ອາດຈະປະຕິເສດບໍ່ໄດ້ວ່າ “ໃບໜ້າ” ເປັນປະການດ່ານທຳອິດທີ່ທຸກເພດທຸກໄວໃຫ້ຄວາມສົນໃຈ ແລະ ໃສ່ໃຈເບິ່ງແຍງເປັນພິເສດ ເພາະທຸກຄົນຢາກມີຜິວໜ້າຂາວໜ້າໃສ ນຽນນຸ່ມ ສົດໃສເບິ່ງມີສຸກຂະພາບດີ ເພາະນອກຈາກຈະເຮັດໃຫ້ເບິ່ງດີ ສະດຸດຕາ ໃບໜ້າຍັງເປັນດ່ານທຳອິດໃນຂະນະ ພົບຄັ້ງທຳອິດທີ່ສາມາດສ້າງຄວາມປະທັບໃຈ ທັງຍັງບົ່ງບອກເຖິງຄວາມມີສຸກຂະພາບດີອີກດ້ວຍ ເພາະຄວາມງາມຢຸດບໍ່ໄດ້ ຈຶ່ງມີສາວ ໆ ທີ່ຮັກງາມຮັກງາມຈຳນວນບໍ່ນ້ອຍພະຍາຍາມຊອກຫາຜະລິດຕະພັນສາລະພັດຍີ່ຫໍ້ ສາລະພັດວິທີບໍ່ວ່າທັງກິນທັງເພື່ອໃຫ້ງາມ ສະນັ້ນນອກຈາກຈະຕ້ອງບຳລຸງປິ່ນປົວຜິວໜ້າແລ້ວ ຍັງຕ້ອງຫລີກລ້ຽງພຶດຕິກຳທີ່ຈະທຳຮ້າຍຜິວອີກດ້ວຍ ສະນັ້ນເຮົາຕ້ອງປັບປ່ຽນພຶດຕິກຳຂອງເຮົາ ເພື່ອໃຫ້ຜິວງາມໃສເບິ່ງອ່ອນກວ່າໄວ ມາເບິ່ງກັນວ່າໃຜມີພຶດຕິກຳດັ່ງຕໍ່ໄປນີ້ນຳ ແລ້ວຄວນຈະຫລີກລ້ຽງຢ່າງໃດ ມາເບິ່ງກັນ
– ນອນທັງທີ່ຍັງບໍ່ລ້າງເມກອັບ
ເຊື່ອວ່າສາວ ໆ ຫລາຍຄົນມັກຈະມີພຶດຕິກຳລົ້ມລົງເທິງຕຽງ ໂດຍບໍ່ໄດ້ລ້າງໜ້າທັງໆ ທີ່ເມກອັບມາໝົດມື້ ສາວໆ ຮູ້ຫລືບໍ່ວ່າ ຖ້າຫາກປ່ອຍໃຫ້ຜິວໜ້າແບກຮັບຄວາມໜາຂອງເມກອັບໝົດມື້ແບບນີ້ ຄາບເຄື່ອງສຳອາງທີ່ຍັງຢູ່ເທິງຜິວຈະເປິດຮູຂຸມຂົນ ເຂົ້າຮວມກັບນ້ຳມັນເທິງຜິວໜ້າ ຈະເຮັດໃຫ້ເກີດການອຸດຕັນ ແລະເຮັດໃຫ້ເກີດສິວໄດ້
ດັ່ງນັ້ນ ຄວນລ້າງເມກອັບຕ່າງໆ ອອກໃຫ້ສະອາດ ແລ້ວທາມອຍຊ໌ເຈີໄລເຊີລ໌ບຳລຸງຜິວ ເພື່ອໃຫ້ຜິວທີ່ຖືກອຸດຕັນດ້ວຍເຄື່ອງສຳອາງມາທັງມື້ ໄດ້ຫາຍໃຈນຳ ດັ່ງນັ້ນເພື່ອສຸກຂະພາບຜິວທີ່ດີ ເມື່ອກັບເຖິງເຮືອນຄວນລ້າງໜ້າເອົາເຄື່ອງສຳອາງອອກໃຫ້ໄວທີ່ສຸດ
-ຂັດຜິວໜ້າເລື້ອຍໆເກີນໄປ
