ເພື່ອປະຕິບັດຕາມເນື້ອໃນຈິດໃຈ ແລະ ຜັນຂະຫຍາຍຍຸດທະສາດປ່າໄມ້ຮອດປີ 2020 ໃຫ້ສຳເລັດ ແລະ ປາກົດຜົນເປັນຈິງ ໃນຄາດໝາຍສູ້ຊົນຂອງວຽກງານຟື້ນຟູປ່າ ໃຫ້ມີເນື້ອທີ່ປົກຫຸ້ມປ່າໄມ້ກວມເອົາ 65% ໃນປີ 2015 ແລະ 70% ໃນປີ 2020 ໃນຂອບເຂດທົ່ວປະເທດ ຕະຫຼອດໄລຍະຜ່ານມາພັກ-ລັດຖະບານ ໄດ້ຖືເອົາວຽກງານຄຸ້ມຄອງປົກປັກຮັກສາ ແລະ ພັດທະນາປ່າໄມ້ ເປັນວຽກງານຍຸດທະສາດສຳຄັນ ຂອງການພັດທະນາເສດຖະກິດ-ສັງຄົມແຫ່ງຊາດ ໂດຍສະເພາະແມ່ນ ເລັ່ງໃສ່ວຽກງານປົກປັກຮັກສາປ່າໄມ້ ການປູກໄມ້ ແລະ ຟື້ນຟູປ່າ.
ເພື່ອບັນລຸໄດ້ບັນດາຄາດໝາຍສູ້ຊົນດັ່ງກ່າວນັ້ນ ແຕ່ລະປີພັກ-ລັດຖະບານເຮົາກໍ່ໄດ້ກຳນົດເອົາວັນທີ 1 ມິຖຸນາ ເຊິ່ງເປັນວັນເດັກນ້ອຍສາກົນຂອງທຸກໆປີ ເປັນວັນປູກຕົ້ນໄມ້ແຫ່ງຊາດ ແລະ ຂະບວນການດັ່ງກ່າວຂອງແຕ່ລະປີ ກໍ່ໄດ້ມີພາກລັດ ແລະ ເອກະຊົນທີ່ເປັນຫົວໜ່ວຍທຸລະກິດ ຕະຫຼອດຮອດປະຊາຊົນລາວບັນດາເຜົ່າ ກໍ່ໄດ້ຈັດຕັ້ງກັນປູກຕົ້ນໄມ້ ແລະ ໃຫ້ເປັນຂະບວນຟົດຟື້ນ ແລະ ມີຄວາມໝາຍສຳຄັນອັນພົ້ນເດັ່ນ ກໍ່ແມ່ນຂະບວນການຈັດຕັ້ງປະຕິບັດປູກຕົ້ນໄມ້ ເຊິ່ງມັນສະແດງໃຫ້ເຫັນການລົງທຶນປູກໄມ້ ເພື່ອຮັບໃຊ້ພາຍໃນຄອບຄົວ ແລະ ເພື່ອເປັນສິນຄ້າຂອງປະຊາຊົນ ກົມກອງ ການຈັດຕັ້ງຕ່າງໆ ແລະ ນັກລົງທຶນ ແມ່ນເປັນຂະບວນກວ້າງຂວາງພໍສົມຄວນ ເນື້ອທີ່ປ່າໄມ້ປູກໄດ້ເພີ່ມຂຶ້ນຢ່າງຕໍ່ເນື່ອງໃນແຕ່ລະປີ ແຕ່ໃນຄະນະດຽວກັນນັ້ນ ກໍ່ສັງເກດເຫັນວ່າມີຂໍ້ຄົງຄ້າງຈຳນວນໜຶ່ງ ທີ່ຈະຕ້ອງໄດ້ແກ້ໄຂ ແລະ ປັບປຸງໃຫ້ສອດຄ່ອງກັບລະບຽບກົດໝາຍ ໂດຍສະເພາະ ການປູກໄມ້ເພື່ອເປົ້າໝາຍທາງເສດຖະກິດ ແລະ ປົກປັກຮັກສາສິ່ງແວດລ້ອມ ເຊິ່ງຍັງມີຫຼາຍທ້ອງຖິ່ນບໍ່ໄດ້ເອົາໃຈໃສ່ເທົ່າທີ່ຄວນ ຕໍ່ກັບວຽກງານປູກໄມ້ຟື້ນຟູປ່າ ແລະ ການບົວລະບັດຮັກສາຕົ້ນໄມ້ທີ່ໄດ້ປູກແລ້ວນັ້ນ ອັນເປັນສາເຫດເຮັດໃຫ້ການປູກໄມ້ ແລະ ຟື້ນຟູປ່າບໍ່ໄດ້ຕາມລະດັບຄາດໝາຍ ແລະ ຍັງຂາດປະສິດທິຜົນສູງ ເພື່ອເຮັດໃຫ້ວຽກງານຄຸ້ມຄອງ ປົກປັກຮັກສາພັດທະນາ ແລະ ນຳໃຊ້ປ່າໃຫ້ມີຄວາມຮັດກຸມເຂົ້າສູ່ລະບົບ ໂດຍສະເພາະແມ່ນການປູກໄມ້ ແລະ ຟື້ນຟູປ່າ ເພື່ອປົກປັກຮັກສາສິ່ງແວດລ້ອມ ໃຫ້ເປັນຂະບວນການຢ່າງກວ້າງຂວາງທົ່ວປວງຊົນ ເຊິ່ງເປັນພັນທະ ໜ້າທີ່ ແລະ ຄວາມຮັບຜິດຊອບຢ່າງເປັນຂະບວນການ ໃນທົ່ວສັງຄົມຂອງປວງຊົນທັງຊາດ ແລະ ສືບຕໍ່ສູ້ຊົນຈັດຕັ້ງປະຕິບັດແຜນການປະຈຳສົກປີ 2014-2015 ກ່ຽວກັບການປູກໄມ້ ແລະ ຟື້ນຟູປ່າໄມ້ໃຫ້ບັນລຸຜົນຕາມຕົວເລກຄາດໝາຍຂອງແຜນການທີ່ກຳນົດໄວ້ ທ່ານລັດຖະມົນຕີວ່າການ ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ກໍ່ອອກແຈ້ງການເຖິງບັນດາພາກສ່ວນຕ່າງໆ ໃນຂອບເຂດທົ່ວປະເທດ ຈົ່ງພ້ອມກັນຈັດຕັ້ງກັນປູກໄມ້ ເນື່ອງໃນໂອກາດວັນປູກໄມ້ແຫ່ງຊາດ ວັນທີ 1 ມິຖຸນາ 2015 ເປັນການຟື້ນຟູປ່າ ແລະ ເປັນການສ້າງຂະບວນການຕ້ອບຮັບວັນສຳຄັນຂອງຊາດ-ຂອງພັກ.
ສຳລັບການຈັດຕັ້ງປະຕິບັດແມ່ນໃຫ້ລະດົມພາກລັດ ແລະ ບັນດາພາກສ່ວນຫົວໜ່ວຍທຸລະກິດ ແລະ ພໍ່ແມ່ປະຊາຊົນ ດ້ວຍການສຸມໃສ່ສຳຫຼວດເນື້ອທີ່ເປົ່າວ່າງ ເນື້ອທີ່ປ່າປອກໂຫຼ້ນ ນຳໃຊ້ເຂົ້າໃນການປູກໄມ້ ເພື່ອເປັນການປົກປັກຮັກສາສິ່ງແວດລ້ອມ ແລະ ເນື້ອທີ່ເຂດປ່າໄມ້ເສື່ອມໂຊມ ແນໃສ່ປູກເສີມ ແລະ ຟື້ນຟູແບບທຳມະຊາດ ເພື່ອໃຫ້ກັບຄືນເປັນປ່າດົງຕຶບໜາ.
ສົມທົບກັບອຳນາດການປົກຄອງທ້ອງຖິ່ນ ຄົ້ນຄວ້າ ແລະ ກຳນົດເຂດປ່າປູກ ແລະ ພື້ນຟູປ່າ ເພື່ອປັກປັກຮັກສາສິ່ງແວດລ້ອມຢ່າງມີຈຸດສຸມ ແລະ ເປົ້າໝາຍຍາວນານ ເພື່ອປົກປັກຮັກສາແຫຼ່ງນ້ຳ ຍອດນ້ຳ ປ້ອງກັນເຂດທີ່ມີຄວາມສ່ຽງຕໍ່ດິນຖະຫຼົ່ມ ການເຊາະເຈື່ອນ ຫຼື ປ້ອງກັນໄພພິບັດທຳມະຊາດ ທີ່ອາດຈະເກີດຂຶ້ນໃນຕໍ່ໜ້າ ຄັດເລືອກເບັ້ຍໄມ້ທີ່ຈະນຳໄປປູກ ແມ່ນໃຫ້ມີຊະນິດໄມ້ພື້ນເມືອງ ແລະ ເປັນເບັ້ຍໄມ້ທີ່ແຂງແຮງ ທົນທານ ເໝາະສົມຕໍ່ສະພາບດິນຟ້າອາກາດ.
ພາຍຫຼັງສຳເລັດການປູກແລ້ວ ຕ້ອງມອບຄວາມຮັບຜິດຊອບໃຫ້ບຸກຄົນ ການຈັດຕັ້ງ ຫຼື ອົງການຈັດຕັ້ງມະຫາຊົນພາຍໃນທ້ອງຖິ່ນທີ່ມີເງື່ອນໄຂ ເປັນຜູ້ຮັບຜິດຊອບຄຸ້ມຄອງ ບົວລະບັດ ແລະ ປົກປັກຮັກສາປ່າປູກ ເຂດປ່າຟື້ນຟູ ເພື່ອໃຫ້ຕົ້ນໄມ້ທີ່ໄດ້ປູກແລ້ວນັ້ນຈະເລີນເຕີບໂຕ ພ້ອມທັງເອົາໃຈໃສ່ການປູກຊ້ອມຄືນຕົ້ນໄມ້ທີ່ຕາຍ ເພື່ອບໍ່ໃຫ້ບ່ອນທີ່ປູກນັ້ນວ່າງເປົ່າ ແລະ ໃຫ້ກາຍເປັນປ່າໄມ້ທີ່ອຸດົມສົມບູນໃນອະນາຄົດ.
ແຫລ່ງຂ່າວ: ວຽງຈັນໃໝ່