ນະຄອນຫຼວງວຽງຈັນ ຮ່ວມກັບພາກເອກກະຊົນຈະເລີ່ມລົງມືຮື້ຖອນ ແລະ ປັບປຸງສາຍໄຟຟ້າ ສາຍໂທລະສັບ ສາຍໂທລະພາບເຄເບີ້ນທີ່ຫຍຸ້ງກ້ຽວພັນເສົາໄຟຟ້າ ແລະ ຕົ້ນໄມ້ຕາມເສັ້ນທາງຕ່າງໆໃນນະຄອນຫຼວງວຽງຈັນ ໃຫ້ເຂົ້າສູ່ລະບົບພາຍໃນເດືອນນີ້ ພາຍຫຼັງກອງປະຊຸມປຶກສາຫາລື ແລະ ແລກປ່ຽນຄວາມຄິດເຫັນ ໄດ້ມີມະຕິຕົກລົງຈັດຕັ້ງປະຕິບັດຢ່າງເປັນທາງການ ໃນວັນທີ 19 ພຶດສະພາ 2015 ນີ້ ຢູ່ນະຄອນຫຼວງວຽງຈັນ.
ກອງປະຊຸມໄດ້ເຊີນຄະນະຊີ້ນຳນະຄອນຫຼວງວຽງຈັນ ບັນດາຫົວໜ່ວຍທຸລະກິດຂອງໂທລະຄົມມະນາຄົມ ໂທລະພາບເຄເບີ້ນ ແລະ ອົງການຈັດຕັ້ງທີ່ກ່ຽວຂ້ອງ ຮ່ວມກັນສົນທະນາ ແລະ ແລກປ່ຽນບົດຮຽນເພື່ອຫາທາງອອກໃນການແກ້ໄຂບັນຫາທີ່ເກີດຂຶ້ນ ພ້ອມນີ້ກໍ່ຕ້ອງຮັບຮູ້ ແລະ ເຂົ້າໃຈເປັນເອກະພາບໃນການລົງມືຈັດຕັ້ງປະຕິບັດຢ່າງເປັນຮູບ ປະທຳ.
ທ່ານ ຄູທອງ ທ່ຽງມະນີ ຫົວໜ້າຂະແໜງບໍລິຫານພະລັງງານ ແລະ ສົ່ງເສີມພະລັງງານທົດແທນ ໄດ້ໃຫ້ສຳພາດຕໍ່ນັກຂ່າວສຳນັກຂ່າວສານປະເທດລາວ ວ່າ: ເພື່ອປະຕິບັດ 6 ສ ກຽມໃສ່ 2 ວັນປະຫວັດສາດ ເປັນປະທານອາຊຽນ ແລະ ເປັນເຈົ້າພາບກອງປະຊຸມສຸດຍອດອາຊຽນ ພາຍໃນປີ 2015 ຢູ່ ສປປ ລາວ ນັ້ນ ພວກເຮົາມີຄວາມຈຳເປັນຕ້ອງໄດ້ປັບປຸງ ແລະ ແກ້ໄຂສິ່ງບໍ່ຈົບບໍ່ງາມ ແລະ ຄວາມບໍ່ເປັນລະບຽບຮຽບຮ້ອຍ ໂດຍສະເພາະບັນຫາສາຍໄຟຟ້າ ສາຍໂທລະສັບ ແລະ ໂທລະພາບເຄເບີ້ນ ທີ່ປາກົດເຫັນຕາມຈຸດຕ່າງໆໃນສະພາບຫຍຸ້ງກ້ຽວພັນ ແລະ ຂ້າມທາງຢັ່ງຢ່າຍຊະຊາຍ ເຊິ່ງກໍ່ໃຫ້ເກີດມີຄວາມສ່ຽງຕໍ່ການເກີດອັກຄີໄຟ ແລະ ສ້າງພາບພົດບໍ່ຈົບບໍ່ງາມໃຫ້ແຂກທັງພາຍໃນ ແລະ ຕ່າງປະເທດ.
ສະນັ້ນ ພວກເຮົາໄດ້ຕົກລົງເຫັນດີເປັນເອກະພາບວ່າ: ສາຍໄຟຟ້າຂ້າມທາງຢູ່ຕາມຈຸດຕ່າງໆນັ້ນ ຕ້ອງໄດ້ມັດໂຮມເຂົ້າຈຸດດຽວກັນ ແລະ ບໍ່ອະນຸຍາດໃຫ້ບໍລິສັດ ຫຼື ນິຕິບຸກໃດໜຶ່ງ ຕັດສິນໃຈເອົາສາຍໄຟຟ້າຂ້າມທາງຕາມລຳຟັງໃຈ ເພື່ອຮັບປະກັນເຮັດໃຫ້ສະພາບດັ່ງກ່າວໝົດໄປ.
ແຫລ່ງຂ່າວ: ວຽງຈັນໃໝ່