ້ລະ ດັບຊາດ ໂດຍມີທ່ານ ຮອງນາຍົກລັດຖະມົນຕີ,ຜູ້ຊີ້ນຳວຽກງານເສດຖະກິດມະຫາພາກ ແລະ ບໍລິການ ເປັນຫົວໜ້າຄະນະ ໄດ້ກຳນົດເງື່ອນໄຂຄື: ບໍລິສັດຕິດໜີ້ທະນາຄານ, ໂຄງການນອນໃນແຜນທີ່ສະພາ ແຫ່ງຊາດຮັບຮອງເອົາ ທີ່ລັດມີພັນທະຈ່າຍຍ້ອນໂຄງການສຳເລັດ 100 % ຫລືໂຄງການສືບຕໍ່ໃຫ້ສຳ ເລັດ ແລະ ຊຳລະໂດຍກົງໃຫ້ທະນາຄານກ່ຽວຂ້ອງ, ພ້ອມໄດ້ຄົ້ນຄວ້າ ແລະ ຕົກລົງປະຕິບັດອວ່າຍໜີ້ 3 ແຈຄື: ງວດ 1 (ຕາມຂໍ້ຕົກລົງສະບັບເລກທີ04/ຄກຊ ລົງວັນທີ 15/1/2015) ສາມາດຈັດຕັ້ງປະຕິ ບັດອວ່າຍໜີ້ໃຫ້ແກ່ 30 ບໍລິສດ ເປັນເງິນຈຳນວນທັງໝົດ 827,04 ຕື້ກີບ, ໃນການອວ່າຍໜີ້ເທື່ອນີ້ ມີໜີ້ບ້ວງ ປົກກະຕິ(PL) ທັງໝົດ 527,96ຕື້ກີບ ກວມ63,84% ຂອງການອວ່າຍທັງໝົດ ແລະ ມີໜີ້ ເສຍ (NPL) ທັງໝົດ 299,06ຕື້ກີບ ກວມ36,16% ຂອງການອວ່າຍທັງໝົດ, ສຳລັບ ພັນທະອາ ກອນແມ່ນບໍລິສັດຊຳລະໃຫ້ກະຊວງການເງິນໂດຍກົງ ແລະ ງວດທີ 2 ເປັນເງິນຈຳນວນທັງໝົດ 2.045,46ຕື້ກີບໃຫ້ແກ່ 129ບໍລິສັດ(ຕາມຂໍ້ຕົກລົງເລກທີ18/ຄກຊ ລົງວັນທີ 7/5/2015) ຮອດ ວັນທີ24/6/2015 ໄດ້ອວ່າຍໜີ້ສຳເລັດແລ້ວ 86 ບໍລິສັດມູນຄ່າ 1.430,63ຕື້ກີບ ໃນນີ້ ອວ່າຍໜີ້ປົກ ກະຕິ ຈຳນວນ 1.311,4ຕື້ກີບ ກວມ 64,11% ຂອງແຜນການອວ່າຍໜີ້ທັງໝົດ ແລະ ໜີ້ເສຍ ຈຳ ນວນ 119,22 ຕື້ກີບ ກວມ 5,83% ຂອງແຜນອວ່າຍທັງໝົດ, ຍັງເຫລືອ43ບໍລິສັດ ທີ່ຍັງບໍ່ທັນໄດ້ ອວ່າຍມີມູນຄ່າ ທັງໝົດ 614,77ຕື້ກີບ ໃນຈຳນວນ 86 ບໍລິສັດທີ່ໄດ້ອວ່າຍໜີ້ແລ້ວນັ້ນ ກະຊວງການ ເງິນ ໄດ້ຄິດໄລ່ຫັກອາກອນໄວ້ ຈຳນວນ 156,48ຕື້ກີບ ການປະຕິບັດນະໂຍບາຍນີ້ ໄດ້ເຮັດໃຫ້ສະ ພາບເຄັ່ງຕຶງຂອງໜີ້ສິນເບົາບາງລົງໃນລະດັບໃດໜຶ່ງ.
ໂດຍ: ສຸກສະຫວັນ
ພາບ: ອ່າຍຄຳ
ຂ່າວສານປະເທດລາວ