ໃນໄລຍະຜ່ານມາພັກ ແລະ ລັດຖະບານພວກເຮົາ, ໄດ້ຖືເອົາວຽກງານຄຸ້ມຄອງ, ປົກປັກຮັກສາ ເລະ ພັດທະນາປ່າໄມ້ເປັນວຽກງານຍຸດທະສາດທີ່ສຳຄັນ, ໂດຍເລັ່ງໃສ່ວຽກງານປູກໄມ້ ແລະ ຟື້ນຟູປ່າ, ໃຫ້ທົ່ວປະເທດມີເນື້ອທີ່ປົກຫຸ້ມຂອງປ່າໄມ້ 70% ໃນປີ 2020, ຊຶ່ງສະເພາະປີ 2015 ນີ້ກໍໍໄດ້ກຳນົດຄາດໝາຍສູ້ຊົນໃຫ້ໄດ້ຄື: ເກັບແກ່ນໄມ້ໃຫ້ໄດ້ 15 ພັນກິໂລ, ຜະລິດເບ້ຍໄມ້ 25 ລ້ານເບ້ຍ, ປູກໄມ້ 30 ພັນເຮັກຕາ, ຟື້ນຟູປ່າຜະລິດ ແລະ ປ່າທີ່ບໍໄດ້ກຳນົດເຂົ້າໃນ 3 ປະເພດປ່າໃຫ້ໄດ້ 570.967 ເຮັກຕາ, ດ້ວຍການປູກໃສ່ດິນເປົ່າຫວ່າງຫຼືປອກລົ້ນ, ຟື້ນຟູດ້ວຍການປູກເສີມ ແລະ ດ້ວຍທຳມະຊາດຂອງມັນເອງ, ເພື່ອເຮັດໃຫ້ການຄຸ້ມຄອງ, ປົກປັກຮັກສາ, ພັດທະນາປ່າໄມ້ ແລະ ນຳໃຊ້ໄມ້ປູກມີຄວາມຮັດກຸມ, ເຂົ້າສູ່ລະບົບ, ເຮັດໃຫ້ການປູກໄມ້, ການຟື້ນຟູປ່າກາຍເປັນຂະບວນການ, ດັ່ງນັ້ນລັດຖະມົນຕີວ່າການກະຊວງກະສິກຳ ແລະ ປ່າໄມ້, ຈຶ່ງໄດ້ອອກແຈ້ງການສະບັບເລກທີ 0019, ລົງວັນທີ 7 ເດືອນພຶດສະພາ 2015 ເຖິງຫົວໜ້າພະແນກກະສິກຳ ແລະ ປ່າໄມ້ແຂວງ, ນະຄອນຫຼວງ, ບັນດາສຳນັກງານ, ອົງການ ແລະ ສະຖາບັນອອ້ມຂ້າງກະຊວງກະສິກຳ ແລະ ປ່າໄມ້, ຈົ່ງພ້ອມກັນສ້າງຂະບວນການປູກຕົ້ນໄມ້ ແລະ ຟື້ນຟູປ່າທຳມະຊາດ, ເນື່ອງໃນໂອກາດວັນປູກຕົ້ນໄມ້ແຫ່ງຊາດ 1 ມິຖຸນາ 2015 ດັ່ງນີ້:
- ໃຫ້ກົມປ່າໄມ້ສົມທົບກັບພະແນກກະສິກຳ ແລະ ປ່າໄມ້ປະຈຳແຂວງ, ນະຄອນຫລວງວຽງຈັນ ແລະ ຫ້ອງການກະສິກຳ ແລະ ປ່າໄມ້ປະຈຳເມືອງກວດກາ ແລະ ສັງລວມຄືນການປູກໄມ້ໃນສົກປີຜ່ານມາຕາມແຈ້ງການຂອງລັດຖະ ມົນຕີ ເລກທີ 0055/ກປ, ລົງວັນທີ 7 ພະຈິກ 2014 ແລະ 0056/ກປ, ລົງວັນທີ 07 ພະຈິກ 2014 ໂດຍສົມທຽບໃສ່ໂຕເລກແຜນການດັ່ງກ່າວວ່າສາມາດປະຕິບັດໄດ້ເທົ່າໃດ ? ໄປພ້ອມໆກັນນີ້ ກໍໃຫ້ດຳເນີນການຂຶ້ນທະບຽນສວນປູກໄມ້ຂອງລັດ, ບຸກຄົນ, ຄອບຄົວ, ກົມກອງລວມໝູ່, ການຈັດຕັ້ງ ແລະ ນັກລົງທຶນ ທີ່ໄດ້ປູກໃນປີຜ່ານມາ ໂດຍການລົງສຳຫລວດເກັບກຳຂໍ້ມູນຕົວຈິງ ລວມທັງຕິດຕາມເກັບກຳແຫລ່ງແກ່ນພັນໄມ້ທີ່ມີແລ້ວ ແລະ ແຫລ່ງແກ່ນພັນໄມ້ທີ່ພົບເຫັນໃໝ່ຢູ່ແຕ່ລະທ້ອງຖິ່ນ ແລະ ສ້າງແຜນການຕອບສະໜອງແກ່ນພັນໄມ້ ເພື່ອຜະລິດເບ້ຍໄມ້ໃນປີຕໍ່ໄປ.
