ທ່ານ ສົມສະຫວາດ ເລັ່ງສະຫວັດ ຮອງນາຍົກລັດຖະມົນຕີ ຜູ້ຊີ້ນຳວຽກງານເສດຖະກິດ ການຜະລິດ ແລະ ຈໍລະຈອນ ພ້ອມດ້ວຍຄະນະ ໄດ້ໄປຕິດຕາມຄວາມຄືບໜ້າໂຄງການກໍ່ສ້າງຂົວມິດຕະພາບ ລາວ-ມຽນມາ ໃນວັນທີ 1 ພຶດສະພາ 2015 ເນື່ອງໃນໂອກາດທີ່ໄດ້ເດີນທາງໄປເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງຫຼວງນ້ຳທາ ໂດຍການຕ້ອນຮັບຈາກອຳນາດການປົກຄອງທ້ອງຖິ່ນ ແລະ ຄະນະຮັບຜິດຊອບໂຄງການ.
ຕາງໜ້າຄະນະຮັບຜິດຊອບ ໂຄງການກໍ່ສ້າງຂົວມິດຕະພາບ ລາວ-ມຽນມາ ໄດ້ລາຍງານວ່າ: ໂຄງການກໍ່ສ້າງຂົວມິດຕະພາບ ລາວ-ມຽນມາ ເປັນຂົວມິດຕະພາບແຫ່ງທຳອິດລະຫວ່າງສອງປະເທດ ທັງເປັນຈຸດເຊື່ອມຕໍ່ສຳຄັນໜຶ່ງຕາມແລວເສດຖະກິດຕາເວັນ ອອກ-ຕາເວັນຕົກ ໂຄງການນີ້ໄດ້ເລີ່ມສຳຫຼວດອອກແບບມາແຕ່ເດືອນພຶດສະພາ ແລະ ສຳເລັດໃນເດືອນທັນວາ 2012 ມາຮອດວັນທີ 16 ກຸມພາ 2013 ໄດ້ຈັດພິທີວາງສີລາເລີກກໍ່ສ້າງເປັນທາງການ ທີ່ຕັ້ງຢູ່ບ້ານຫ້ວຍກຸ່ມ ເມືອງລອງ ແຂວງຫຼວງນ້ຳທາ ເຊື່ອມຕໍ່ເຂົ້າຫາບ້ານຊຽງລາບ ເມືອງ Keng Tung ສສ.ມຽນມາ ຂົວດັ່ງກ່າວຍາວ 691,6 ແມັດ ໜ້າທາງກວ້າງ 8,5 ແມັດ ມີທາງຍ່າງເບື້ອງລະ 1,2 ແມັດ ແບ່ງເປັນສອງໂຄງສ້າງຄື: ໂຄງສ້າງເຫຼັກ 3 ໄລຍະ ໄລຍະລະ 120 ແມັດ ນອກນັ້ນແມ່ນໂຄງສ້າງເບຕົງເສີມເຫຼັກ ໃນນີ້ໄດ້ແບ່ງຄວາມຮັບຜິດຊອບໃນການກໍ່ສ້າງໃຫ້ແກ່ທັງສອງຝ່າຍເປັນ ຜູ້ຈັດຕັ້ງປະຕິບັດ ເຊິ່ງນັບຈາກຈຸດໃຈກາງຂອງຂົວມາຫາຝັ່ງຂອງປະເທດຕົນ ລວມມູນຄ່າການກໍ່ສ້າງ 26 ລ້ານໂດລາສະຫະລັດ ຫຼື ປະມານ 208 ຕື້ກີບ ໂດຍແມ່ນທຶນສົມທົບຂອງລັດຖະບານລາວ ແລະ ມຽນມາ ໃນໄລຍະການກໍ່ສ້າງ 30 ເດືອນ ນອກນີ້ທັງສອງຝ່າຍຍັງໄດ້ກໍ່ສ້າງດ່ານຂອງຕົນ ແລະ ກໍ່ສ້າງເສັ້ນທາງເຂົ້າຫາດ່ານອີກຈຳນວນໜຶ່ງ ທັງສອງຝ່າຍໄດ້ສູ້ຊົນປະຕິບັດໂຄງການສຳເລັດກ່ອນຄາດໝາຍ ແລະ ຈະໄດ້ເປີດນຳໃຊ້ຢ່າງເປັນທາງການໃນວັນທີ 9 ພຶດສະພາ 2015 ທີ່ຈະມາເຖິງນີ້.
ໂອກາດນີ້ ທ່ານ ສົມສະຫວາດ ເລັ່ງສະຫວັດ ກໍ່ໄດ້ເນັ້ນໃຫ້ຄະນະຮັບຜິດຊອບໂຄງການ ໂດຍສະເພາະໃນຕໍ່ໜ້າ ຕ້ອງໄດ້ວາງແຜນໃນການຄຸ້ມຄອງຂົວທັງທາງດ້ານ ເຕັກນິກ ນິຕິກຳ ສອງຝ່າຍທີ່ຕ້ອງໄດ້ກຳນົດຮ່ວມກັນ ລວມເຖິງຄະນະຮັບຜິດຊອບຕົວຈິງ ດ້ານໜຶ່ງ ກໍ່ຕ້ອງເປີດໂອກາດໃຫ້ປະຊາຊົນຂອງສອງປະເທດໄດ້ເຂົ້າມາຢ້ຽມຊົມ ເພື່ອເປັນການປຸກລະດົມຈິດໃຈ ກໍ່ຄືຄວາມພາກພູມໃຈຂອງປະຊາຊົນສອງຊາດ ລາວ-ມຽນມາ ຕໍ່ກັບຜົນສຳເລັດຂອງລັດຖະບານທັງສອງປະເທດ ໃນການສ້າງຂົວມິດຕະພາບແຫ່ງດັ່ງກ່າວ.
ແຫລ່ງຂ່າວ: ວຽງຈັນໃໝ່