ກຳປູເຈຍ ສົ່ງໜັງສືປະທວ້ງບໍລິສັດອິນເດຍ ຫລັງພົບວ່າມີແຜນຈະສ້າງສິ່ງປຸກສ້າງ ຮຽນແບບຜາສາດຫີນນະຄອນວັດທີ່ມີຊື່ສຽງຂອງປະເທດ.
ສຳນັກຂ່າວຕ່າງປະເທດ ລາຍງານໃນວັນທີ 6 ມິຖຸນາຜ່ານມານີ້ວ່າ ທ່ານ ກອຍ ເກືອງ ໂຄສົກກະຊວງການຕ່າງປະເທດ ແລະ ການຮ່ວມມືລະຫວ່າງປະເທດ ແຫ່ງຣາຊະອານາຈັກກຳປູເຈຍ ໄດ້ອ່ານຖະແຫລງວ່າ ລັດຖະບານກຳປູເຈຍ ໄດ້ສົ່ງໜັງສືປະທ້ວງໄປຍັງກະຊວງການຕ່າງປະເທດຂອງອິນເດຍ ເພື່ອຕ້ອງການໃຫ້ ບໍລິສັດ Mahavir Mandir Trust ຂອງອິນເດຍ ຢຸດຕິການກໍ່ສ້າງທີ່ຮຽນແບບຈາກຜາສາດຫີນນະຄອນວັດຂອງກຳປູເຈຍ ໂດຍໜັງສືປະທ້ວງໄດ້ລະບຸວ່າ ລັດຖະບານກຳປູເຈຍ ເຫັນການກໍ່ສ້າງທີ່ເປັນການຈຳລອງ ຜາສາດຫີນນະຄອນວັດຂອງພວກເຮົາ ເພື່ອຈຸດປະສົງໃນທາງການຄ້າ ເຊິ່ງເປັນການລະເມີດຢ່າງຮ້າຍແຮງ ຕໍ່ກັບຊັບສິນມໍລະດົກໂລກທີ່ມີຄຸນຄ່າຄວາມໂດດເດັ່ນໃນລະດັບສາກົນ ແລະ ຍິ່ງໄປກ່ວານັ້ນ ຜາສາດຫີນນະຄອນວັດ ຍັງເປັນສັນຍາລັກທີ່ໃຊ້ໃນທຸງຊາດຂອງກຳປູເຈຍ ມານັບເປັນເວລາຫລາຍສະຕະວັດ.
ທັງນີ້ ບໍລິສັດ Mahavir Mandir Trust ມີແຜນຈະສ້າງສິ່ງປູກສ້າງທີ່ຖອດແບບມາຈາກຜາສາດຫີນ ນະຄອນວັດ ເຊິ່ງຈະສ້າງຂຶ້ນຢູ່ແຂວງພິຫານ ຂອງປະເທດອິນເດຍ.
ຜາສາດຫີນນະຄອນວັດ ແມ່ນຕັ້ງຢູ່ແຂວງສຽມຣາດ ທາງພາກຕາເວັນຕົກສຽງເໜືອຂອງກຳປູເຈຍ ໄດ້ຖືກຈັດໃຫ້ເປັນມໍລະດົກໂລກ ໃນປີ 1992 ແລະ ເປັນສະຖານທີ່ທ່ອງທ່ຽວຍອດນິຍົມທີ່ສຸດແຫ່ງໜຶ່ງ ໃນປະເທດກຳປູເຈຍ.