ໂຄງການເຂື່ອນໄຟຟ້ານ້ຳຕົກນ້ຳຮຸ່ງ 1 ເມືອງໄຊຍະບູລີ ແຂວງໄຊຍະບູລີ ຈະເລີ່ມລົງມືກໍ່ສ້າງໃນມໍ່ໆນີ້ ໂດຍຈະໃຊ້ທຶນການກໍ່ສ້າງທັງໝົດ 16,99 ລ້ານກວ່າໂດລາສະຫະລັດ ຫຼື ປະມານ 135 ຕື້ກວ່າກີບ ເຊິ່ງຈະໃຊ້ເວລາໃນການກໍ່ສ້າງ 3 ປີ ນັບແຕ່ມື້ລົງນາມສັນຍາການກໍ່ສ້າງ ເຊິ່ງໂຄງການດັ່ງກ່າວມີກຳລັງຕິດຕັ້ງການຜະລິດ 15 ເມກາວັດ.
ພິທີລົງນາມສັນຍາຮັບເໝົາກໍ່ສ້າງເຂື່ອນດັ່ງກ່າວ ຈັດຂຶ້ນໃນວັນທີ 18 ມີນາ 2015 ທີ່ໂຮງແຮມວຽງຈັນພລາຊາ ລະຫວ່າງບໍລິສັດ ສີເມືອງກຣຸບ ຈຳກັດ ໂດຍແມ່ນທ່ານ ເອກະພັນ ພະພິທັກ ປະທານບໍລິສັດ ສີເມືອງກຣຸບ ຈຳກັດ ກັບສອງບໍລິສັດຈາກ ສ ເກົາຫຼີ ບໍລິສັດ ວິສາວະກຳວູດູ (ວີເຈ) ຈຳກັດ ໂດຍທ່ານ ລີ ຊັອກ ຊາງ (Lee Sauk Seung) ຮອງປະທານບໍລິສັດ ວິສາວະກຳວູດູ (ວີເຈ) ຈຳກັດ ແລະ ບໍລິສັດ ອຸດສາຫະກຳປຸງຈິງ ໂດຍທ່ານ ລີ ຊັງ ບັອກ ຜູ້ອຳນວຍການບໍລິສັດ ອຸດສາຫະກຳປຸງຈິງ ເຊິ່ງມີພາກສ່ວນກ່ຽວຂ້ອງ ເຂົ້າຮ່ວມເປັນສັກຂີພິຍານ.
ສຳລັບການລົງນາມຄັ້ງນີ້ ແມ່ນມີພຽງແຕ່ໄລຍະຂອງການກໍ່ສ້າງເທົ່ານັ້ນ ສ່ວນໄລຍະການສະໜອງເຄື່ອງຈັກ ເຂົ້າໃນການຜະລິດກະແສໄຟຟ້ານັ້ນ ແມ່ນຈະໄດ້ລົງນາມສັນຍາອີກຄັ້ງ.
ການພັດທະນາດ້ານພະລັງງານ ເປັນຕົ້ນແມ່ນການກໍ່ສ້າງເຂື່ອນໄຟຟ້ານ້ຳຕົກ ຈະສົ່ງຜົນດີຕໍ່ການພັດທະນາທາງເສດຖະກິດ ເພື່ອຍົກລະດັບຄຸນະພາບຊີວິດການເປັນຢູ່ຂອງປະຊາຊົນລາວບັນດາເຜົ່າ ເວົ້າສະເພາະ ປະຊາຊົນໃຫ້ດີຂຶ້ນເທື່ອລະກ້າວ ເນື່ອງຈາກ ສປປ ລາວ ສາມາດທີ່ຈະສ້າງລາຍຮັບຈາກການຂາຍກະແສໄຟຟ້າ ແລະ ໃນຂະນະດຽວກັນ ການຕອບສະໜອງກະແສໄຟຟ້າໄປໃຫ້ປະຊາຊົນລາວ ໄດ້ຊົມໃຊ້ຢ່າງກວ້າງຂວາງຫຼາຍຂຶ້ນ ທັງເປັນການປະກອບສ່ວນທີ່ສຳຄັນ ເຂົ້າໃນການພັດທະນາເສດຖະກິດ-ສັງຄົມ ຕື່ມອີກ.
ແຫລ່ງຂ່າວ: ວຽງຈັນໃໝ່