ການຂັດຜິວໜ້າເປັນການກຳຈັດເຊລ໌ຜິວເກົ່າທີ່ຕາຍແລ້ວອອກໄປ ເຜີຍຜິວໃໝ່ທີ່ສົດໃສກວ່າ ແຕ່ກໍຕ້ອງເຮັດຢ່າງພໍດີ ຊຶ່ງໂດຍທົ່ວໄປແລ້ວການຂັດຜິວໜ້ານັ້ນຄວນເຮັດຢ່າງພໍດີ ຂັດໜ້າບໍ່ເກີນ 2 ເທື່ອຕໍ່ອາທິດ ຫາກເກີນກວ່ານັ້ນ ນັ້ນຄືການທຳຮ້າຍຜິວໂດຍກົງ ແລະ ຖ້າຍິ່ງສົກຮັບຜິວໜ້າເລື້ອຍໆ ຈະເຮັດໃຫ້ຜິວຍິ່ງບາງລົງ ແລະ ແທນທີ່ຈະເຮັດໃຫ້ຜິວໜ້າເບິ່ງສົດໃສ ກັບເຮັດໃຫ້ໜ້າຍິ່ງແຫ່ວງ່າຍ ແລະ ອາດເກີດບັນຫາອື່ນຕາມມາໄດ້ງ່າຍ ຄວນຂັດໜ້າແບບເບົາມື ເພາະສະນັ້ນ ຄວນປ່ອຍໃຫ້ເວລາກັບຜິວໄດ້ຜັດເຊລ໌ໃໝ່ 2 – 3 ມື້
- ບໍ່ບີບສິວ ແກະ ຫລື ເກົາຜິວຫນັງ
ເວລາເປັນສິວ ບໍ່ຄວນບີບ ຫລື ແກະສິວ ຖ້າຫາກບີບແບບນີ້ຈະເປັນເຫດໃຫ້ຜິວໜ້າບໍ່ລຽບແລະເກີດຮອຍດຳ ເພາະເວລາເຮົາເປັນສິວແລ້ວເມື່ອໄປບີບແກະສິວ ຮ່າງກາຍຈະຜະລິດສານແອນຕິບໍດີ້ ເພື່ອຕໍ່ສູ້ຈາກການຕິດເຊື້ອຈາກພາຍນອກ ສານແອນຕິບໍດີ້ຈະເປັນຕົວທຳລາຍຄອນລາເຈນທີ່ຢູ່ໃຕ້ຜິວໜັງເຮົາ ຈະເຮັດໃຫ້ເກີດຮອຍຂຸມຂອງສິວປາກົດຂຶ້ນເທິງໃບໜ້າ
- ໃຊ້ຄີມບຳລຸງຜິວບໍ່ເໝາະກັບສະພາບຜິວ
ປະຈຸບັນຜະລິດຕະພັນບຳລຸງຜິວຫລາກຫລາຍຍີ່ຫໍ້ ລ້ວນຕອບໂຈດໃນການບຳລຸງຜິວໄດ້ເປັນຢ່າງດີ ແຕ່ໃນທີ່ນີ້ກໍມີຂໍ້ຍົກເວັ້ນຄືກັນ ຫາກສາວໆ ໃຊ້ຜະລິດຕະພັນທີ່ບໍ່ເໝາະກັບຜິວໜ້າ ຫລື ມີລິດແຮງເກີນໄປ ຈາກຜິວດີ ໆ ອາດກາຍເປັນໜ້າເພໄດ້ ທັງເກີດຜື່ນແດງ ສິວ ຫລື ອາການແສບຜິວຂຶ້ນມານີ້ຄື ການຟ້ອງວ່າເຈົ້າກຳລັງທຳຮ້າຍຜິວ ທາງທີ່ດີຄວນເລືອກຜະລິດຕະພັນທີ່ເໝາະກັບສະພາບຜິວ ແລະ ສາມາດບຳລຸງຜິວໜ້າຂອງເຈົ້າໄດ້ແທ້ໆ ທາງທີ່ດີທີ່ສຸດກ່ອນເລືອກຊື້ຜະລິດຕະພັນທຸກເທື່ອ ຄວນສອບຖາມຈາກຜູ້ຊ່ຽວຊານ ຫລື ສຶກສາຂໍ້ມູນຂອງຜະລິດຕະພັນນັ້ນໆ ເພື່ອໃຫ້ເລືອກຊື້ຜະລິດຕະພັນທີ່ບຳລຸງຜິວໜ້າໄດ້ຢ່າງແທ້ຈິງ
