ໃນຕອນແລງຂອງວັນທີ 13 ມິຖຸນານີ້, ຄອບຄົວທ່ານ ເຈືອງ ສົມບູນຂັນ ອະດີດເລຂາທິການສູນກາງພັກ, ຫົວໜ້າຄະນະໂຄສະນາອົບຮົມສູນກາງພັກ ໄດ້ຈັດຖະແຫລງຂ່າວກ່ຽວກັບການສ້າງຕັ້ງມູນນິທິ ເຈືອງ ສົມບູນຂັນ ຂຶ້ນຢ່າງເປັນທາງການ ຢູ່ເຮືອນຂອງເພີ່ນເອງ ຢູ່ບ້ານຄຳຮຸ່ງ ເມືອງໄຊທານີ ນະຄອນຫລວງວຽງຈັນ, ໂດຍການເຂົ້າຮ່ວມຂອງທ່ານ ສົມສະຫວາດ ເລັ່ງສະຫວັດ ຮອງນາຍົກລັດຖະມົນ ຕີຜູ້ຊີ້ນຳວຽກງານຂົງເຂດເສດຖະກິດ ແລະ ຈໍລະຈອນ, ພ້ອມດ້ວຍພະນັກງານ ກ່ຽວຂ້ອງເຂົ້າຮ່ວມເປັນຈຳນວນຫລວງຫລາຍ.
ທ່ານ ເຈືອງ ສົມບູນຂັນ ອະດີດເລຂາທິການສູນກາງພັກ, ຫົວໜ້າຄະນະໂຄສະນາອົບຮົມສູນກາງພັກທີ່ໄດ້ເສຍຊີວິດໃນຄະນະໄປປະຕິບັດໜ້າທີ່ຢູ່ແຂວງຊຽງຂວາງ ເມື່ອວັນທີ 17 ພຶດສະພາ 2014 ທີ່ຜ່ານມາຈາກອຸປະຕິເຫດທາງເຮືອບິນ ແລະ ເພື່ອເປັນການລະນຶກເຖິງຄຸນງາມຄວາມດີຂອງເພີ່ນທາງຄອບຄົວຂອງເພີ່ນຈຶ່ງໄດ້ຕົກລົງນໍາສະເໜີພາກ ສ່ວນກ່ຽວຂ້ອງຕ່າງໆເພື່ອຂໍສ້າງຕັ້ງມູນນິທິຂຶ້ນ ແລ ະມາຮອດປັດຈຸບັນ, ມູນນິທິດັ່ງກ່າວໄດ້ຮັບອະນຸມັດເປັນທີ່ຮຽບຮ້ອຍແລ້ວຕາມຂໍ້ຕົກລົງຂອງທ່ານລັດຖະມົນຕີວ່າການກະຊວງພາຍໃນ, ລົງວັນທີ 21 ມັງກອນ 2015 ເຊິ່ງມີເປົ້າໝາຍຄື: ພັດທະນາຄວາມສາມາດດ້ານການຂຽນ ແລະ ການເວົ້າຕໍ່ຊຸມຊົນ ເພື່ອສະແດງຄວາມຄິດເຫັນຂອງຕົນເອງດ້ວຍການຈັດການແຂ່ງຂັນໃນກຸ່ມນັກຮຽນມັດທະຍົມຕອນປາຍ ແລະ ນັກສຶກສາວິທະຍາໄລ, ມະຫາວິທະຍາໄລ; ພ້ອມນີ້ຍັງເປັນການສົ່ງເສີມການພິມປຶ້ມອ່ານສຳລັບຊາວໜຸ່ມທີ່ມີເນື້ອໃນສົ່ງເສີມແນວຄິດຮັກຊາດ ແລະ ຮັກການພັດທະນາປະເທດແບບຍືນຍົງ ແລະ ທັງເປັນການສົ່ງເສີມການແປປຶ້ມທີ່ມີຊື່ສຽງລະດັບໂລກເປັນພາສາລາວແນໃສ່ສ້າງຄວາມສົນໃຈໃນການອ່ານຂອງຊາວໜຸ່ມລາວຫລາຍຂຶ້ນ.
ທ່ານພັນລະຍາໝ້າຍຂອງທ່ານ ເຈືອງ ສົມບູນຂັນ ຖະແຫລງວ່າ: ກິດຈະກຳທີ່ຈະເຄື່ອນໄຫວໃນປີທຳອິດນີ້ ແມ່ນຈະເລີ່ມຈາກການພິມຄືນປຶ້ມອ່ານຂອງທ່ານ ເຈືອງ, ເຊິ່ງເປັນທີ່ນິຍົມໃນໝູ່ນັກຮຽນ, ນັກຄົ້ນຄວ້າ ໂດຍສະເພາະ “ປຶ້ມໂລກາພິວັດດ້ານເສດຖະກິດ ແລະ ການພັດທະນາປະເທດລາວ” ແລະ ໃນຕໍ່ໜ້າມູນນິທິດັ່ງກ່າວຈະສືບຕໍ່ສະໜັບສະໜູນນັກຂຽນ, ຜູ້ມີຜົນງານໂດດເດັ່ນໃນການຂຽນ, ແຕ່ຂາດທຶນຮອນໃນການພິມ. ສະນັ້ນ ໜຶ່ງໃນບັນດາກິດຈະກຳການເຄື່ອນໄຫວຂອງມູນນິທິດັ່ງກ່າວ ແມ່ນຢາກສົ່ງເສີມຄົນລາວຫັນມາໃຫ້ຄວາມສຳຄັນກັບການອ່ານໃຫ້ນັບມື້ຫລາຍຂຶ້ນ.
ແຫລ່ງຂ່າວ: ລາວພັດທະນາ