ໃນວັນທີ 21 ເມສານີ້, ທ່ານ ພັຕ ຈັນທະບູນ ມະນີວົງ ຫົວໜ້າພະແນກ ສະກັດກັ້ນ ແລະ ຕ້ານອັກຄີໄພ ນະຄອນຫລວງວຽງຈັນ ໄດ້ອອກມາຊີ້ແຈງຜ່ານນັກຂ່າວພວກເຮົາວ່າ: ພາຍຫລັງໄດ້ມີຫາງສຽງຈາກສັງຄົມວ່າ: ການອອກໄປຊ່ວຍເຫລືອ ເພື່ອສະກັດກັ້ນ ແລະ ມອດໄຟໃນຈຸດເກີດເຫດຊັກຊ້າ, ເຊິ່ງກໍມີຫລາຍບັນຫາ ແລະ ສາມາດທີ່ຈະຕ້ອງໄດ້ເອົາໃຈໃສ່ຊ່ວຍກັນແກ້ໄຂເຊັ່ນ: 1.) ເນັ້ນໃຫ້ປະຊາຊົນຜູ້ທີ່ໂທເຂົ້າມາແຈ້ງເຫດແມ່ນໃຫ້ດ່ວນ ແລະ ຊັດເຈນ, 2.) ເສັ້ນທາງທີ່ຈະເດີນທາງໄປນັ້ນ ບາງຄັ້ງຖືກຊ່ວງໄລຍະເວລາເລັ່ງດ່ວນເປັນຕົ້ນ ເວລາເຂົ້າການ-ເລີກການ ເຮັດໃຫ້ການສັນຈອນແອອັດ, 3.) ເສັ້ນທາງເຂົ້າໄປຫາຈຸດເກີດເຫດຄັບແຄບ, ຊຸມຊົນແອອັດ, 4.) ຈຸດເກີດເຫດຫ່າງໄກຈາກຕົວເມືອງ ອາດຈະເປັນເຂດຫ່າງໄກສອກຫລີກ ແລະ 5.) ການປະສານງານກັບພາກສ່ວນກ່ຽວຂ້ອງເປັນຕົ້ນ ພາກສ່ວນໄຟຟ້າ, ເພື່ອມາຕັດກະແສໄຟຟ້າເສຍກ່ອນ, ຈຶ່ງສາມາດນຳລົດນ້ຳເຂົ້າໄປສີດນ້ຳໃສ່ຈຸດ ເກີດເຫດໄດ້ ແລະ ບໍລິສັດ ນ້ຳປະປາ ກໍຕ້ອງໃຫ້ຄວາມສະດວກສະບາຍໃນການປ່ອຍນ້ຳຢູ່ຕາມຈຸດສະເພາະ. ດັ່ງນັ້ນ ຖ້າທຸກພາກສ່ວນເອົາໃຈໃສ່ຊ່ວຍກັນການຊ່ວຍເຫລືອດັບມອດໄຟໃນຈຸດເກີດເຫດກໍຈະວ່ອງໄວຂຶ້ນ.
ທ່ານ ພັຕ ຈັນທະບູນ ມະນີວົງ ກ່າວວ່າ: ສາເຫດຂອງການເກີດອັກຄີໄພສ່ວນໃຫຍ່ແລ້ວ ເກີດຈາກການຈູດຂີ້ເຫຍື້ອ, ຈູດຫຍ້າ, ຈູດປ່າແບບຊະຊາຍ, ຊຶ່ງຈະເປັນຕົ້ນເພີງລາມລຸກໄປໄໝ້ສິ່ງຂອງ, ເຮືອນຊານບ້ານຊ່ອງຂອງປະຊາຊົນທີ່ຢູ່ໃກ້ຄຽງໄດ້ງ່າຍດາຍ, ການນຳໃຊ້ໄຟຟ້າເຂົ້າໃນຊີວິດປະຈຳວັນ, ການຜະລິດ ແລະ ອື່ນໆ. ດັ່ງນັ້ນ ພວກເຮົາຄວນເອົາໃຈໃສ່ກວດກາສາຍໄຟຟ້າໃຫ້ຢູ່ໃນສະພາບສົມບູນ, ຮັບປະກັນມາດຖານ, ຖ້າເຫັນວ່າເກົ່າແກ່, ເປ່ເພ, ຊຸດໂຊມຕ້ອງປົວແປງ ແລະ ປ່ຽນຖ່າຍທັນທີ, ເມື່ອສຳເລັດພາລະກິດຕ່າງໆ ຫລື ກ່ອນອອກຈາກບ້ານ, ຫ້ອງການ ແລະ ອື່ນໆ ຕ້ອງກວດ ກາປິດເຕົາແກັດ, ເຄື່ອງໃຊ້ໄຟຟ້າ, ຖອດປັກສຽບ ແລະ ມອດໄຟໃຫ້ລະອຽດ ຮອບຄອບເສຍກ່ອນ, ພ້ອມນີ້ ການໄຕ້ທູບທຽນບູຊາ, ຕ້ອງຮັບປະກັນຄວາມປອດໄພທຸກຄັ້ງ, ກາບໄຫວ້ແລ້ວ ກໍມອດທູບທຽນທັນທີ, ຮ້ານບູຊາຕ້ອງເຮັດດ້ວຍວັດຖຸທີ່ບໍ່ໄວໄຟ, ຫ່າງໄກຈາກບ່ອນທີ່ມີເຊື້ອໄຟ. ນອກຈາກນີ້ ເມື່ອເຫັນເຈົ້າໜ້າທີ່ຕຳຫລວດປ້ອງກັນສະກັດກັ້ນ ແລະ ຕ້ານອັກຄີໄພ ລົງໄປປະສານສົມທົບກໍຈົ່ງໃຫ້ການຮ່ວມມື ແລະ ປະຕິບັດຕາມການແນະນຳຂອງເຈົ້າໜ້າທີ່ຢ່າງເຂັ້ມງວດ ແລະ ທີ່ສຳຄັນທີ່ສຸດແມ່ນໃຫ້ກະກຽມເຄື່ອງອຸປະກອນມອດໄຟ (ບັ້ງມອດໄຟ) ມາໄວ້ປະຈຳແຕ່ລະຄົວເຮືອນ ເພື່ອປ້ອງກັນອັກຄີໄພທີ່ຈະເກີດຂຶ້ນໄດ້ທັນເວລາ.
ແຫລ່ງຂ່າວ: ລາວພັດທະນາ