- ເຕີມເຄື່ອງສຳອາງຊ້ຳລະຫວ່າງວັນ
ແທ້ໆ ແລ້ວ ແປງແຕ່ງໜ້າ ລ້ວນເປັນອຸປະກອນທີ່ຊ່ວຍເນລະມິດຄວາມງາມໃຫ້ສາວໆ ໄດ້ບໍ່ນ້ອຍ ແຕ່ກໍມີສາວໆ ຈຳນວນບໍ່ນ້ອຍມັກເຕີມເຄື່ອງສຳອາງຊ້ຳລະຫວ່າງມື້ສະເໝີ ບໍ່ວ່າໃຊ້ວິທີການຕົບແປ້ງໂດຍໃຊ້ໂຟມຫລືແປງ ຫລືໃຊ້ແປງອອນປັດທີ່ແກ້ມເພິ່ມເຕີມ ຮູ້ຫລືບໍ່ວ່ານີ້ຄືການຊ້ຳເຕີມທຳຮ້າຍຜິວ ເພາະຈະຍິ່ງເຮັດໃຫ້ສິ່ງສົກກະປົກເຂົ້າໄປອຸດຕັນຮູຂຸມຂົນໄດ້ງ່າຍຂຶ້ນ ເມື່ອມີເຄື່ອງສຳອາງທີ່ເຕີມແຕ່ງເພີ່ມເຂົ້າໄປອຸດຕັນ ກໍຈະເຮັດໃຫ້ເກີດສິວຫລືຜື່ນແດງຕາມມາໄດ້ ໂດຍສະເພາະຄົົນທີ່ມີຜິວມັນຈະມີຄວາມສ່ຽງທີ່ຈະເກີດສິວໄດ້ງ່າຍກວ່າສະພາບຜິວຊະນິດອື່ນ ທີ່ສຳຄັນບໍ່ຄວນລະເລີຍທີ່ຈະເຮັດຄວາມສະອາດອຸປະກອນແຕ່ງໜ້າ ບໍ່ດັ່ງນັ້ນ ມັນຈະກາຍເປັນແຫລ່ງສະສົມຂອງເຊື້ອພະຍາດຈະເຮັດໃຫ້ເກີດບັນຫາຕາມມາໄດ້
- ຫ່າງໄກຄວາມຄຽດ
ຄວາມຄຽດຖືເປັນຕົວການສຳຄັນບໍ່ນ້ອຍ ທີ່ເຮັດໃຫ້ຜິວເສື່ອມກ່ອນໄວອັນຄວນ ເມື່ອເຮົາມີຄວາມຄຽດເກີດຂຶ້ນເມື່ອໃດ ຂໍໃຫ້ຕຽມໃຈໄວ້ເລີຍວ່າຜິວຂອງເຮົາກໍຈະຄຽດຕາມໄປນຳ ສະນັ້ນວິທີແກ້ງ່າຍໆ ຄື ເລີ່ມຈາກຕົວເຮົາ ດ້ວຍການຝຶກຈິດໃຫ້ສະຫງົບ ເຮັດສະມາທິ ຫລືຈະໃຊ້ວິທີອອກກຳລັງກາຍຍືດເສັ້ນຍືດສາຍດ້ວຍການຫລິ້ນໂຍຄະສ້າງສະມາທິ ຈະຊ່ວຍໃຫ້ກະຕຸ້ນການໄຫລວຽນຂອງເລືອດ ໃຫ້ຊ່ວຍສົ່ງຜ່ານອອກຊິເຈນໄປລ້ຽງເຊລ໌ຕ່າງໆ ທົ່ວຮ່າງກາຍ ລຸດຄວາມຄຽດໄດ້ອີກທາງ
ສະນັ້ນເພື່ອຜິວງາມຈະຢູ່ກັບເຈົ້າຕະຫລອດໄປ ຢ່າລືມວ່າ ງາມຈາກພາຍນອກຢ່າງດຽວບໍ່ໄດ້ ຕ້ອງງາມຈາກພາຍໃນດ້ວຍ