ຕະຫລາດຂົວດິນໃນໄລຍະກ່ອນນອນຢູ່ໃນສະພາບເປີະເປື້ອນ ເຕັມໄປດ້ວຍຄວາມແອອັດກໍໃຫ້ເກີດມີຫາງສຽງຈາກສັງຄົມ ແລະ ຜູ້ເຂົ້າມາໃຊ້ບໍລິການ, ແຕ່ມາຮອດປັດຈຸບັນຕະຫລາດດັ່ງກ່າວໄດ້ມີໂສມໜ້າໃໝ່, ຂະນະທີ່ຕະຫລາດໜອງຈັນ ຕັ້ງຢູ່ທິດເໜືອຕິດກັບຕະຫລາດຂົວດິນ ໄດ້ໃຫ້ຢຸດເຊົາກິດຈະການ, ເນື່ອງຈາກວ່າທາງນະຄອນຫລວງຈະນຳໃຊ້ເດີ່ນບໍລິເວນຕະຫລາດໜອງຈັນເກົ່າ ເຂົ້າສູ່ກິດຈະ ການໃໝ່, ໃຫ້ມີຄວາມເປັນລະບຽບຮຽບຮ້ອຍພາຍຫລັງອາຄານສູນການຄ້າວຽງຈັນເຊັນເຕີ້ ໄດ້ຮັບການສ້າງຕັ້ງ ແລະ ເປີດໃຫ້ບໍລິການຢ່າງເປັນທາງການແລ້ວ.
ການປັບປຸງຕະຫລາດຂົວດິນ ໄດ້ເລີ່ມມາແຕ່ທ້າຍເດືອນເມສາທີ່ຜ່ານມາ, ທາງຄະນະຈັດສັນໄດ້ທຳການເລີກຮື້ຮ້ານຂາຍຍ່ອຍປະເພດສິ້ນແພ, ທີ່ຕັ້ງຢູ່ສອງຝາກທາງເຂົ້າຕະຫລາດຂົວດິນ ແລ້ວທຳການສ້ອມແປງປູເບຕົ້ງຄືນໃໝ່, ສະເພາະທາງຍ່າງຢູ່ໃນບໍລິເວນຕະຫລາດກໍໄດ້ມີການປູເບຕົ້ງໃຫ້ມີລະບຽບຈົບງາມ. ສ່ວນຕະຫລາດໜອງຈັນຢູ່ທິດເໜືອຕິດກັບຕະຫລາດຂົວດິນແມ່ນຊາວຄ້າຂາຍສ່ວນໃຫຍ່ໄດ້ຢຸດກິດຈະການ ແລະ ກຽມຍົກຍ້າຍໄປບ່ອນອື່ນ ເພື່ອມ້າງອາຄານທີ່ເກົ່າແກ່ ແລະ ດຳເນີນການປັບປຸງເດີ່ນຢູ່ບໍລິເວນຕະຫລາດດັ່ງກ່າວເພື່ອຫັນໄປສູ່ກິດຈະການອື່ນໆທີ່ມີຜົນດີກວ່າ, ສ້າງຄວາມເປັນລະບຽບຮຽບຮ້ອຍ ແລະ ຈົບງາມກວ່າ, ສະເພາະໜອງຈັນ ກໍພວມຢູ່ໃນລະຫວ່າງການຖົມດິນ, ປັບໜ້າດິນໃຫ້ຮາບພຽງເພື່ອນຳໃຊ້ເຂົ້າໃນກິດຈະການອື່ນເຊັ່ນດຽວກັນ, ເຖິງຢ່າງໃດກໍດີສິ່ງທີ່ໜ້າເປັນຫວ່ງອີກບັນຫາໜຶ່ງແມ່ນການຈອດລົດຢູ່ທິດເໜືອຕິດກັບຕະຫລາດຂົວດິນຈາກໄຟແດງຄິວລົດເມ, ເສັ້ນທາງໄປທາດຝຸ່ນທາງພາກສ່ວນກ່ຽວຂ້ອງຍັງປ່ອຍປະລະເລີຍດ້ວຍການອະນຸຍາດໃຫ້ຝາກລົດຈັກລົດຖີບ, ຈຳໂບ້, ຕຸກໆລວມໄປເຖິງການຂາຍເຄື່ອງຍ່ອຍອື່ນໆໂດຍກວມເອົາເສັ້ນທາງທຽວ ເຂົ້າມານັບເປັນສິບກວ່າແມັດເຮັດໃຫ້ການສັນຈອນຢູ່ເສັ້ນທາງຈຸດນີ້ ມີຄວາມແອອັດ, ສ້າງຄວາມຫຍຸ້ງຍາກລຳບາກໃຫ້ແກ່ຍານພາຫະນະທີ່ສັນຈອນໄປມານັບເປັນຈຳນວນບໍ່ໜ້ອຍ. ດັ່ງນັ້ນຈຶ່ງສະເໜີໃຫ້ພາກ ສ່ວນກ່ຽວຂ້ອງກວດກາຄືນ ແລະ ທຳການຈັດສັນໃໝ່ໃຫ້ເຂົ້າສູ່ລະບຽບຫລັກການຕາມຄຳຂວັນ 6 ສ ຂອງນະຄອນ ຫລວງວຽງຈັນວາງອອກໃຫ້ປະກົດຜົນເປັນຈິງຢ່າງໄວວາ.
ແຫລ່ງຂ່າວ: ລາວພັດທະນາ