ການກໍ່ສ້າງເສັ້ນທາງເບຕົງເສີມເຫຼັກແຕ່ຫົວຂົວ-ໂນນຄໍ້-ຄຳສະຫວາດ ແລະ ນາຄວາຍ ເມືອງໄຊເຊດຖາ ນະຄອນຫຼວງວຽງຈັນ ທີ່ມີຄວາມຍາວ 7 ກິໂລແມັດ ໂດຍແມ່ນງົບປະມານຂອງລັດ ແລະ ໃຫ້ບໍລິສັດເອກະຊົນພາຍໃນເປັນຜູ້ຮັບເໝົາກໍ່ສ້າງ ແລະ ລົງທຶນກ່ອນ 100% ເຊິ່ງໂຄງການດັ່ງກ່າວໃນເບື້ອງຕົ້ນແມ່ນບໍລິສັດດຽວເປັນຜູ້ ຮັບເໝົາກໍ່ສ້າງ ແຕ່ການຈັດຕັ້ງປະຕິບັດມາໄລຍະໜຶ່ງເຫັນວ່າໂຄງການຫຼ້າຊ້າ ໜ້າວຽກບໍ່ມີຄວາມຄືບໜ້າ ດັ່ງນັ້ນ ຕໍ່ມາປະມານກາງປີ 2014 ພະແນກໂຍທາທິການ ແລະ ຂົນສົ່ງ ນະຄອນຫຼວງວຽງຈັນ ໃນນາມເຈົ້າຂອງໂຄງການ ກໍ່ຄືຜູ້ຄຸ້ມຄອງໂຄງການ ກໍ່ໄດ້ເຊື້ອເຊີນບໍລິສັດຜູ້ຮັບເໝົາມາປຶກສາຫາລື ໂດຍໄດ້ແບ່ງໃຫ້ໜຶ່ງບໍລິສັດມາຊ່ວຍ ໂດຍສອງບໍລິສັດນີ້ໄດ້ຕົກລົງແບ່ງຄວາມຮັບຜິດຊອບກັນ ບໍລິສັດໜຶ່ງປະຕິບັດ 3 ກິໂລແມັດ ແລະ ອີກບໍລິສັດໜຶ່ງ ຮັບຜິດຊອບ 4 ກິໂລແມັດ ເມື່ອແບ່ງກັນແລ້ວ ສອງບໍລິສັດກໍ່ໄດ້ພ້ອມກັນຈັດຕັ້ງປະຕິບັດກໍ່ເຫັນວ່າມີຄວາມ ຄືບໜ້າພໍສົມຄວນ ໂດຍສະເພາະແມ່ນບໍລິສັດທີ່ຮັບ ເໝົາແຕ່ຫົວຂົວ-ໂນນຄໍ້-ຄຳສະຫວາດ ມີຄວາມຍາວ 4 ກິໂລແມັດ ການເທເບຕົງໜ້າທາງໄດ້ປະຕິບັດຮອດ 3 ແຍກທາງໄປດົງຄຳຊ້າງ ຖືວ່າໄດ້ສ່ວນຫຼາຍແລ້ວ ແລະ ການດຳເນີນໂຄງການມາຮອດເດືອນກຸມພາ 2015 ທັງສອງບໍລິສັດໄດ້ຢຸດວຽກ ແລະ ເຮັດໃຫ້ໜ້າວຽກຍັງຄືເກົ່າຈົນມາຮອດປັດຈຸບັນນີ້.
ທ່ານ ເດດສົງຄາມ ທຳມະວົງ ຫົວໜ້າພະແນກໂຍທາທິການ ແລະ ຂົນສົ່ງ ນະຄອນຫຼວງວຽງຈັນ ໄດ້ໃຫ້ສຳພາດວັນທີ 14 ພຶດສະພາ 2015 ຜ່ານມານີ້ວ່າ: ຕໍ່ກັບໂຄງການກໍ່ສ້າງເສັ້ນທາງຢູ່ຕົວເມືອງນະຄອນຫຼວງວຽງຈັນ ມາຮອດປັດຈຸບັນມີຫຼາຍໂຄງການໄດ້ສຳເລັດ ບາງໂຄງການກຳລັງກໍ່ສ້າງ ແລະ ກໍ່ມີບາງໂຄງການບໍ່ມີຄວາມຄືບໜ້າ ໃນນັ້ນ ກໍ່ມີໂຄງການກໍ່ສ້າງເສັ້ນທາງຈີ່ນາຍໂມ້ ແລະ ໂຄງການກໍ່ສ້າງເສັ້ນທາງຫົວຂົວ-ໂນນຄໍ້-ຄຳສະຫວາດ ແລະ ນາຄວາຍ ທີ່ຫຼ້າຊ້າແກ່ຍາວມາຫຼາຍປີບໍ່ສຳເລັດ ເຮັດໃຫ້ການໄປມາມີຄວາມຫຍຸ້ງຍາກ ສາເຫດກໍ່ຍ້ອນຂາດງົບປະມານ ແລະ ຜູ້ລົງທຶນກ່ອນກໍ່ບໍ່ມີທຶນໝູນວຽນພຽງພໍແຕ່ ເຖິງຢ່າງໃດກໍ່ຕາມ ທາງເຈົ້າຂອງໂຄງການກໍ່ຈະພະຍາຍາມຊຸກຍູ້ໃຫ້ບໍລິສັດຜູ້ຮັບເໝົາ ຈັດຕັ້ງປະຕິບັດໃຫ້ສຳເລັດກ່ອນສະເຫຼີມສະຫຼອງວັນຊາດທີ 2 ທັນວາ ຄົບຮອບ 40 ປີ ແລະ ກອງປະຊຸມ ອາຊຽນ ຊຳມິດ 2016 ທີ່ ສປປ ລາວ ເປັນເຈົ້າພາບ ຕໍ່ກັບໂຄງການກໍ່ສ້າງເສັ້ນທາງຫົວຂົວ-ນາຄວາຍ ຖ້າພາຍໃນປີ 2015 ນີ້ຫາກບໍ່ສຳເລັດ ທາງເຈົ້າຂອງໂຄງການ ກໍ່ຄືທາງພະແນກ ຍທຂ ຈະໄດ້ໃຫ້ບໍລິສັດຜູ້ທີ່ມີຄວາມສາມາດມາຮັບເໝົາແທນບໍລິສັດ ເກົ່າ ທັງນີ້ກໍ່ເພື່ອເຮັດໃຫ້ໂຄງການກໍ່ສ້າງສຳເລັດ ແລະ ເຮັດໃຫ້ການສັນຈອນໄປມາຂອງພໍ່ແມ່ປະຊາຊົນເຂດດັ່ງກ່າວ ມີຄວາມສະດວກສະບາຍຈາກທີ່ມີຄວາມຫຍຸ້ງຍາກມາຫຼາຍປີແລ້ວ.
ແຫລ່ງຂ່າວ: ວຽງຈັນໃໝ່