ພິທີຕັນນ້ຳເຂົ້າອ່າງເຂື່ອນໄຟຟ້ານ້ຳຄານ 2 (ເມືອງຊຽງເງິນ ແຂວງຫຼວງພະບາງ) ໄດ້ຈັດຂຶ້ນວັນທີ 18 ເມສາ 2015 ໂດຍມີທ່ານ ສົມສະຫວາດ ເລັ່ງສະຫວັດ ຮອງນາຍົກລັດຖະມົນຕີ ຜູ້ຊີ້ນຳວຽກງານເສດຖະກິດ ການຜະລິດ ແລະ ຈໍລະຈອນ ທ່ານ ດຣ.ຄຳແພງ ໄຊສົມແພງ ເຈົ້າແຂວງຫຼວງພະບາງ ທ່ານ ສຸລິວົງ ດາລາວົງ ລັດຖະມົນຕີວ່າການກະຊວງພະລັງງານ ແລະ ບໍ່ແຮ່ ພ້ອມດ້ວຍແຂກຖືກເຊີນເຂົ້າຮ່ວມ.
ທ່ານ ສີສະຫວາດ ທິຣາວົງ ຜູ້ອຳນວຍການໃຫຍ່ລັດວິສາຫະກິດໄຟຟ້າລາວ ໄດ້ກ່າວວ່າ: ໂຄງການເຂື່ອນໄຟຟ້ານ້ຳຄານ 2 ແມ່ນໂຄງການໜຶ່ງຂອງລັດຖະບານ ທີ່ມອບໃຫ້ລັດວິສາຫະກິດໄຟຟ້າລາວ ເປັນຜູ້ຈັດຕັ້ງປະຕິບັດ ແລະ ຄຸ້ມຄອງໂຄງການນີ້ ໄດ້ຮັບເງິນກູ້ຈາກທະນາຄານເອັກຊິມແບງ (EXIM BANK) ສປ ຈີນ ມູນຄ່າ 308 ລ້ານໂດລາສະຫະລັດ ຫຼື ປະມານ 2.464 ຕື້ກີບ ແລະ ມອບໃຫ້ບໍລິສັດ SINOHYDRO CORPORATION ສປ ຈີນ ເປັນຜູ້ຮັບເໝົາກໍ່ສ້າງໄລຍະ 54 ເດືອນ ລັກສະນະຂອງເຂື່ອນ ເປັນເຂື່ອນຫີນແຂງອັດແໜ້ນ ສາບໜ້າດ້ວຍຄອນກຣີດ ເນື້ອທີ່ອ່າງໂຕ່ງ 5.167 ກິໂລຕາແມັດ ສາມາດກັກເກັບນ້ຳໄດ້ 686,2 ລ້ານແມັດກ້ອນ ມີກຳລັງຕິດຕັ້ງ 130 ເມກາວັດ ແລ່ນດ້ວຍເຄື່ອງຈັກ 2 ເຄື່ອງ ສາມາດຜະລິດພະລັງງານໄດ້ 558 GWh ຕໍ່ປີ ແລະ ອີກ 5 ເດືອນຂ້າງໜ້າ ກໍ່ຈະສາມາດຜະລິດກະແສໄຟໄດ້ຕາມແຜນທີ່ໄດ້ວາງໄວ້.
ໂຄງການເຂື່ອນໄຟຟ້ານ້ຳຄານ 2 ແມ່ນເປັນອີກໂຄງການໜຶ່ງ ທີ່ສາມາດຕອບສະໜອງພະລັງງານໄຟຟ້າໃຫ້ພາຍໃນປະເທດ ໂດຍສະເພາະ ເຂດພາກເໜືອ ນອກຈາກນີ້ ຈະເປັນອ່າງນ້ຳໃຫຍ່ອີກ 1 ແຫ່ງ ເຊິ່ງສາມາດພັດທະນາເປັນເຂດທ່ອງທ່ຽວ ແລະ ທຳມາຫາກິນຂອງປະຊາຊົນໃນເຂດເມືອງຊຽງເງິນ ເພື່ອເປັນການຍົກລະດັບຊີວິດການເປັນຢູ່ຂອງປະຊາຊົນບັນດາເຜົ່າໃຫ້ດີ ຂຶ້ນ ແລະ ເພື່ອໃຫ້ຫຼຸດພົ້ນອອກຈາກຄວາມທຸກຍາກເທື່ອລະກ້າວ.
ແຫລ່ງຂ່າວ: ວຽງຈັນໃໝ່