- ໃຫ້ພະແນກກະສິກຳ ແລະ ປ່າໄມ້ປະຈຳແຂວງ ແລະ ນະຄອນຫລວງວຽງຈັນຄົ້ນຄວ້ານຳສະເໜີຕໍ່ອົງການປົກ ຄອງທ້ອງຖິ່ນຂັ້ນຂອງຕົນ ເພື່ອແຕ່ງຕັ້ງຄະນະຮັບຜິດຊອບວຽກງານປູກໄມ້ ແລະ ຟື້ນຟູປ່າ ໂດຍແມ່ນຂະແໜງກະສິກຳ ແລະ ປ່າໄມ້ເປັນໃຈກາງ ແລະ ມີການເຂົ້າຮ່ວມຂອງພາກສ່ວນກ່ຽວຂ້ອງຕາມຄວາມເໝາະສົມ, ພ້ອມທັງມອບໝາຍຄວາມຮັບຜິດຊອບຂາດຕົວໃຫ້ແກ່ຂະແໜງປ່າໄມ້, ໜ່ວຍງານສົ່ງເສີມປູກໄມ້ ແລະ ການລົງທຶນດ້ານປ່າໄມ້, ຫ້ອງການກະສິກຳ ແລະ ປ່າໄມ້ປະຈຳເມືອງ, ໜ່ວຍງານປ່າໄມ້ເຂດ ຈັດຕັ້ງວຽກງານສົ່ງເສີມປູກໄມ້ ແລະ ການລົງທຶນປ່າໄມ້ ໂດຍມີການແຕ່ງຕັ້ງພະນັກງານວິຊາການເພື່ອລົງຊຸກຍູ້ສົ່ງເສີມດ້ານເຕັກນິກວິຊາການປູກໄມ້ໃຫ້ບັນດາໂຄງການປູກໄມ້ຂອງລັດ, ບໍລິສັດ, ຜູ້ປະກອບການ ແລະ ກະສິກອນ ຮູ້ໄດ້ເຖິງເຕັກນິກການບົວລະບັດ, ການປົກປັກຮັກສາຕົ້ນໄມ້ທີ່ໄດ້ປູກແລ້ວໃຫ້ເຕີບໃຫຍ່ ແລະ ດຳເນີນການປູກທົດແທນຕົ້ນໄມ້ທີ່ຕາຍເພື່ອຮັກສາອັດຕາການລອດຕາຍຂອງເບ້ຍໄມ້ ແນໃສ່ເຮັດໃຫ້ການປູກໄມ້ ແລະ ຟື້ນຟູປ່າທຳມະຊາດກາຍເປັນຮູບປະທຳ ແລະ ມີປະສິດທິຜົນກວ່າເກົ່າ.
- ໃຫ້ພະແນກກະສິກຳ ແລະ ປ່າໄມ້ປະຈຳແຂວງ ແລະ ນະຄອນຫລວງວຽງຈັນ ຊີ້ນຳຫ້ອງການກະສິກຳ ແລະ ປ່າໄມ້ປະຈຳເມືອງສົມທົບກັບອົງການປົກຄອງເມືອງ ກຳນົດເຂດປູກໄມ້ ແລະ ຟື້ນຟູປ່າໄມ້ ເພື່ອປົກປັກຮັກສາສິ່ງແວດລ້ອມຢ່າງມີຈຸດສຸມ ແລະ ເປົ້າໝາຍຍາວນານ ແນໃສ່ຮັກສາແຫລ່ງນ້ຳ, ປ້ອງກັນເຂດທີ່ມີຄວາມສ່ຽງຕໍ່ດິນຖະຫລົ່ມ ຫລື ການເຊາະເຈື່ອນ ແລະ ປ້ອງກັນໄພທຳມະຊາດທີ່ອາດຈະເກີດຂຶ້ນໃນຕໍ່ໜ້າ. ພ້ອມກັນນັ້ນ ກໍໃຫ້ດຳເນີນການຂຶ້ນທະບຽນສວນປູກໄມ້ຕາມເງື່ອນໄຂ ແລະ ລະບຽບການທີ່ໄດ້ກຳນົດໄວ້ໃນຄຳສັ່ງແນະນຳຂອງລັດຖະມົນຕີ ເລກທີ 1849/ກປ.99, ລົງວັນທີ 7 ຕຸລາ 1999 ແລ້ວສັງລວມລາຍງານກົມປ່າໄມ້ຮັບຊາບເປັນແຕ່ລະໄລຍະ.
