ເພື່ອກະກຽມຮອງ​ຮັບ​ການ​ຂົນ​ສົ່ງ​ໂດຍສານ​ໄລຍະ​ປີ​ໃໝ່ລາວ​ ພສ 2558 ນີ້​ໃຫ້​ມີ​ຄວາມ​ຮັບປະກັນ ໂດຍສານ​ທຸກ​ປະ​ເພດ​ທາງ​ພາຍ​ໃນ ແລະ ຕ່າງ​ປະ​ເທດແມ່ນ ຈະຕ້ອງໄດ້ຮັບການກວດກາຄຸນນະພາບເຕັກນິກໃຫ້ດີທີ່ສຸດ ພາຍຫຼັງສັງເກດເຫັນວ່າ: ໃນໄລຍະຜ່ານມາ ລົດໂດຍສານທີ່ບໍລິການຢູ່ຕາມສາຍທາງຕ່າງໆໃນທົ່ວປະ ເທດ ມັກເກີດອຸປະຕິເຫດ ອາດດ້ວຍການຕຳກັນ, ພິກຂວ້ຳ, ຕີນແຕກ, ເບກແຕກ ແລະ ອື່ນໆ ຍ້ອນຍັງຂາດການກວດກາຄຸນນະພາບເຕັກນິກ ແລະ ຮ້າຍແຮງໄປກ່ວານັ້ນ ລົດໂດຍສານຫຼາຍຄັນທີ່ແລ່ນໃນຍາມຄໍ່າຄືນ ມີໄຟເຍືອງທາງພຽງເບື້ອງດຽວ, ໄຟສູງ, ໄຟຕໍ່າ, ບໍ່ຮັບປະກັນ ສົ່ງຜົນໃຫ້ເກີດອຸປະຕິເຫດ ເວົ້າລວມແລ້ວ ບັນຫາດັ່ງກ່າວແມ່ນຍ້ອນຜູ້ຂັບຂີ່ ຫຼື ເຈົ້າຂອງຜູ້ປະກອບການ ຍັງຖືເບົາບໍ່ເອົາໃຈໃສ່ໃນການກວດກາສະພາບເຕັກນິກຂອງລົດກ່ອນ ອອກເດີນທາງແຕ່ລະຄັ້ງ.

ດັ່ງນັ້ນໃນໂອກາດການຫຼິ້ນປີໃໝ່ປີນີ້ ການພັກຫຼິ້ນບຸນອາດຈະແກ່ຍາວໄປຫຼາຍວັນ ແລະ ຈະເຮັດໃຫ້ມີຜູ້ ໂດຍ ສານເດີນທາງໄປມາຫຼາຍ ດັ່ງນັ້ນຈຶ່ງມີຄວາມຈຳເປັນໃນການເຂັ້ມງວດ ກວດກາສະພາບເຕັກນິກລົດ ແລະ ສະຕິຂອງຜູ້ຂັບຂີ່ໃຫ້ດີໃນການປະຕິບັດລະບຽບຈະລາຈອນ ພ້ອມສັ່ງໃຫ້ບັນດາບໍລິສັດຂົນສົ່ງໂດຍສານ ເພີ່ມປະລິມານລົດ ແລະ ເພີ່ມຖ້ຽວໃຫ້ຫຼາຍຂຶ້ນ ເພື່ອອຳນວຍຄວາມສະດວກ ແລະ ຮັບປະກັນຄວາມປອດໄພ ຂອງຜູ້ໂດຍສານ, ພ້ອມກັນໄດ້ສະຫຼອງສົງການປີໃໝ່ລາວປີ ນີ້ດ້ວຍບັນຍາກາດເບີກບານມ່ວນຊື່ນ ປາສະຈາກອຸປະຕິເຫດຕ່າງໆທີ່ຈະເກີດຂຶ້ນ.

ແຫລ່ງ​ຂ່າວ: ລາວ​ພັດ​ທະ​ນາ