ສະຫາຍ ດຣ. ວິໄລວົງ ບຸດດາຄຳ ເລຂາຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ (ຊປປລ) ພ້ອມດ້ວຍຄະນະບໍລິຫານງານຊາວໜຸ່ມ ບັນດາກະຊວງອົງການອ້ອມຂ້າງສູນກາງ ໄດ້ຕາງໜ້າໃຫ້ສະມາຊິກຊາວໜຸ່ມ ກໍ່ຄືຊາວໜຸ່ມເຍົາວະຊົນບັນດາເຜົ່າທົ່ວປະເທດ ເຂົ້າວາງພວງມາລາ ແລະ ກະຕ່າດອກໄມ້ ໃນໂອກາດສະເຫຼີມສະຫຼອງວັນສ້າງຕັ້ງຄະນະບໍລິຫານງານຊາວໜຸ່ມ ປະຊາຊົນປະຕິວັດລາວ ຄົບຮອບ 60 ປີ (14/4/1955-14/4/2015) ຕອນເຊົ້າວັນທີ 27 ເມສາ 2015.
ໃນເວລາ 6:30 ໂມງ ໄດ້ເຂົ້າວາງພວງມາລາຢູ່ອານຸສາວະລີນັກຮົບນິລະນາມ (ດາວແດງ) ເວລາ 6:45 ໂມງ ໄດ້ເຂົ້າວາງກະຕ່າດອກໄມ້ຢູ່ຫໍພິພິທະພັນ ໄກສອນ ພົມວິຫານ ແລະ ເວລາ 7:30 ໂມງ ໄດ້ເຂົ້າວາງກະຕ່າດອກໄມ້ ຢູ່ຫໍພິພິທະພັນ ສຸພານຸວົງ.
ການເຂົ້າວາງພວງມາລາ ແລະ ກະຕ່າດອກໄມ້ຄັ້ງນີ້ ແມ່ນເພື່ອເປັນການສະແດງເຖິງຄວາມເຄົາລົບຮັກ ກະຕັນຍູຮູ້ບຸນຄຸນຕໍ່ຄຸນງາມຄວາມດີ ແລະ ນ້ຳໃຈຕໍ່ສູ້ຢ່າງພິລະອາດຫານ ບໍ່ຍອມຈຳນົນຂອງບັນພະບູລຸດລາວ ກໍ່ຄືບັນດານັກຮົບປະຕິວັດທີ່ເສຍສະຫຼະຊີວິດ ເລືອດເນື້ອ ເພື່ອປະເທດຊາດ ແລະ ປະຊາຊົນ ເປັນການສະແດງເຖິງຄວາມເຄົາລົບຮັກ ກະຕັນຍູຮູ້ບຸນຄຸນອັນລົ້ນເຫຼືອຕໍ່ຄຸນງາມຄວາມດີ ແລະ ຜົນງານອັນໃຫຍ່ຫຼວງຂອງຜູ້ນຳທີ່ແສນເຄົາລົບຮັກ ຂອງປວງຊົນລາວທັງຊາດ ທີ່ໄດ້ອຸທິດຕະຫຼອດຊີວິດໃຫ້ແກ່ການປະຕິວັດ ແລະ ປະເທດຊາດ ເພື່ອພາລະກິດປົດປ່ອຍຊາດ ແລະ ສ້າງສາພັດທະນາປະເທດຊາດ ຕາມພາລະກິດປ່ຽນແປງໃໝ່ຂອງພັກ ທັງນີ້ກໍ່ເພື່ອເຮັດໃຫ້ຄະນະ ຊປປລ ຮ່ຳຮຽນເອົາແບບຢ່າງຄຸນສົມບັດສິນທຳປະຕິວັດ ແນວຄິດ-ອຸດົມການ ແບບແຜນການດຳລົງຊີວິດ ວິທີເຮັດວຽກ ແລະ ພາລະກິດປະຕິວັດອັນສູງສົ່ງຂອງຜູ້ນຳຮຸ່ນກ່ອນ ໃຫ້ນັບມື້ໜັກແໜ້ນເຂັ້ມແຂງ ມີຫົວຄິດປະດິດສ້າງ ມີຄວາມຮູ້ຄວາມສາມາດ ນຳພາຊາວໜຸ່ມລາວໃຫ້ກ້າວຂຶ້ນທັນຍຸກສະໄໝ.
ແຫລ່ງຂ່າວ: ວຽງຈັນໃໝ່