- ໃຫ້ກົມປ່າໄມ້ ພະແນກກະສິກຳ ແລະ ປ່າໄມ້ປະຈຳແຂວງ ແລະ ນະຄອນຫລວງວຽງຈັນ ເປັນເຈົ້າການໂຄສະ ນາເຜີຍແຜ່ບັນດານະໂຍບາຍ ແລະ ລະບຽບກົດໝາຍກ່ຽວກັບການປູກໄມ້, ຟື້ນຟູປ່າທຳມະຊາດ ໂດຍຜ່ານສື່ມວນຊົນ (ໜັງສືພິມ, ວິທະຍຸ, ໂທລະພາບ), ປາຖະກະຖາ ແລະ ຈັດຕັ້ງຂະບວນການຕ່າງໆ ເພື່ອໃຫ້ທົ່ວປວງຊົນ ຕະຫລອດເຖິງສຳນັກງານ, ອົງການຈັດຕັ້ງມະຫາຊົນ, ທະຫານ, ຕຳຫລວດ, ໂຮງຮຽນ, ໂຮງໝໍ ລວມໝູ່, ບໍລິສັດ ໄດ້ຮັບຮູ້, ເຊື່ອມຊຶມ ແລະ ເຫັນໄດ້ເຖິງຄວາມສຳຄັນຂອງວຽກງານປ່າໄມ້ ໂດຍສະເພາະການປູກໄມ້, ການຟື້ນຟູປ່າໄມ້ທຳມະຊາດ, ການປົກປັກຮັກສາປ່າໄມ້, ການປົກປັກຮັກສາສິ່ງແວດລ້ອມ ແລະ ການປ້ອງກັນໄຟໄໝ້ລາມປ່າ.
- ໃຫ້ຂະແໜງປ່າໄມ້ປະຈຳແຂວງ, ນະຄອນຫລວງວຽງຈັນ ເປັນເຈົ້າການເກັບກຳ ແລະ ສັງລວມສະຖິຕິເບ້ຍໄມ້ທີ່ຜະລິດໄດ້, ການກະກຽມເນື້ອທີ່ປູກ ແລະ ເນື້ອທີ່ຟື້ນຟູ ໂດຍແຍກລະອຽດແຕ່ລະຊະນິດໄມ້ທີ່ຜະລິດ, ເບ້ຍໄມ້ທີ່ຈະປູກໃນແຕ່ລະເຂດ, ເຂດທີ່ຈະປູກ ຫລື ຟື້ນຟູ (ບ້ານ, ເມືອງ), ປະເພດປ່າທີ່ຈະຟື້ນຟູ, ວັນ, ເວລາ ແລະ ສະຖານທີ່ຈະຈັດພິທີປູກຕົ້ນໄມ້ໃນທ້ອງຖິ່ນຕົນ ລວມທັງເປົ້າໝາຍທີ່ຈະເຊີນເຂົ້າຮ່ວມ ແລ້ວລາຍງານກົມປ່າໄມ້ (ພະແນກສົ່ງເສີມປູກໄມ້ ແລະ ການລົງທຶນປ່າໄມ້) ເພື່ອສັງລວມລາຍງານການນຳກະຊວງໄດ້ຮັບຊາບເປັນແຕ່ລະໄລຍະ.
