ສະຫະລັດອາເມລິກາໄດ້ຕົກລົງໃຫ້ທຶນຊ່ວຍເຫລືອວຽກງານຄົນພິການລາວຕື່ມອີກ 1,5 ລ້ານກວ່າໂດລສະຫະ ລັດ ຫລື ປະມານ 12 ຕື້ກວ່າກີບ, ຊຶ່ງພິທີລົງນາມການ ໃຫ້ທຶນຊ່ວຍເຫລືອດັ່ງກ່າວໄດ້ມີຂຶ້ນໃນວັນທີ 8 ພຶດສະພານີ້, ຢູ່ນະຄອນຫລວງ ວຽງຈັນລະຫວ່າງ ທ່ານ ດານຽວເອ ຄລຼຸນ ເອກອັກຄະລັດຖະທູດສະ ຫະລັດອາ ເມລິກາປະຈຳລາວ ແລະ ທ່ານ ໂຄແລັດ ແມັກອິນເນີນີ ຫົວໜ້າອົງການການ ສຶກສາໂລກ(World Education)ປະຈຳລາວ, ເພື່ອສະໜັບສະໜູນສະມາຄົມ ຄົນພິການໃນລາວ ແລະ 3 ອົງການຈັດຕັ້ງທີ່ບໍ່ຂຶ້ນກັບລັດຖະບານນຳໃຊ້ເຂົ້າໃນການພັດທະນາຂີດຄວາສາມາດ ໃນຂະ ແໜງຄົນພິການ ແລະ ຊ່ວຍເຫລືອໂດຍກົງແກ່ຜູ້ພິການຢູ່ລາວທີ່ມີປະມານ 150 ພັນຄົນ.
ທູດອາເມລິກາປະຈຳລາວ ກ່າວວ່າ: ທຶນຊ່ວຍເຫລືອຄັ້ງນີ້, ແມ່ນໄດ້ມາຈາກການປະກອບສ່ວນຂອງປະປາຊົອາເມລິ ກາ, ເພື່ອຊ່ວຍເຫລືອຄົນພິການໃນລາວໃຫ້ມີສຸຂະພາບເຂັ້ມແຂງ, ສາມາດດຳລົງຊີວິດໄດ້ຢ່າງເປັນປົກກະຕິ ແລະ ທັງສາ ມາດປະ ກອບສ່ວນເຂົ້າໃນການພັດທະນາວຽກງານຕ່າງໆຂອງສັງຄົມໄດ້ຫລາຍຂຶ້ນ, ຊຶ່ງແມ່ນສ່ວນໜຶ່ງຂອງຈຳນວນເງິນ 5 ລ້ານໂດລາ ສະຫະລັດ ທີ່ອົງການພັດທະນາລະຫວ່າງປະເທດຂອງສະຫະລັດອາເມລິກາ (USAID) ໄດ້ມອບໃຫ້ແກ່ອົງການເວີວີຊັນ
ຢູ່ລາວແຕ່ປີ 1914 ແລະ ໄດ້ແບ່ງໃຫ້ບັນດາອົງການຈັດຕັ້ງທີ່ບໍ່ຂຶ້ນກັບລັດຖະບານທັງພາຍໃນ ແລະ ສາ ກົນເພື່ອນຳໃຊ້ເຂົ້າໃນ ການຈັດຕັ້ງປະຕິບັດວຽກງານພັດທະນາຄົນພິການຢູ່ລາວເປັນຕົ້ນ: ຝຶກອົບຮົມດ້ານການແພດ ແລະ ພະນັກງານບຳບັດຄົນພິ ການ, ຊ່ວຍເຫລືອຄົນພິການໃຫ້ມີໂອກາດທາງດ້ານບໍລິຫານເສດຖະກິດເພື່ອຄົນພິການດ້ວຍກັນ, ຊ່ວຍເຫລືອດ້ານເຕັກໂນ ໂລຊີ, ຟື້ນຟູດ້ານການແພດ ແລະ ກາຍຍະພາບບຳບັດ, ເພື່ອຮັບປະກັນໃຫ້ຄົນພິການມີໂອ ກາດໄດ້ຮັບການພັດທະນາຕົນເອງ, ຄອບຄົວ, ບໍລິຫານວຽກງານຢ່າງປົກກະຕິ ແລະ ໄດ້ຮັບສິດທິເທົ່າທຽມດ້ານຕ່າງໆໃນສັງຄົມເໝືອນກັບຄົນປົກກະຕິ.
ທຶນຊ່ວຍເຫລືອຫວ່ງທຳອິດນີ້, ຈະຖືກນຳໃຊ້ເຂົ້າໃນການຝຶກອົບຮົມກ່ຽວກັບການລະບຸອາການຂອງເດັກອ່ອນແອໃນ ເບື້ອງຕົ້ນໃຫ້ພະນັກງານແພດຈຳນວນ 65 ຄົນ, ການກວດກາພະຍາດໃຫ້ແກ່ຄົນພິການຫລາຍກວ່າ 900 ຄົນ ແລະ ຊ່ວຍຄົນພິການ 530 ຄົນໃຫ້ສາມາດພັດທະນາເສດຖະກິດເພື່ອຄົນພິການດ້ວຍກັນ. ສ່ວນທຶນຊ່ວຍເຫລືອໃນບ້ວງຕໍ່ໄປຄາດວ່າຈະມີຂຶ້ນໃນເດືອນມີຖຸນາ 2015 ແລະ ຕົ້ນເດືອນມັງກອນ 2016 ຈະມາເຖິງນີ້.
ຫົວໜ້າອົງການການສຶກສາໂລກປະຈຳລາວ ກ່າວວ່າ: ຕະຫລອດໄລຍະ 23 ປີຜ່ານມາ, ອົງການພວກເຮົາໄດ້ດຳເນີນ ວຽກງານໃນຫລາຍຂົງເຂດເຊັ່ນ: ຊ່ວຍເຫລືອປັບປຸງທາງດ້ານການແພດສຸກເສີນ, ຈັດຝຶກອົບຮົມກ່ຽວກັບການປະສູດ, ສ້າງຕັ້ງກອງທຶນບ້ານ, ໃຫ້ຄວາມຮູ້ກ່ຽວກັບຄວາມອັນຕະລາຍຂອງລະເບີດບໍ່ທັນແຕກຢູ່ຕາມໂຮງຮຽນຫລາຍກວ່າ 2300 ແຫ່ງໃນ 11 ແຂວງໃນລາວ ແລະ ໃຫ້ການຊ່ວຍເຫລືອຜູ້ເຄາະຮ້າຍຈາກລະເບີດບໍ່ທັນແຕກນຳດ້ວຍ.
ແຫລ່ງຂ່າວ: ລາວພັດທະນາ