ຂປລ.ໃນຕອນເຊົ້າວັນທີ 2 ພຶດສະພາ 2015 ກົງກັບວັນເພັງ 15 ຄ່ຳ ເດືອນ 6 ພສ 2558 ໄດ້ມີພິທີຍົກຍອດຊໍ່ຟ້າ ພິພິທະພັນຫໍພະແກ້ວ, ໂດຍເປັນກຽດເຂົ້າຮ່ວມຂອງ ທ່ານ ຈູມມາລີ ໄຊຍະສອນ ປະທານປະເທດ, ທ່ານ ດຣ. ພັນຄຳ ວິພາວັນ ຮອງນາຍົກລັດຖະມົນຕີ, ຜູ້ ຊີ້ນຳວຽກງານຂົງເຂດວັດທະນະທຳ-ສັງຄົມ, ມີບັນດາລັດຖະມົນຕີວ່າການ, ຊ່ວຍວ່າການ, ພ້ອມດ້ວຍມວນຊົນ ເຂົ້າຮ່ວມຢ່າງຫລວງຫລາຍ.
ກ່ອນເລີ່ມພິທີຍົກຍອດຊໍ່ຟ້າ ທ່ານປະທານປະເທດ ໄດ້ຮັບກຽດໄຕ້ທຽນ ເອົາເລີກງາມຍາມດີ, ຕໍ່ດ້ວຍພິທີທາງສາສະໜາ, ຈາກນັ້ນ ທ່ານ ດຣ. ພັນຄຳ ວິພາວັນ, ທ່ານ ສຈ.ດຣ. ບໍ່ແສງຄຳ ວົງດາລາ ລັດຖະມົນຕີວ່າການກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ, ພ້ອມດ້ວຍທ່ານ ດຣ. ສິນລະວົງ ຄຸດໄພທູນ ເຈົ້າຄອງນະຄອນຫລວງວຽງຈັນ ໄດ້ຖືຍອດຊໍ່ຟ້າ 3 ຍອດໃຫຍ່ ແຫ່ອ້ອມຫໍພະແກ້ວ 3 ຮອບ ເຊິ່ງນຳພາໂດຍ ພະອາຈານໃຫຍ່ 9 ອົງ ແລະ ຕິດຕາມດ້ວຍມວນຊົນຈຳນວນຫລວງຫລາຍ, ຈາກນັ້ນທ່ານປະທານປະເທດ ກໍໄດ້ເປັນກຽດລັ່ນຄ້ອງ 9 ບາດ ແລະ ກົດປຸ່ມ ຍົກຍອດຊໍ່ຟ້າຂຶ້ນສູ່ແທ່ນຫລັງຄາ ຫໍພະແກ້ວ ເປັນອັນສຳເລັດພິທີ.
ທ່ານ ສາຍທອງ ແກ້ວດວງດີ ຮອງເຈົ້າຄອງນະຄອນຫລວງວຽງຈັນ ຫົວໜ້າຄະນະຮັບຜິດຊອບໂຄງການບູລະນະປະຕິສັງຂອນ ຫໍພະແກ້ວ ໃຫ້ຮູ້ວ່າ: ໂຄງການປະຕິສັງຂອນ ຫໍພະແກ້ວ ເປັນຄັ້ງທີ III, ໂດຍໄລຍະທີ 1 ໄດ້ເລີ່ມ ມາຕັ້ງແຕ່ຕົ້ນເດືອນມັງກອນ 2015 ໄລຍະ 4 ເດືອນຜ່ານມາ ບັນດາໜ້າວຽກຕ່າງໆໄດ້ສຳເລັດຕາມແຜນການ. ສ່ວນທາງຄະນະກຳມະການ ກໍສາມາດປຸກລະດົມວັດຖຸປັດໄຈ ໃນທົ່ວສັງຄົມ ເພື່ອສົມທົບທຶນ ປະຕິສັງຂອນ ພິພິທະພັນຫໍພະແກ້ວ ໄດ້ຈຳນວນ 1 ຕື້ກວ່າກີບ, 2 ແສນກວ່າບາດ, 15 ພັນກວ່າໂດລາສະຫະລັດ, ຄຳ 3 ກິໂລ ແລະ ວັດຖຸອື່ນໆອີກ. ສຳລັບການດຳເນີນໂຄງການປະຕິສັງຂອນ ພິພິທະ ພັນຫໍພະແກ້ວໃນຕໍ່ໜ້າ(ໄລຍະ 2)ແມ່ນຈະສືບຕໍ່ວຽກຫລັງຄາ, ແກະໄມ້ສະລັກບານປະຕູ, ປ່ອງຢ້ຽມ, ວຽກປູກະໂລ, ສ້ອງແປງຕາມຈຸດແຕກ ຢູ່ເສົາ ແລະ ຝາ, ຕິດຄຳປິວປະຕູກາງ, ປະຕູເຂົ້າ-ອອກ, ສ້າງແທ່ນປະດິດສະຖານ ພະແກ້ວມໍລະກົດຈຳລອງ ແລະ ອື່ນໆ ຄາດວ່າຈະໃຫ້ສຳເລັດໃນເດືອນທັນວາປີນີ້.
ທ່ານ ສາຍທອງ ແກ້ວດວງດີ ໃຫ້ຮູ້ອີກວ່າ: ຫໍພະແກ້ວມໍລະກົດ ໄດ້ຮັບການສ້າງຕັ້ງຂຶ້ນເມື່ອປີ 1570, ຫລັງຄາມຸງດ້ວຍທອງແດງ, ຍອດຊໍ່ຟ້າເຮັດດ້ວຍຄຳທັງໝົດ ແຕ່ຍ້ອນມີເສິກສົງຄາມຮຸກຮານທຳລາຍ ຈຶ່ງ ເຮັດໃຫ້ມີຄວາມເສຍຫາຍ ແລະ ເປ່ເພ, ມາເຖິງປັດຈຸບັນ ໄດ້ມີການປະຕິສັງຂອນແລ້ວ 3 ຄັ້ງ: ຄັ້ງທີໜຶ່ງເມືອງປີ 1816, ຄັ້ງທີສອງເມື່ອປີ 1936 ແລະ ຄັ້ງທີສາມປີ 2015 ແລະ ຄາດວ່າອີກ 100 ປີຂ້າງໜ້າຈຶ່ງຈະໄດ້ຮັບການປະຕິສັງຂອນຕື່ມອີກ.
ແຫລ່ງຂ່າວ: ສຳນັກຂ່າວສານປະເທດລາວ