- ສຳລັບພັນໄມ້ທີ່ຈະປູກນັ້ນ ໂດຍທົ່ວໄປໃຫ້ຖືເອົາຊະນິດໄມ້ພື້ນເມືອງທີ່ເປັນເສດຖະກິດ, ເໝາະສົມກັບສະ ພາບແວດລ້ອມຂອງແຕ່ລະທ້ອງຖິ່ນ, ຊະນິດພັນໄມ້ທີ່ຮັກສາແຫລ່ງນ້ຳ, ເບ້ຍໄມ້ທີ່ແຂງແຮງ ແລະ ທົນທານ. ສ່ວນການປູກໄມ້ຢູ່ສຳນັກງານຫ້ອງການແມ່ນໃຫ້ເນັ້ນໃສ່ຊະນິດພັນໄມ້ປະດັບ, ໄມ້ໃຫ້ໝາກ, ໄມ້ທີ່ເປັນຮົ່ມລຳຕົ້ນບໍ່ສູງ ແລະ ຊະນິດພັນໄມ້ທີ່ປົກປັກຮັກສາສິ່ງແວດລ້ອມ.
- ສຳລັບການຈັດຕັ້ງພິທີປູກໄມ້ ເນື່ອງໃນວັນປູກຕົ້ນໄມ້ແຫ່ງຊາດ ວັນທີ 1 ມິຖຸນາ 2015 ນີ້ ໃຫ້ອີງໃສ່ສະພາບເງື່ອນໄຂທີ່ເໝາະສົມຂອງແຕ່ລະທ້ອງຖິ່ນ ໂດຍເນັ້ນໃສ່ເນື້ອໃນປຸກລະດົມເປັນຕົ້ນຕໍ ບົນພື້ນຖານປະຢັດມັດທະຍັດ ແລະ ຕ້ານການຟຸມເຟືອຍ. ສ່ວນທ້ອງຖິ່ນໃດ ຫລື ບ່ອນໃດທີ່ມີເງື່ອນໄຂແມ່ນໃຫ້ເລີ່ມລົງມືປູກແຕ່ດຽວນີ້ຈົນເຖິງທ້າຍເດືອນກັນຍາ 2015 ໂດຍບໍ່ໃຫ້ລໍຖ້າວັນທີ 1 ມິຖຸນາ.
- ໃຫ້ພະແນກກະສິກຳ ແລະ ປ່າໄມ້ປະຈຳແຂວງ ແລະ ນະຄອນຫລວງວຽງຈັນ, ຫ້ອງການກະສິກຳ ແລະ ປ່າໄມ້ປະຈຳເມືອງ ຄົ້ນຄວ້າກ່ຽວກັບຜົນງານຂອງບຸກຄົນ, ຄອບຄົວ, ລວມໝູ່, ກົມກອງ ແລະ ການຈັດຕັ້ງ ທີ່ໄດ້ປະກອບ ສ່ວນເຫື່ອແຮງ ແລະ ທຶນຮອນເຂົ້າໃນການຄຸ້ມຄອງ ແລະ ບົວລະບັດຮັກສາປ່າປູກ ແລະ ຟື້ນຟູປ່າ ເພື່ອນຳສະເໜີຂັ້ນເທິງພິຈາລະນາຍ້ອງຍໍ ດ້ວຍກຽດຕິຄຸນ, ວັດຖຸພັນ ແລະ ອື່ນໆ ຕາມທີ່ໄດ້ກຳນົດໄວ້ໃນດຳລັດຂອງນາຍົກລັດຖະມົນຕີ ເລກທີ 121/ນຍ, ລົງວັນທີ 24 ກຸມພາ 2010 ວ່າດ້ວຍການເພີ່ມທະວີວຽກງານແຂ່ງຂັນ-ຍ້ອງຍໍໃນໄລຍະໃໝ່.
- ໃຫ້ພະແນກກະສິກຳ ແລະ ປ່າໄມ້ປະຈຳແຂວງ, ນະຄອນຫລວງວຽງຈັນ ຊີ້ນຳຫ້ອງການກະສິກຳ ແລະ ປ່າໄມ້ປະຈຳເມືອງ ເພື່ອລົງສົມທົບກັບອົງການປົກຄອງບ້ານ ແລະ ພາກສ່ວນກ່ຽວຂ້ອງຈັດຕັ້ງເຜີຍ ແຜ່ ແລະ ເສື່ອມຊຶມແຈ້ງການສະບັບນີ້ຢ່າງທົ່ວເຖິງ ແລະ ໃຫ້ໄດ້ຮັບຜົນດີ. ຜ່ານການຈັດຕັ້ງປະຕິບັດມີຂໍ້ ສະດວກ ແລະ ຫຍຸ້ງຍາກແນວໃດໃຫ້ລາຍງານການນຳກະຊວງຮັບຊາບເພື່ອຫາວິທີແກ້ໄຂຢ່າງທັນ ການ.
ແຫລ່ງຂ່າວ: ລາວພັດທະນາ